बन्दसत्रबाट ओलीको सन्देश: पार्टीमा प्रतिस्पर्धा होइन समझदारी, एमाले प्रतिपक्षीबाट छिट्टै सत्ताधारी

बन्दसत्रबाट ओलीको सन्देश: पार्टीमा प्रतिस्पर्धा होइन समझदारी, एमाले प्रतिपक्षीबाट छिट्टै सत्ताधारी

A+ A A-

नेकपा एमालेका अध्यक्ष केपी शर्मा ओलीले १०औँ महाधिवेशनमा प्रतिस्पर्धा रोक्ने प्रस्ट सन्देश दिएका छन् । विभाजनको अवस्थाबाट पार्टी गुज्रिएकाले त्यसलाई थप मजबुत बनाउन पार्टीभित्र सबैले भावनात्मक एकता देखाउन जरुरी रहेको ओलीले बताएका छन् ।

वडा र पालिकादेखि महाधिवेशन प्रतिनिधिसम्म सर्वसम्मत रूपमा चयन भएको दृष्टान्त प्रस्तुत गर्दै अध्यक्ष ओलीले निर्वाचनलाई निरुत्साहित गरिने सन्देश प्रवाह गरे । 'म अध्यक्षका रूपमा भन्न चाहन्छु प्रतिपक्षसँग मात्रै प्रतिस्पर्धा हुन्छ । पार्टीभित्र सहमति र समझदारी कायम गरेर अघि बढ्नुपर्छ,’ ओलीले भने ।

अध्यक्ष ओलीले पार्टीमा समझदारी नै उत्तम लोकतान्त्रिक प्रणाली रहेको बताउँदै कामको मूल्यांकन र क्षमताका आधारमा नेतृत्व चयन हुने पनि बताए । ‘पार्टीलाई एकताबद्ध र अनुशासित बनाउन यो महाधिवेशनले नेतृत्व चयन गर्नेछ । पार्टीभित्र मूल्यांकनको आधारमा समझदारी कायम गरिनेछ,’ उनले भने ।

पार्टी चौतर्फी घेराबन्दीमा परेको समयमा कार्यकर्ताले देखाएको एकताबाट पार्टी सुदृढ भएको भन्दै उनले समझदारीमार्फत नेतृत्व चयन भएमा एमाले अझै सुदृढ हुने बताए । ‘तपाईंहरूले संकटमा परेको पार्टीलाई जुरुक्कै उठाउनुभयो । मजबुत बनाउनुभयो । अझै एकताबद्ध बनाउन मद्दत गर्नुहुनेछ भन्नेमा म ढुक्क छु,’ ओलीले भने ।

अध्यक्ष ओलीले सर्वसम्मत नेतृत्व चयनको उद्देश्यसहित पदाधिकारीको संख्या १९ पुर्‍याएका थिए भने केन्द्रीय कमिटीको संख्या पनि बढाएका थिए । आफू सर्वसम्मत हुनका निम्ति ओलीले केन्द्रीय कमिटीको संख्या बढाएको भीम रावल र घनश्याम भुसालको निष्कर्ष छ । सर्वसम्मत रूपमा नेतृत्व चयनका निम्ति ओलीनिकट नेता सुवास नेम्वाङ नै चुनौतीपूर्ण देखेपछि ओलीले उनलाई फकाउने कोसिस गरेका थिए । बन्दसत्र हलमा प्रवेश गर्नुअघि ओलीले नेम्वाङसँग छलफल गर्दै भनेका थिए, ’राजकीय पदमा हुनुपर्ने तपाईं पार्टीको पदाधिकारीमा दाबी नगर्नुस् तपाईं राष्ट्रपति हुनुपर्छ ।’

ओलीको प्रस्तावलाई अस्वीकार गर्दै नेम्वाङले विगतमा आफूले उनलाई सहयोग गरेकाले ओलीले आफूलाई सहयोग गर्नुपर्ने बताए । ओलीलाई उनले भने, ’म पार्टीको पदाधिकारीकै हैसियतमा काम गर्न चाहन्छु । राष्ट्रपतिको कुनै सपना छैन ।' राष्ट्रपतिका लागि जनमतको जिम्मा चाहिँ कसले लिन्छ ?’ उनको ओलीलाई प्रश्न थियो । सहमतिमा नेतृत्व चयनका लागि ओलीनिकट नेम्वाङ र विष्णु पौडेल नै ओलीका लागि चुनौती बनेका छन् ।

ईश्वर पोखरललाई वरिष्ठ उपाध्यक्ष र शंकर पोखेरललाई महासचिव दिने तयारी भएपछि त्यसलाई रोक्न नेम्वाङ र पौडेल समूह बन्ने पक्कापक्की छ । यसप्रति नेम्वाङले भने, 'हाम्रोमा प्यानल नै बनाएर जाने कुरा निषेध छ तर मन मिल्ने साथीहरू एक ठाउँमा उभिने कुरा स्वभाविक छ।’

