वरिष्ठ उपाध्यक्ष उठ्दा मलाई भोट नदिने पनि कोही होलान् र ?: सुवास नेम्वाङ (अन्तर्वार्ता)

वरिष्ठ उपाध्यक्ष उठ्दा मलाई भोट नदिने पनि कोही होलान् र ?: सुवास नेम्वाङ (अन्तर्वार्ता)

A+ A A-

एमालेको १०औँ महाधिवेशन सुरु हुन एक दिनमात्रै बाँकी छँदा अध्यक्षदेखि केन्द्रीय सदस्यसम्मका आकांक्षीले आफ्नो उम्मेदवारी घोषणा गर्न थालेका छन् । उपाध्यक्ष भीम रावलले अध्यक्षमा उठ्ने यसअघि नै घोषणा गरिसकेका थिए भने चितवन योगेश भट्टराईले सचिवमै दोहोर्‍याउने घोषणा गरेका छन् । अध्यक्ष केपी शर्मा ओलीनिकट युवा नेताहरू भानुभक्त ढकाल, महेश बस्नेत, गोकुल बाँस्कोटालगायतले सचिवमा उठ्ने घोषणा गरिसकेका छन् । महाधिवेशनमा भाग लिन चितवन पुगेका नेताहरूले भोट पनि माग्न थालिसकेका छन् । अध्यक्ष ओलीनिकट मानिएका संसदीय दलका उपनेता सुवासचन्द्र नेम्वाङले पनि वरिष्ठ उपाध्यक्षमा आकांक्षा देखाएका छन् । तर, औपचारिक घोषणा भने गरिसकेका छैनन् नेम्वाङले । एकताको महाधिवेशन भनिएको दशौँ महाधिवेशन र उनको उम्मेदवारीका विषयमा केन्द्रित गरेर नेम्वाङसँग शिलापत्रले गरेको कुराकानीको सम्पादित अंश:

महाधिवेशन सुरु हुन एक दिनमात्रै बाँकी रहँदा पनि नेताहरू उम्मेदवारी घोषणा गर्न हच्किएको देखिन्छ । ढिलै भए पनि तपाईंले वरिष्ठ उपाध्यक्षमा आफ्नो दाबेदारी प्रस्तुत गर्नुभएको छ । तपाईंको दाबेदारी केपी ओलीको ग्रीन सिग्नल पाएपछिको हो कि नपाएपछिको ?

म अहिले पनि सहमतिकै महाधिवेशनको पक्षमा छु । त्यसैले नेतृत्व चयनमा अधिकतम सहमतिको प्रयास हुन्छ र त्यो जारी नै छ । सहमति भएन र निर्वाचन हुने स्थिति सिर्जना भयो भने साथीहरूले मलाई वरिष्ठ उपाध्यक्ष ठीक हुन्छ भनेर सुझाव दिएका छन् । त्यसो परिस्थिति सिर्जना भयो भने मैले वरिष्ठ उपाध्यक्षमा उम्मेदवारी दिन्छु । तर, यसको औपचारिक घोषणा भने अझैसम्म गरिसकेको छैन । दाबेदारी प्रस्तुत गर्न मैले अध्यक्ष ओलीको ग्रीन सिग्नल कुरेको थिइनँ । मलाई गुटबन्दीमा विश्वास छैन । विगतमा मैले केपी ओलीलाई सहयोग गरेकै हो । तर, म कुनै गुटमा थिइनँ र आज पनि छैन । मेरो एउटा मात्रै गुट भनेको एमाले हो । अहिले म केपी ओलीको गुटमा पनि छैन । त्यसैले मैले उपयुक्त समय कुरेको हुँ, अध्यक्ष ओलीको ग्रीन सिग्नल होइन ।

वरिष्ठ उपाध्यक्ष पद ईश्वर पोखरेलका लागि सिर्जना गरिएको हो भन्ने चर्चा छ । त्यही पदमा तपाईंको दाबी हस्तक्षेप ठहर्दैन ?

