एमाले बन्दसत्रका दुई चेहरा: दुर्गा प्रसाईं र बसरुद्दिन अन्सारी

A+ A A-

हिजाे नारायणी किनारको खुलासत्रमा केपी ओलीको क्रेज जुन स्तरमा देखिन्थ्यो, सौराहाको बन्दसत्रमा दुर्गा प्रसाईंको क्रेज पनि सानोतिनो थिएन । फरक यत्ति हो, 'केपी ओली आई लभ यु' भन्ने समूह बसमा ओसार्न एमालेले जति खर्च गरेको थियो । 'दुर्गा प्रसाईं जिन्दावाद' भनाउन भने उनी आफैँले खर्चपानी पेलेका थिए ।

चिटिक्क परिधानमा सौराहास्थित एमाले दशौं महाधिवेशन बन्दसत्र परिसर होटल सेभेन स्टार छिर्नेबित्तिकै दुर्गा प्रसाईंलाई केही युट्युबेहरूले छाप्पछुप्प घेरिहाले । युट्युबेको स्वैच्छिक बन्धनमा २० मिनेटजति कैद हुन पाउँदा दुर्गा मखलेल थिए । त्यही छेकमा सेभेन स्टार छिरेका अर्का मेडिकल व्यवसायी बसरुद्दिन अन्सारीलाई भने कसैले पुछेन । बरु दुर्गाले छाडेर गएका युट्युबे भए ठाउँ उनी आफैँ लम्किए ।

कतिपयले कर्के नजर लगाए । क्यामराको फ्रेममै परिसकेपछि केहीले उनलाई प्रश्न नसोधिरहन पनि सकेनन् । 'तपाईं पनि केन्द्रीय सदस्य बन्दै हुनुहुन्छ ?' तपाईं पनि उठ्दै हुनुहुन्छ अरे हो ?'

बसरुद्दिनले मधेसमा केपी ओलीविरोधी हावा चलेका बेला आफूले खेलेको सक्रिय भूमिकाको चौखण्ड बखान गरे । प्रदेश २ को समयरेखालाई आफू एमालेको राजनीतिमा आउनुअघि र आएपछिको दुई खण्डमा विभक्त गरी हेरे । उनले भोजपुरी भाषामा एमालेविरुद्ध बनाइएका गीत सुनाए । अनि मधेसको आगो निभाउन आफूले निर्णायक काम गरेको फूर्ति लगाए ।

बाँकी युट्युबे पनि उनको बखान सुन्न छाडेर अन्तै छड्किइसकेका थिए । अन्तै पनि के भन्नु । अघिसम्म आफैँलाई अन्टसन्ट गफ दिइरहेका दुर्गा प्रसाई अलि पर्तिर ठूलै गोलो बनाएर सेल्फी खिचाइरहेका थिए ।

'लौ, म पनि यहीँ आएँ' भन्दै बसरुद्दिन त्यहीँ पुगे । सेल्फीहरूको फ्रेमभित्र उनी निसंकोच छिरे । तर युट्युबे र केही अनलाइन पत्रकारको फोकस भने दुर्गा प्रसाईंमाथि नै थियो । बसरुद्दिनले केही भन्न खोजे पनि आफू उनीहरूको प्राथमिकतामा नरहेको प्रष्टै बुझ्न पाए । विगतमा प्रचण्डले, हाल केपी ओलीले पोषित गरेका दुर्गा प्रसाईले यसअघि गोदावरी विधान महाधिवेशनमा अनौठो हिम्मत गरेका थिए । उनी एमालेको संगठित सदस्य त परै जा‌ओस्, साधारण सदस्यसमेत नबनी सिधै विधान महाधिवेशन प्रतिनिधि हान्दिएर गोदावरीस्थित एमाले सभाहलमा छिरेका थिए ।

