सर्वसम्मतिका नाममा बन्दसत्र बन्धक, नेम्वाङ र रावलको अडानले ओली दिनभर रिसोर्टमा

सर्वसम्मतिका नाममा बन्दसत्र बन्धक, नेम्वाङ र रावलको अडानले ओली दिनभर रिसोर्टमा

A+ A A-

१०औँ महाधिवेशनबाट पदाधिकारीसहित केन्द्रीय कमिटी सर्वसम्मतिबाट चयन गर्ने अध्यक्ष केपी ओलीको अडानमा सुवास नेम्वाङ र भीम रावलको चुनौतीका कारण केपी ओलीले दिनभर होटल पार्क सफारीमै बिताए । सँगै, उनले सर्वसम्मतिका नाममा बन्दसत्रलाई समेत बन्धक बनाएका छन् ।

बिहान १० बजेदेखि सुरु हुनुपर्ने बन्द सत्र साँझ ७ बजेपछि हुने भन्दै प्रतिनिधिलाई खबर पठाइएको छ । ओली भने आफ्नाे कोर टिमसँग छलफलमा छन् । त्यसमा नेम्वाङ सहभागी छैनन् । उनी बन्दसत्र हलमा कार्यक्रमको सुरुवात कुरिरहेका छन् । ‘म बन्दसत्र हलको कुनामा कार्यक्रम सुरु हुने पर्खाइमा छु,’ उनले भने ।

ओलीसँगको छलफलमा भने ईश्वर पोखरेल, शंकर पोखरेल, प्रदीप ज्ञवाली र पृथ्वीसुब्बा गुरुङ छलफलमा छन् । नेम्वाङले वरिष्ठ उपाध्यक्षमा आफ्नो अडान कायमै गरेका छन् । उनले ईश्वर पोखरेल २०३३ सालबाट राजनीतिमा आएको र आफू २०२८ सालबाट राजनीतिमा आएकाले आफू वरिष्ठ उपाध्यक्ष हुनुपर्ने तर्क उनले आफूनिकट नेताहरूसँग गरिरहेका छन् ।

नेम्वाङले आफूले पार्टीभित्र ओलीलाई मात्रै नेता मान्ने र बाँकीका लागि वरिष्ठ उपाध्यक्ष नछोड्ने बताइसकेका छन् । ओलीसँग पटक-पटक भएका वार्तामा नेम्वाङले वरिष्ठ उपाध्यक्षको दाबीबाट पछि नहट्ने अडान लिँदै आएका छन् । उनले शेरधन राईमार्फत ओलीलाई उनीबाहेक अरुलाई नेता मान्न आफू तयार नरहेको सन्देश पठाएका छन् । पृथ्बीसुब्बा गुरुङ, बसन्त नेम्वाङलगायतका जनजाति नेताहरूले ओलीलाई भेट गरेर कि नेम्वाङको नाममा सहमति गराउन वा त्यस पदमा चुनाव गराउन ओलीलाई सुझाव दिएका छन् ।

वरिष्ठ उपाध्यक्षमा विवाद भएपछि ईश्वर पोखरेलले यो पद सर्वसम्मतिमा बाधक बने खारेजीको सुझाव ओलीलाई पनि दिएका छन् । ‘यो पद नै सर्वसम्मतिका लागि बाधक हो भने यो पद खारेज गरिदिँदा हुन्छ । यसले एकताबद्ध एमालेमा बाधा नपुर्‍याओस्,’ ओलीलाई पोखरेलको सुझाव थियो ।

यता नेता भीम रावलले वरिष्ठ उपाध्यक्षको प्रस्ताव आयो भने पनि आफूले त्यस पद स्वीकार नगर्ने बताएका छन् । ‘मैले कुनै पद प्राप्तिका लागि बार्गेनिङ गरेको होइन । म अध्यक्ष उठ्छु, त्यसमा मनोनयन दर्ता गर्छु,’ उनले भने । एमालेभित्र देखिएका संगठनात्मक अराजकता, स्वेच्छाचारी चरित्र अन्त्यका लागि आफ्नो उम्मेदवारी रहेको उनले बताएका छन् ।

‘एमालेलाई लोकतान्त्रिक बनाउन हो । एमालेमा अहिले निस्कन सहज, पस्न गाह्रो परिस्थिति छ । पार्टीमा निस्कन गाह्र‍ो र पस्न सजिलो बनाउन मेरो उम्मेदवारी हो,’ रावलले भनेका छन् । सर्वसम्मतिका नाममा महाधिवेशन प्रतिनिधिलाई ६ घण्टादेखि अन्योलमा राखिएको भन्दै उनले आपत्ति पनि जनाएका छन् । गुट निर्माणका लागि सर्वसम्मतिको नाममा सूची तयार गरिएको उनको भनाइ छ ।

‘महाधिवेशन प्रतिनिधिलाई अन्योलमा राखेर गुटबन्दी गर्ने काम भएको छ म यसको विरोध गर्छु । यो निकै अनुचित काम हो । यो स्वेच्छाचारी चरित्रको म विरोध गर्छु,’ रावलले भनेका छन् । आफूनिकट नेता नेम्वाङले नै चुनौती दिएपछि ओलीलाई बढी सकस परेको हो । अहिले पनि उनी छलफलमै व्यस्त छन् । सहमतिमा नआउनेहरूका लागि उम्मेदवारी खुला रहेको कुरा नेता विष्णु पौडेलले बन्द सत्रमा शनिबार नै घोषणा गरेका थिए ।

निर्वाचनको पक्षमा हुनेहरूको नाम बन्दसत्रमै घोषणा गर्ने त्यहीँबाट प्रतिनिधिको मतका आधारमा टुंग्याउने विषयमा छलफल पनि भइरहेको छ । यो परिस्थिति आफूलाई मान्य नहुने र कडा प्रतिवाद गर्ने रावलको भनाइ छ ।

प्रकाशित मिति: आइतबार, मंसिर १२, २०७८ १८:३८