एमालेमा तयार हुँदै सर्वसम्मतिको सूची, कार्यकर्तामा व्यग्र छटपटी

A+ A A-

शनिबारको बन्दसत्रले अध्यक्ष केपी शर्मा ओलीलाई पदाधिकारी र केन्द्रीय सदस्य घोषणा गर्ने जिम्मेवारी थमाएको छ । त्यसको सूची तयार गर्न पार्क सफारी होटलमा ओली, ईश्वर पोखरेल र विष्णु पौडेल छलफलमा जुटेका छन् । नेताहरूले घोषणाका लागि सूची तयार पार्दै गर्दा कार्यकर्तामा भने व्यग्र छटपटी देखिन्छ ।

केन्द्रीय सदस्यका आकांक्षीहरू होटल परिसरमा सूचीबारे चासो राख्दै कुरिरहेका छन् । ओलीको निगाहमा परिने हो कि होइन भन्ने संशय साथ बसिरहेका छन् । केन्द्रीय सदस्यकी आकांक्षी नविना लामा पनि त्यहीँ उपस्थित थिइन् । उनलाई अर्की आकांक्षी प्रभा कोइरालाले कटाक्ष गरिन्, 'अब तपाईंलाई त ढुक्कै छ होला नि, माथिसम्म राम्रै छ । आफ्नो त के हुने हो ठेगान छैन, नेताहरूले हुन्छ त भनिरहेका छन् ।'

प्रभा कोइरालाको टोलीसँग फोटो खिचाएर नविना लामा पृथ्वीसुब्बा गुरुङसँग गफिन थालिन् । गुरुङलाई फकाउँदै उनले भनिन्, ‘अब तपाईंहरूको ब्याक बोन हामी नै त हो नि, हामीलाई सहयोग नगरे कसलाई गर्ने ?’ लामालाई गुरुङले जवाफ फर्काए, ‘पहल भइरहेको छ, माथि सूची बन्दै छ, हेरौँ के हुन्छ ।’

ओली, पोखरेल र पौडेल होटलको दोस्रो तल्लामा रहेको कोठामा बसिरहेका छन् । उनीहरू बसेको कोठाको ढोकाबाहिर कार्यकर्ताको बाक्लै उपस्थिति छ । केन्द्रीय कमिटीमा पर्ने आकांक्षा तारादेवी राईको पनि छ । तर, सूचीमा परिने हो कि होइन भन्ने छटपटी प्रस्टै देखिन्थ्यो ।

‘३३ वर्षदेखि राजनीतिमा सक्रिय छु,’ उनले आफ्नो आकांक्षाकाे आधार प्रस्तुत गरिन्, ‘केन्द्रीय कमिटीमा पर्ने यो स्वर्णिम अवसर हो । माथि बनाइरहेको सर्वसम्मतिको सूचीमा परिने हो कि होइन,’ उनले संशय व्यक्त गरिन् ।

पार्क सफारी होटल परिसरमा उपस्थित अधिकांश प्रतिनिधि यस्तै संशयका साथ सूची कुरिरहेका छन् ।

शुक्रबार मध्यरातमा बसेको अन्तिम केन्द्रीय कमिटी बैठकले सर्वसम्मतका लागि भन्दै १९ जना पदाधिकारी बनाउने निर्णय गरेको थियो । त्यस्तै, ३ सय १ जना केन्द्रीय सदस्य हुने निर्णय गरेको थियो । एमालेमा हुने तीन उपमहासचिवमध्ये एक जना महिला हुनुपर्ने भन्दै महिला नेतृले बैठकस्थलमै गएर ध्यानाकर्षण गराइसकेका छन् । सात जना सचिवमध्ये दुई जना महिला हुनुपर्ने उनीहरूको माग छ । सर्वसम्मतिको सूचीमा आफ्ना मागहरू सम्बोधन हुन्छन् कि हुँदैनन् भनेर महिला नेतृहरू पनि शंका गरिरहेका छन् ।

‘महिलाहरूलाई खाना पनि ३३ प्रतिशत, कपडा पनि ३३ प्रतिशत लगाऊ भनेर जिस्काउँथे’, राईले भनिन्, ‘पार्टीको केन्द्रीय कमिटीलाई ३३ प्रतिशत महिला सहभागितासहितको बनाउने निर्णय त यसअघि नै भइसकेको छ । पदाधिकारीमा योग्य महिलाहरू हाम्रो पार्टीमा प्रशस्तै हुनुहुन्छ । सर्वसम्मतिको सूचीमा महिला अनुहार कति आउँछन् भनेर हामी कुरिरहेका छौँ ।’

भीम रावलले अध्यक्ष पदमा उम्मेदवारी दिने अडान कायमै राखेपछि सर्वसम्मतिबाट पदाधिकारी छान्ने ओलीको प्रयास सफल हुन सकिरहेको छैन । ओलीलाई आफूनिकटकै नेता व्यवस्थापनमा पनि सकस भइरहेको छ । ओली, पोखरेल र पौडेल सम्मिलित बैठकले समयमै सूची तयार पार्न नसक्दा बिहान ११ बजे सुरु हुने भनिएको बन्दसत्र अझै सुरु हुन सकिरहेको छैन ।

सर्वसम्मतिकै सूचीमा चित्त बुझाउने मनशाय बनाएकी शिवमाया तुम्बाहाम्फे सर्वसम्मत शैलीलाई पनि उन्नत लोकतन्त्रको प्रयास भनिरहेकी छिन् । ‘सर्वसम्मत सूचीमा असहमत हुनेहरूले त निर्वाचनमा जान सक्छन्,’ उनले भनिन्, ‘यसमा कसैलाई रोकतोक छैन ।’

५० लाख खर्च गरेर एमालेले विद्युतीय मेसिन ल्याएको छ । तर, भोटिङ भने बन्दसत्र हलमै गराउने तयारी छ । नेता शेरबहादुर तामाङ भन्छन्, ‘सर्वसम्मतिको सूचीमा असहमति जनाउनेहरूका लागि बन्दसत्रभित्रै भोटिङ हुनेछ । प्रतिनिधिहरूले हात उठाएर मतको संकेत गर्नुहुन्छ ।’

प्रकाशित मिति: आइतबार, मंसिर १२, २०७८ १२:१८