भीम रावललाई प्रश्न- सहमतिका लागि अध्यक्षले दूत पठाउनुभएको हो ?

A+ A A-

नेकपा एमालेका नेता भीम रावलले आफूलाई भेट्न केपी ओलीका कुनै प्रतिनिधि नआएको बताएका छन् । सर्वसम्मत नेतृत्व चयनका लागि वरिष्ठ उपाध्यक्ष बनाउने प्रस्तावसहित तपाईंलाई भेट्न ओलीले कोही प्रतिनिधि पठाउनुभएको हो भन्ने शिलापत्रको प्रश्नमा रावलले भने, 'मलाई भेट्न कोही आउनुभएको छैन । र, सँगसँगै मैले कुनै बार्गेनिङका लागि अध्यक्षमा दाबी प्रस्तुत गरेको होइन ।' उनले अध्यक्षको दाबेदारीबाट आफू पछि नहट्ने पनि बताए । ‘अध्यक्ष पदमा मेरो दाबी रहन्छ, म त्यो छोड्दिनँ,’ उनले भने । रावलसँग शिलापत्रका लागि शिशिर ढकाल र सागर चन्दले गरेको संक्षिप्त कुराकानी :

तपाईंसँग छलफल गर्न केपी ओलीले कोही प्रतिनिधि पठाउनुभएको हो ?

मलाई भेट्न कोही प्रतिनिधि आउनुभएको छैन । ओली र उहाँका कुनै प्रतिनिधिसँग छलफल भएको छैन ।

तपाईंलाई वरिष्ठ उपाध्यक्ष दिने विकल्पमा पनि कुरा भएको रहेछ । यो प्रस्ताव आएमा के गर्नुहुन्छ ?

मैले कुनै पनि पदमा बार्गेनिङका लागि अध्यक्षमा उम्मेदवारी दिएको होइन । म अध्यक्षमा मनोनयन दिन्छु । र, पछि हट्दिनँ ।

मनोनयन दर्ताभन्दा पनि उम्मेदवारको प्रस्ताव हलमै लगेर निर्णय लिने तयारी पनि छ नि ।

यो प्रक्रिया अलोकतान्त्रिक छ । मनोनयन दर्ता गराएर निर्वाचन हुनैपर्छ । यदि यस्तो तयारी छ भने म प्रतिवाद गर्छु ।

सहमतिका नाममा ६ घण्टादेखि बन्दसत्र अवरुद्ध छ नि ।

महाधिवेशन प्रतिनिधिलाई अन्योलमा राखेर गुटबन्दी गर्ने काम भएको छ म यसको विरोध गर्छु । यो निकै अनुचित काम हो । यो स्वेच्छाचारी चरित्रको म विरोध गर्छु ।

तपाईंको उम्मेदवारी के-का लागि ?

एमालेभित्र देखिएका संगठनात्मक अराजकता, स्वेच्छाचारी चरित्र अन्त्यका लागि हो । एमालेलाई लोकतान्त्रिक बनाउन हो । एमालेमा अहिले निस्कन सहज, पस्न गाह्रो परिस्थिति छ । पार्टीमा निस्कन गाह्र‍ो र पस्न सजिलो बनाउन मेरो उम्मेदवारी हो ।

प्रकाशित मिति: आइतबार, मंसिर १२, २०७८ १७:२७