'लाै मैले प्रतिनिधि कार्ड र फोटो पनि आफैँ छपाएर ल्याएको छु, अब यसलाई औपचारिक वैधानिकता दिने काम हजुरहरूको' भन्दै दुर्गा प्रसाईंले त्यसबेला महाधिवेशन व्यवस्थापकलाई नै छक्क पारिदिएका थिए । फर्जी कार्ड लगाइवरी उनी महाधिवेशनमा बसिरहे ।

अरुले ओलीलाई 'बा' भन्छन् । दुर्गाले 'हजुरबा ।' तिनै नवनियुक्त नातिले झापाको भव्य सभामार्फत् पार्टी प्रवेश पाए । ओली स्वयम् त्यहाँ उपस्थित थिए । रोचक के भने त्यसबेला 'दुर्गा प्रसाईं जिन्दावाद' नारा हलभित्रै गुन्जिएको थियो । भनौं, गुन्जाइएको थियो ।

ओली बसेको सौराहास्थित होटल पार्क सफारीमा आफ्ना लागि समेत रुम बुक गराइदिन दुर्गाले निकै प्रयास गरेका थिए । तर महेश बस्नेत, सर्वेन्द्र खनालहरूले त्यसो हुन दिएनन् । बार्दलीमा उभिएका केपी बालाई दुर्गाले भुइँबाटै स्वस्ति गरेर बिन्ती बिसाए, 'केन्द्रीय सदस्य लड्दै छु, आशिर्वाद दिनुपर्‍यो हजुरबा ।'

ओलीले जुँगामा ताउ लगाउँदै मुसुमुसु हाँसिरहे । कुनै शब्द झारेनन् ।

ओलीनिकट स्रोतका अनुसार दुर्गाले यो महाधिवेशनमा केन्द्रीय सदस्य भने कुनै हालतमा पाउने छैनन् । 'पछि छुट्टै मनोनीत हुनु बेग्लै कुरा हो, तर त्यो पनि सामान्यतयाः सम्भव नहोला,' ओलीनिकट एक नेताले शिलापत्रसँग भने ।

दुर्गाले केही मिडियासँग कुरा गर्ने क्रममा आफू विगतमा माओवादी केन्द्रमा रहेको तथा एकता प्रक्रियाका क्रममा एमाले आएकाले त्यसै मापदण्डका आधारमा केन्द्रीय सदस्य पाउनुपर्ने जिकिर गरेका छन् । आज (शनिबार) सेभेन स्टारस्थित बन्दसत्र परिसरमा उनले यो नयाँ तर्क झिकेका हुन् ।

दुर्गा प्रसाईंले त्यहाँ दाबी गरे, 'हिजो त्यत्रो जनसागर उर्लनुमा ओलीको मात्रै होइन । मेरो नि हात छ । मैले एमाले प्रवेश गरेपछि ओलीको क्रेज झन् बढेको छ। हिजो देखिहाल्नु भो । हुन त माधव र प्रचण्डको नि क्रेज बढ्ने थ्यो । तर के गर्नु, उनीहरूलाई नारायणकाजीले लगिहाले ।'

शनिबार दिनभरि दुर्गा प्रसाईंले अन्तर्वार्तामा भ्याइनभ्याइ भएको हाउभाउ देखाए । केही क्यामेरा म्यान उनको अघिपछि देखिइरहे । अनि केही भनिसक्ने बित्तिकै, 'कि कसो युवा मित्रहरू हो' भनी उनले भिडतिर सोधेझैँ गरिसक्न नपाउँदै 'हो, हो ।' 'दुर्गा प्रसाईं जिन्दावाद'को नारा लागिहाल्थ्यो ।

