आचारसंहिताविपरीत अघि बढ्यो एमाले महाधिवेशन, ओली पक्षबाट आयोगको निर्देशन उल्लंघन

आचारसंहिताविपरीत अघि बढ्यो एमाले महाधिवेशन, ओली पक्षबाट आयोगको निर्देशन उल्लंघन

A+ A A-

सोमबार बिहान मात्र एमाले महाधिवेशनको निर्वाचन आयोगले प्यानल र समूह बनाएर भोट माग्न मात्र होइन, प्रचार–प्रसार गर्न पनि बन्देज लगाएको थियो । यस्तो गरेको भेटिएमा उम्मेदवारी खारेज गर्ने अधिकार आफूलाई भएको भन्दै आयोगले बन्दसत्रस्थलमा माइकिङ गरेको थियो ।

एमाले नवौँ महाधिवेशनपश्चात् ओलीको इच्छाअनुसार नै प्यानल बनाएर महाधिवेशन नगर्ने निर्णय गरेको थियो । तर, यसविपरीत अहिले सौराहामा ओली समर्थकहरू प्यानल बनाएरै निर्वाचनको समयमा भोट माग्ने काममा लागेका छन् । त्यसो त ओलीले बनाएको सर्वसम्मत भनिएको सूचीलाई नै कतिपय प्रतिनिधिले प्यानल भन्दै टिप्पणी गरिरहेका छन् । तर, मुखरित भएर ओलीको निर्णयविरुद्ध बोल्न सकिरहेका छैनन् ।

ओलीको एकल दाबीलाई चुनौती दिँदै एमाले अध्यक्षमा भीम रावलले उम्मेदवारी दिएपछि सौराहामा ओलीको चैन खोसिएको छ । त्यसैले त अध्यक्ष पदमा ओलीको जित लगभग पक्का ठानिएका बेला पनि भीम रावल र अन्य पदमा उम्मेदवारी दिएकाहरूलाई भोट नहाल्नू भन्ने पर्चा बाँडिरहेका छन् ओली समर्थक ।

महासचिव शंकर पोखरेल भन्छन्, ‘बन्दसत्र हलबाटै पारित सूचीलाई प्रचार–प्रसार गर्नु स्वाभाविक हो ।’ यता रावलले भने आफूलाई भोट नहाल्न भन्दै बाँडिएको पर्चा अलोकतान्त्रिक भएको बताउँदै यस्तो पर्चा वितरणमा रोक लगाउन निर्वाचन आयोग र सुरक्षाकर्मी गुहारेका छन् ।

‘यो कामले पार्टीमा धब्बा लाग्छ, लोकतन्त्रलाई कमजोर बनाउँछ । मतदान इलाकामा पार्टी निर्वाचन आयोगको आचार संहिताविपरीत यस्तो पर्चा बाँड्ने काम रोक्न म आयोग र सुरक्षाकर्मीलाई आग्रह गर्छु,’ रावलले भने ।

‘हामीले संहिता जारी गरेका छौँ, परिसर बाहिर त कसले के गर्छ । भिजिटिङ कार्ड साइजको कागजमा प्रचार गर्न पाइन्छ । अरु केही पाइँदैन,’ एमाले महाधिवेशन निर्वाचन आयोगका अध्यक्ष विजय सुब्बाले भने । सर्वसम्मतिबाट नेतृत्व छान्ने प्रयास रावलका कारण असफल भएपछि १२ मंसिरमै बन्दसत्र हलबाहिर ओली समर्थकले रावलविरुद्ध चर्को नाराबाजी गरेका थिए ।

अवस्था कस्तोसम्म छ भने, ओलीले प्रस्ताव गरेको सर्वसम्मत सूचीमा असहमति जनाएर उम्मेदवारी दिएका रावल र घनश्याम भुसाल बन्दसत्रस्थल वरिपरि पुग्नेबित्तिकै पनि उनीहरूविरुद्ध नाराबाजी सुरु हुन्छ । ओलीको सर्वसम्मति भनिएकाे सूचीमा असन्तुष्टि दर्ज गर्दै उम्मेदवारी दिएका रावल, भुसाल, टंकप्रसाद कार्की, भीमप्रसाद आचार्यलगायत दर्जनभन्दा बढी केन्द्रीय सदस्य र पदाधिकारीलाई मत नहाल्न भन्दै ओली समर्थकले मतदानस्थलबाहिर पर्चा बाँडिरहेका छन् ।

१२, १३ मंसिरमा ओलीले सर्वसम्मत पदाधिकारी छान्नका लागि भरमग्दुर प्रयास गरे । दिनभर सर्वसम्मतिको प्रयासमा लागिरहँदा महाधिवेशनमा आएका प्रतिनिधि बेरोजगार बने । दिनभरको सर्वसम्मति प्रयास असफल भएपछि गएका दुई दिनदेखि एमाले महाधिवेशनको चहलपहल रातमा बढ्न थालेको छ । रातमा हुने पार्टी चहलपहललाई धाँधलीको संकेत भन्दै रावलले बारम्बार विरोध जनाउँदै आएका छन् ।

प्रकाशित मिति: मंगलबार, मंसिर १४, २०७८ ०९:१५