एमाले महाधिवेशनमा सिस्नु र ढाकाको कपडा बेच्ने कमला

A+ A A-

नेकपा (एमले) को १०‍औँ महाधिवेन चितवनमा जारी छ । १० देखि १२ मंसिरसम्म हुने भनिएको महाधिवेशन नेतृत्व चयनमा सहमति जुट्न नसक्दा दुई दिन लम्बिएको छ ।

चितवनमा जारी एमाले महाधिवेशनमा चितवनका व्यापारीले मनग्य व्यापार गरे । तीनै उद्यमीमध्येकी एक हुन् कमला सुवेदी । सिस्नु, ढाका तथा अल्लोको कपडा, जुत्ता एवम् विभिन्न हस्तकलाका सामग्रीहरू बेच्न उनलाई भ्याइ नभ्याइ छ ।

महाधिवेशनमा आएका प्रतिनिधिहरूका कारण उनको व्यापार बढेको छ । ‘प्रतिनिधिहरूले बढी किन्नुभएको छ । ढाका र अल्लोको आइटमको जुत्ता र लुगा पनि राम्रो बिक्री भइरहेको छ,’ कमला भन्छिन्, ‘नेपाली उत्पादन राम्रो रहेछ भन्दै प्रशंसा गर्नुभयो ।’

काठमाडौंको कंलकीमा सिर्जनशील किस्टल हस्तकला उद्योग छ । उनले त्यहाँ हस्तकलासम्बन्धी सामग्री उत्पादन गर्दै आएकी छन् । महाधिवेशन हेर्न पनि पनि पाइने, व्यापार पनि हुने सोचेर बन्दसत्र हलअगाडि स्टल राखेको उनी बताउँछिन् । अपेक्षा गरेभन्दा बढीको व्यापार भएको उनको भनाइ छ । ‘दिनकै डेढ लाखसम्मको बिक्री भइरहेको छ,’ उनले भनिन्, 'यहाँ आएको दिनदेखि भ्याइ नभ्याइ छ ।’

मकवापुरको हेटौँडा उपमहानगरपालिका– ५ स्थायी घर भएकी ५० वर्षीया कमला हस्तकला संघको बागमती प्रदेशकी उपाध्यक्ष हुन् । उनले हस्तकलाको काम थालेको ३० वर्ष भइसक्यो । यो अवधिमा आफूले ५० हजारभन्दा बढी महिलालाई तालिम दिइसकेको कमला बताउँछिन् ।

आफू विवाहपछि हस्तकला उद्यममा लागेको बताउँछिन् उनी । एक संस्थाले गाउँमै दिएको हस्तकलाका सामान बनाउने तालिम लिएपछि उनको उद्यमयात्रा सुरु भएको हो ।

‘हामी बुबाको कमाइमा रमाउँदा छोरीहरूले कमाउन पर्दैन भन्ने लाग्थ्यो । विवाह भएपछि श्रीमान्‌को कमाइ नहुँदा हेप्न थालेपछि इख लिएर मेहनत गर्न थालेँ,' कमला भन्छिन्, 'हिजो मलाई पाँच रुपैयाँ कसैले पत्याउँदैनथ्यो । आज उनीहरू नै तारिफ गर्छन् ।’

केही समय अरुको उद्योगमा काम गरेकी कमलाले आफ्नै उद्यम सुरु गर्ने हिम्मत जुटाइन् । २०७० मा उनले सिर्जनशील किस्टल हस्तकला उद्योग दर्ता गरिन् । ‘सधैँ अर्काको काम गरेर मात्र नहुँदो रहेछ । एउटा महिललो आफ्नो उद्यम व्यवसाय गरेर अगाडि बढ्यो भने राज्यले दिने सुविधा दिने रहेछ भनेर आफ्नै उद्योग खोलेँ,’ उनी भन्छिन् ।

अहिले उद्यम गर्न चाहने महिला देशभरबाट जोडिएको उनले बताइन् । ‘गाउँघरबाट कच्चा पदार्थदेखि फिनिसिङ नभएका हस्तकलाका सामग्री पठाउनुहुन्छ । हामीले त्यसलाई प्रवर्द्धन पनि गर्दै आएका छौँ,’ उनले भनिन् ।

अहिले आफ्नो उद्योगबाट मासिक ३० देखि ३५ लाखको कारोबार हुने उनको भनाइ छ । उनले आफ्नो उद्योगमा ५० जना महिलालाई रोजगारी दिएको बताइन् ।

आफू ‘एक घर एक उद्यमी’को अभियान बोकेर हिँडेको बताउँछिन् उनी । ‘अहिले लैंगिक हिंसाविरुद्धको १६ दिने अभियान चलिरहेको छ । महिलालाई हिंसाविरुद्ध उभिन पनि आर्थिक जग बलियो हुनुपर्ने रहेछ,' कमलाले भनिन्, 'आर्थिक रूपमा सबल भएपछि हरेक कुरामा अगाडि बढ्न धेरै सहज हुन्छ ।’

प्रकाशित मिति: मंगलबार, मंसिर १४, २०७८ १५:३७