बसरूद्दिनकाे कथा पनि उही हाे । शैक्षिक शुल्कमा बेहिसाब लुट मच्चाउँदा चिकित्सा शिक्षा पढ्ने विद्यार्थीले वीरगञ्जमा आवाज उठाएथे । बसरूद्दिनका केटाहरूबाट ती विद्यार्थीहरू निर्घात कुटिए । एमाले र अरु कुनै पनि दलहरू बोलेनन् । दुर्गा प्रसाईंको बारे त थप चर्चा गरिराख्नै पर्दैन । प्रितम सुवेदीजस्ता नवोदित युवालाई छाला तीन इन्च सर्ने धम्कीदेखि दिनदिनै अश्लील बोलिराख्नुपर्ने दुर्गासँग विगतकालीन नेकपाको महान एकता गराउन चरेसको थालमा मार्सी धानको भात पस्केर दुई अध्यक्ष कमरेडहरूलाई खुवाएको रेकर्ड छ । उनलाई छुने कल्ले ?

आज पनि उनले युट्युबेहरूकाे माझमा उभिएर कांग्रेस नेता गगन थापालाई तथानाम गरिरहेथे । गगनलाई प्रश्न उठाउन नपाइने हाेइन, पाइन्छ । तर, प्रश्न उठाउनेकाे धरातल विवादास्पद रहेकाे हेक्का सञ्चारमाध्यमलाई पनि हुनुपर्छ । प्रश्नकर्ता स्वयम् प्रश्नैप्रश्नले घेरिएकाे पात्र हाे भन्ने हेक्का हुनैपर्छ । नत्र तिखाे हेडलाइन र थम्बनेलका पछि कुद्ने हुँदा विश्वसनीयता रसातलमा भासिन पुग्छ । दुर्भाग्य, तिनले दुर्गालाई प्रश्नविहीन भएर पन्छिन माैका दिए ।

दिपकप्रकाश भट्टजत्तिका स्वच्छ, अनि प्राज्ञिक सांसदसम्मले आफ्नो राजनीतिक अडानका लागि संघर्ष गर्न बाध्य भएकाे दुःख बेसाउँदै गरेका बेला, अनि केन्द्रीय सदस्य हुन माथापच्ची गर्दै रहेका बेला दुर्गा प्रसाईंदेखि बसरुद्दिन अन्सारीसम्म जाेडताेडका साथ अघि सरेका छन् । माेतीलाल दुगडलगायत पहुँचवाला व्यापारी बन्दसत्र हलभित्र केन्द्रीय सदस्य हुन भाैतारिइरहेका छन् । उनलाई पनि केन्द्रीय सदस्य बन्रु छ, मधेसी काेटाबाट । शिलापत्रसँग उनले याे कुरा खुलेरै भने ।

१३ वर्षअघि आठौँ महाधिवेशनको उद्घाटनसत्रमा तत्कालीन महासचिव झलनाथ खनालले बुटवलको तिनाउ नदीबाट गुट बगाउने घोषणा गरेका थिए । उनी त्यसै महाधिवेशनबाट एमालेको पहिलो निर्वाचित अध्यक्ष भए । गुट भने झन् झाँगिदै गएथे ।

ओलीले याे महाधिवेशनस्थलबाट एमालेमा गुट नरहेको घोषणा गरेका छन् । यसै पनि माधव नेपाल र तिनै झलनाथ पार्टीबाटै बाहिरिइसकेका जो छन् । महाधिवेशनजस्ताे महाभेलामा राजनीतिक प्रश्नहरू अचानक म्युट माेडमा बस्न गएका छन् । केवल तालीहरू निरन्तर छन् । विचार समूहहरू नेपथ्यमा चुप छन् । यस्तैमा दुर्गा र बसरुद्दिनहरूकाे अस्वभाविक हालीमुहाली बढ्दाे छ । देशभरिबाट एमालेमा सिंगो जीवन लगानी गरेका प्रतिबद्ध नेता-कार्यकर्ताहरूको बीचमा यी दुईवटा अमिल्दा अनुहारहरू कहाँबाट कसरी पसे होलान् ?

के यो एमालेमा गुट सकिने, गिरोह सुरु हुने कालखण्डको सुरुवात हुन लागेको संकेत त होइन ?

प्रकाशित मिति: शनिबार, मंसिर ११, २०७८ २१:१९