यो विधान महाधिवेशनमा लोकतान्त्रिक प्रक्रियाबाट गरिएको निर्णय हो । विधान महाधिवेशनमा छलफलपछि वरिष्ठ उपाध्यक्ष पद थप्ने निर्णय भएको हो । अस्ति भर्खर मात्रै अध्यक्ष ओलीले सर्वसम्मति वा लोकप्रिय मतसहित आएको आएको व्यक्ति नै मेरो निकटको मान्छे हुनेछ भनेर भन्नुभएको छ । अहिले केपी कमरेडले कसैलाई पनि तिमी यो पदमा उठ् वा तिमी यो पदमा नउठ भनेर भन्नुभएको छैन । तिमी यसो गर न भनेर पनि भन्नुभएको छैन । कतिपय साथीहरूले त्यो पद त मेरा लागि हो नि भनेर प्रचारप्रसार गरेका छन् । यो कुरा अध्यक्षले पनि सुन्नुभएको छ । सञ्चारमाध्यमका कुराहरू मसिनोसँग सुन्ने व्यक्तिमा उहाँ पर्नुहुन्छ । यही थाहा पाएर उहाँले तपाईंहरूमार्फत मेरो मान्छे कोही छैन, जो बढी मत ल्याएर जितेर आउँछ त्यो नै मेरो मान्छे हो भनेर प्रस्ट पारिसक्नु भएको छ ।

तपाईं १०बुँदे सहमतिपछि एमालेमै रहेका 'दश भाइ'को समूहको मत पाउनेमा कत्तिको विश्वस्त हुनुहुन्छ ?

म विगतदेखि नै पार्टी एकताको पक्षमा थिएँ । त्यही अनुरुप पार्टीका सबै साथीहरूसँग मेरो राम्रो सम्बन्ध छ । कसैसँग नराम्रो छैन । त्यसैले निर्वाचन प्रक्रियामा प्रवेश गर्‍यो र म उम्मेदवार भए भने मलाई मत नहाल्ने त को होला र !

अध्यक्षमा केपी ओलीलाई भीम रावलले चुनौती दिँदै हुनुहुन्छ । वरिष्ठ उपाध्यक्षमा तपाईं र ईश्वर पोखरेल अनि महासचिवमा पनि तीन जनाको दाबेदारी छ । यसरी हेर्दा सहमतिको महाधिवेशन हुने संकेत त देखिँदैन नि ?

केपी ओलीलाई सर्वसम्मतिले नेतृत्व चयन गरौँ भन्ने पक्षमा म लागिरहेको छु । उद्घाटन सकिएपछि पनि हामी सहमतिका लागि प्रयत्न गर्नेछौँ । त्यसैले अझै पनि सहमति हुन्छ भन्नेमा म आशावादी छु । अध्यक्षसहितका सबै पदमा सहमति भयो भने सहमतिका लागि बज्ने थपडीमा एउटा थपडी मेरो पनि हुनेछ ।

महाधिवेशनको मुखमा आएर ओली समूहभित्र पनि विभाजन हुने संकेत देखियो हैन?

राजनीतिमा यो स्वभाविक हो । यसमा अचम्म मान्नु पर्दैन । विचारका आधारमा विभिन्न समयमा विभिन्न व्यक्ति भिन्नभिन्न समूहमा देखिन्छन् । बाहिरबाट हेर्दा अलग भएजस्तो देखिन्छ । पार्टीभित्र पनि विचार भिन्न हुनेबित्तिकै छुट्ट्याइदिने गरेको देखिन्छ । तर, म मत वा विचार छुट्टै हुनेबित्तिकै हामी छुट्टाछुट्टै भयौं भनेर मान्दिनँ ।

तपाईंहरूले यो महाधिवेशनलाई एकताको महाधिवेशन भन्नुभएको छ । तर, सबैलाई समेट्न नसक्दा कतै यो विभाजनको महाधिवेशन त हुँदैन नि ?

राजनीतिमा सम्भावनाहरू धेरै हुन सक्छन् । तर, विभाजन हुन नदिन हामी निरन्तर प्रयासरत छौँ । त्यसका लागि पनि यो बेलामा हामीले सर्वसम्मत नेतृत्व चयन गरेर सबैको भावना समेटिएको सन्देश दिन सक्नुपर्छ ।

हेर्नुस् नेम्वाङसँग गरिएको भिडियो वार्ता :