स्थानीयले विदेशी कामदारलाई कुटेपछि माथिल्लो त्रिशुली १ को काम रोकियो

A+ A A-

५ मंसिरमा माथिल्लो त्रिशुली जलविद्युत्‌ आयोजनाको काममा व्यस्त रहेका विदेशी नागरिकहरूले एकाएक स्थानीयको कुटाइ खानुपर्‍यो । हेलमेटसहित आएका रसुवाको मैलुङ गाउँपालिका– २ का स्थानीय युवाहरू काममा खटिएका चिनियाँ नागरिहरूप्रति जाइलागेको देखिन्छ ।

माथिल्लो त्रिशुली-१ मा काम नदिएको भन्दै विदेशी लगानीमा रसुवामा बनिरहेको आयोजनामा कोरियन ठेकेदारमाथि स्थानीय युवाहरूद्वारा आक्रमण pic.twitter.com/yMinFxacXd

— kiran joshi (100% Follow Back) (@kiranjoshi235) November 22, 2021

माथिल्लो त्रिशुली १ जलविद्युत्‌ आयोजनाका अनुसार स्थानीयको कुटाइका कारण चार जना घाइते भएका छन् । तर, रसुवा प्रहरी कार्यालयले भने एक जना मात्र घाइते भएको जनाएको छ । यद्यपि स्थानीयको त्रासले काम अवरोध भएको छ ।

गत भदौमा २१६ मेगावाटको सो आयोजना सुरु भएसँगै स्थानीयले विभिन्न नाममा काममा अवरोध गरिरहेको आयोजनाको गुनासो छ । यो आयोजना कोरियन लगानीमा निर्माण भइरहेको हो भने यसको सहायक कम्पनी चाइनिज कम्पनीहरू छन् ।

यो आयोजना करिब ५३ अर्ब वैदेशिक लगानी सम्झौता भएको र निजीक्षेत्रबाट निर्माण सुरु भएको सबैभन्दा ठूलो आयोजना हो ।

किन भयो झडप ?

आयोजनाका प्रवक्ता गणेश न्यौपानेका अनुसार झगडाको कारणका विषयमा अध्ययन भइरहेको छ । उनले शिलापत्रसँग भने, ‘किन यस्‍तो घटना हुन पुग्यो, हामी आफैँ अनभिज्ञ छौँ, एकपक्षीय कुरा राखेर भएन । हामीले दुवै पक्षसँग कुरा गरेर यसको कारण खोज्छौँ । यस विषयमा केही भन्न सकिँदैन । तर जे भयो, राम्रो भएन ।’

रसुवा प्रहरी प्रमुख देवेन्द्र पाण्डेका अनुसार स्थानीयले आफूसँग भएको निर्माण सामग्री प्रयोग गरिनुपर्ने, आफूहरूलाई काम दिनुपर्ने माग राखेर कार्यस्थलमा अवरोध गर्दै आएका थिए ।

‘वडा नम्बर २ का स्थानीयले आफूहरूसँग भएका स्क्याभेटर प्रयोग गरिनुपर्ने, आफूहरूलाई काम दिइनुपर्ने र आयोजना प्रभावितको सूचीमा राखिनुपर्ने माग राखेका रहेछन्,’ पाण्डेले भने, ‘माग सुनुवाइ नभएपछि काम अघि बढ्न दिँदैनौँ भनेर स्क्याभेटरको चाबी खोस्ने क्रममा झगडा भएको पाइयो ।’

उनका अनुसार यसभन्दा अघि मैलुङ जलविद्युत्‌ आयोजनामा पनि यस्तै समस्या सिर्जना गरिएको थियो । आयोजनाले मैलुङ– १ का स्थानीयलाई आयोजना प्रभावितको सूचीमा राखेको छ तर वडा २ लाई पनि प्रभावितको सूचीमा राखेर राहतको व्यवस्था गरिनुपर्ने माग राख्दै आएका थिए । माग पूरा नभएको भन्दै स्थानीय काममा खटिएका चाइनिज नागरिकका विरुद्ध जाइलागेका हुन् ।

रोकियो काम

सन् २०१२ मा नै लाइसेन्स प्राप्त गरेर पनि आयोजनाको काम अघि बढ्न सकेको थिएन । सन् २०१९ मा नै आयोजना सम्पन्न गर्नुपर्नेमा विभिन्न अवरोधका कारण समयमै निर्माणको काम अघि बढ्‍न सकेको थिएन ।

२०२१ अगस्टदेखि मात्रै काम सुरु भएको आयोजनामा सुरुदेखि नै विभिन्न किसिमका अवरोधहरू आएको आयोजनाका अधिकारीहरूको गुनासो छ ।

५ मंसिरको झडपपछि अहिले काममा अवरोध भइरहेको छ । स्थानीयको त्रासमा उनीहरू क्याम्प छोडेर बाहिर ननिस्किएको प्रहरीले जनाएको छ ।

कानुनविद् विपिन अधिकारी यही कुटपिटका आधारमा कोरियन कम्पनीले करोडौँ डलर माग गरेर मुद्दामा जान सक्ने र नेपालमा विदेशी लगानी निरुत्साहित हुने तर्क गर्छन् ।

प्रकाशित मिति: बुधबार, मंसिर ८, २०७८ १७:५९