एमाले अब छिट्टै सत्ताधारी

एमालेले एक्लै निर्वाचन लड्ने समार्थ्य राख्नुपर्ने भन्दै उनले त्यसका लागि तयार हुन उनले कार्यकर्तालाई निर्देशन दिएका छन् । 'अरु गठबन्धन बनाएर चुनाव लड्ने बताइरहेका छन् । हामी एक्लै चुनाव लड्न सक्षम छौँ । जहाँ सक्षम छैनौँ जस्तो लाग्छ त्यहाँ पनि अब सक्षम बनाउनुपर्नेछ, एकल निर्वाचन लड्न पार्टीलाई बलियो बनाउनुस्,' उनले भने ।

अध्यक्ष ओलीले पार्टी प्रतिपक्षको भूमिकामा रहेको भन्दै अबको निर्वाचनपछि फेरि सत्तामा पुग्ने दाबी गरे । मुलुकको समृद्धिको सपना साकार पार्न पनि एमाले सत्तामा पुग्न जरुरी रहेको उनको भनाइ थियो । पार्टीभित्रका षड्यन्त्रकारीहरूको जालझेलले एमाले प्रतिपक्षी कित्तामा पुगेकाले आफ्ना कमीकमजोरी सुधार गर्दै एमाले आगामी निर्वाचनबाट सत्तामा आउने उनले बताएका हुन् ।

‘राज्यसंयन्त्र नै हामीविरुद्ध प्रयोग हुँदा र पार्टीभित्रका षड्यन्त्रकारी शक्तिका कारण हामी प्रतिपक्षी भूमिकामा पुग्यौँ । अब निर्वाचनमार्फत फेरि हाम्रो सत्तामा उदय हुनेछ,’ ओलीले भने । विधान महाधिवेशनबाट पारित भएका नीति र राष्ट्र निर्माणको सपना पूरा गर्न एमालेले बहुमत ल्याउनुपर्ने उनको भनाइ थियो । उनले लोकतान्त्रिक प्रणालीलाई मजबुत बनाउन पनि एमालेको विजय आवश्यक रहेको बताए । न्यायालयको विषयमा टिप्पणी गर्दै उनले न्यायालय सही रूपमा नचले लोकतान्त्रिक प्रणाली नै धरापमा पर्ने टिप्पणी गरेका छन् ।

शक्ति पृथकीकरणको सिद्धान्त अनुसार न्यायालय सञ्चालन नभए लोकतान्त्रिक प्रणाली नै असफल हुने उनले बताए । ‘न्यायालयको स्थिति सच्याउन सकेनौँ भने शक्ति पृथकीकरणको सिद्धान्त अनुसार न्यायालयको मर्यादा बचाउन सकेनौँ भने अदालत निष्प्रभावी हुन्छ र लोकतान्त्रिक प्रणाली नै असफल हुन्छ,’ उनले भने ।

पार्टी बलियो रहेको पुष्टि गर्न १०औँ महाधिवेशन सफल

अध्यक्ष ओलीले एमाले बलियो रहेको सन्देश प्रवाह गर्न उद्घाटन समारोह सफल रहेको बताए । पार्टी चौतर्फी घेराबन्दीमा परेको समयमा कार्यकर्ताहरूको उपस्थितिका कारण एमाले कमजोर बनेको हल्ला गलत सावित गरिदिएको ओलीको टिप्पणी थियो ।

‘पार्टी ध्वस्त भएका बेला तपाईंहरूले एमाले कमजोर बनेको कुरा क्षणिक हो भन्ने पुष्टि गरिदिनुभयो म निकै उत्साहित छु,’ ओलीले भने । विभाजनकाबीच कार्यकर्ताहरूको उपस्थितिले एमालेले नै फेरि समृद्धिको यात्रा अघि बढाउने विषयमा आफू ढुक्क रहेको ओलीले बताए ।

एमालेको बन्दसत्रले विधान महाधिवेशनले पारित गरेका नीति कार्यक्रम पारित गर्दै पार्टीलाई आन्तरिक रूपमा बलियो बनाउने ओलीको विश्वास छ । ‘अब पार्टी आन्तरिक रूपमा बलियो हुँदै मुलुकका राजनीतिक समस्याको समाधानका लागि अग्रसर हुनेछ । त्यसका लागि १०औँ महाधिवेशन सही नेतृत्व निर्माण गर्न सफल हुनेछ,’ उनले भने ।

१०औँ महाधिवेशन एमालेलाई एकताबद्ध र अनुशासित बनाउन सफल हुने उनको विश्वास थियो । यो महाधिवेशनबाट राजनीतिक विसंगतिलाई सु-बाटोमा ल्याउन सक्ने नेतृत्व निर्माण एमालेले गर्ने ओलीको भनाइ थियो ।

प्रकाशित मिति: शनिबार, मंसिर ११, २०७८ १८:४२