शंकर पोखरेल र विष्णु रिमालले पाए अघिल्लो पटक हारेको पदभन्दा एक-एक तह बढुवा, यी हुन् ओलीका सारथि

शंकर पोखरेल र विष्णु रिमालले पाए अघिल्लो पटक हारेको पदभन्दा एक-एक तह बढुवा, यी हुन् ओलीका सारथि

A+ A A-

नेकपा एमालेको १०औँ महाधिवेशनको बन्दसत्रबाट अध्यक्ष केपी शर्मा ओलीले आफ्नो सारथि घोषणा गरेका छन् । एमाले हाँक्नका लागि उनले १९ पदाधिकारी प्रस्ताव गर्ने क्रममा वरिष्ठ उपाध्यक्षमा ईश्वर पोखरेललाई प्रस्ताव गरेका छन् । यस्तै, उपाध्यक्षहरूको सूचीमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवासचन्द्र नेम्वाङ अटाएका छन् ।

ओलीले महासचिवका लागि शंकर पोखरेललाई अघि सारेका छन् भने उनले उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमालको नाम प्रस्ताव गरेका छन् । यता सात सचिवमा टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट र पद्मा अर्याल अटाएका छन् ।

बुटवलमा भएको नवौँ महाधिवेशनमा सचिवमा पराजित विष्णु रिमाल र उपमहासचिवमा पराजित शंकर पोखरेललाई ओलीले एक/एक तह बढुवा गरेका छन् । उनीहरूको एक/एक तह बढुवा हुँदा लोकप्रिय मत ल्याउने विष्टले भने सचिवमै चित्त बुझाउनुपरेको छ । यता घनश्याम भुसाललाई ओलीले उपमहासचिवको सूचीमा समेत समावेश गरेनन् । उनी १० बुँदे सहमतिका पक्षधर भीम रावल र भुसालसँग निकै रुष्ट थिए ।

उनले नेता रावललाई हलले दिएको म्यान्डेट बाहिर नजान पनि सुझाएका थिए । ‘हलले सुझाएको म्यान्डेट बाहिर नजान म रावल कमरेडलाई आग्रह गर्छु,’ ओलीको भनाइ थियो । रावलले अध्यक्षमा उम्मेदवारी दिनका लागि आइतबार मध्यरातमा फारम भरिसकेका छन् । निर्वाचन कार्यतालिका परिवर्तन भएकाले उनको उम्मेदवारी बिहान ९ बजेपछि मात्रै दर्ता हुनेछ ।

अध्यक्ष र उपाध्यक्षमा निर्वाचन पक्का

एमालेमा अब अध्यक्ष र उपाध्यक्षमा निर्वाचन पक्का देखिएको छ । ओलीलाई सर्वसम्मत रूपमा अध्यक्ष बन्न रोक्दै रावलले उम्मेदवारी दिनेछन् भने भुसालले उपाध्यक्षमा उम्मेदवारी दिनेछन् । ओलीले बन्दसत्र हलमा रावललाई उपाध्यक्षमै निरन्तरता दिने प्रस्ताव ल्याएका थिए । रावलले उनको प्रस्ताव अस्वीकार गरेका छन् ।

बन्दसत्रलाई सम्बोधन गर्दै ओलीले एकताका लागि आफूले धेरै प्रयास गरेको दाबी गर्दै असहमति र असन्तुष्टि हुनु स्वाभाविक भए पनि बाहिर प्रकट हुन नहुने धारणा राखे । रावलबारे हललाई जानकारी गराउँदै ओलीले भने, 'मैले धेरै पटक भीम रावललाई उपाध्यक्षको उम्मेदवार बन्न आग्रह गरेँ, तर सम्झाउन सकिएन ।’

ओलीको भनाइपछि रावलले अध्यक्षमा उम्मेदवारी दिने जानकारी गराए । ‘रात गएर बिहान भयो कमरेडहरू सुत्न पाउनुभएको छैन, 'उनले भने, ‘लामो बोल्दिनँ । मलाई फर्किन गाह्रो हुन्छ, अध्यक्षमा उम्मेदवारी दिन्छु ।’

रावलले त्यसअघि नै बन्दसत्रमा अबेर गरेर धाँधली गर्न खोजिएको र गुट निर्माण गर्न खोजिएको आरोप लगाएका थिए । उनको उम्मेदवारीमा दाबीपछि हल नाराबाजीमा उत्रियो । त्यसलाई रोक्दै ओलीले भने, 'अब उम्मेदवार हुन्छु, कसैले भन्छ भने हुन दिनुपर्छ । भीम रावल अध्यक्षमा उठ्नुपर्छ ।‘

पद्मा अर्यालको सचिवमा डेब्यु माओवादी केन्द्रलाई तीन पदाधिकारी

एमालेमा सचिवको रूपमा पद्मा अर्यालले पदाधिकारीमा डेब्यु गरेकी छिन् । स्याङ्जाकी अर्याल एमालेभित्र चर्चित महिला नेता हुन् । महिला नेताहरूले कम्तीमा पनि दुई महिला सचिव र एक महिला उपमहाचिवको माग गर्दै नेतृत्वलाई दबाद दिँदै आएका थिए । तर, एमालेको पदाधिकारीमा शाक्य उपाध्यक्ष र अर्याल सचिव बनिन् ।

एमालेमा रहेकाे पूर्वमाओवादी समूहले पनि तीन पदाधिकारी पाएकाे छ । ओलीले माओवादी पृष्ठभूमिका रामबहादुर थापा बादललाई उपाध्यक्ष र नेता टाेपबहादुर रायमाझी र लेखराज भट्टलाई सचिव बनाएका हुन् । रायमाझीले उपमहासचिवमा दाबी गर्दै आएका थिए ।

सचिव बन्ने चाहना प्रकट गरेका नेता प्रभु साहको आकांक्षा बने पूरा हुन सकेन । उनले ओलीलाई आफूले बाँचुञ्जेल नछोड्ने र सधैँ सहयोग गर्ने वाचा गर्दै आएका थिए ।

प्रकाशित मिति: सोमबार, मंसिर १३, २०७८ ०५:३८