केको उम्मेदवारी फिर्ता, ओलीलाई हराएर देखाउँछु: भीम रावल (अन्तर्वार्ता)

A+ A A-

एमालेको दशौँ राष्ट्रिय महाधिवेशन १०-१२ मंसिरमा चितवनमा हुँदैछ । दशबुँदे सहमति गरेर एमालेमै फर्किएका 'दश भाइ' सँगै माओवादी केन्द्रबाट आएका नेताहरूको व्यवस्थापन चुनौतीपूर्ण छ । महाधिवेशन सुरु हुन दुई दिन मात्रै बाँकी रहँदा पनि धेरै नेताहरूले आफ्नो उम्मेदवारी घोषणा गरिसकेका छैनन् । अध्यक्ष केपी शर्मा ओलीले 'ग्रीन सिग्नल' दिएपछि आफ्नो उम्मेदवारी घोषण गरौँला भनेर बसेका नेताहरू पनि मौन छन् । महाधिवेशनबाट केपी शर्मा ओली सर्वसम्मत अध्यक्ष बन्ने अपेक्षा गरिएको थियो । तर, सर्वसम्मत हुने ओलीको त्यो चाहना पूरा नहुने लगभग निश्चितप्राय: छ । उपाध्यक्ष भीम रावलले अध्यक्षमा उम्मेदवारी दिने औपचारिक रूपमा घोषणा गरिसकेका छन् । र, सँगसँगै उनले अध्यक्षको दावेदारीबाट पछि नहट्ने बताइसकेका छन् । एमालेको दशौँ महाधिवेशन, अध्यक्षको उम्मेदवारी घोषणालगायतका विषयमा केन्द्रित रहेर शिलापत्रका लागि भीम रावलसँग केशवराज जोशीले गरेको अन्तर्वार्ताको सम्पादित अंश:

अध्यक्षमा तपाईंको उम्मेदवारी चुनाव लड्नकै लागि हो कि रहर पूरा गर्न मात्रै ?

पत्रकार साथीहरूले नै मेरो उम्मेदवारीबारे यस्तो प्रश्न सोध्दा मलाई आश्चर्य लाग्छ । यो प्रश्न सोध्दै गर्दा प्रश्नकर्ताले एमालेमा मेरो योगदानको अध्ययन गर्नुभएको छैन कि जस्तो लाग्छ । म अहिले उपाध्यक्ष हो भन्ने कुरा बिर्सिनुभयो कि जस्तो लाग्छ । अध्यक्षमा मेरो स्वाभाविक उम्मेदवारी हो र जित्नकै लागि मैले उम्मेदवारी दिने निर्णयमा पुगेको हुँ ।

तपाईंको उम्मेदवारी बार्गेनिङका लागि मात्रै त होइन नि ?

नेपालको राजनीतिमा थुप्रै किसिमका विकृति र विसंगतिहरू छन् । त्यसैले यस्ता आशंका हुनु स्वाभाविककै हो । कतिपय व्यक्तिहरू पदलाई मात्रै केन्द्रमा राखेर राजनीति गर्छन् । देशको हित, देशको स्वाधीनता, स्वतन्त्रता, अखण्डता, नेपाली जनताका अधिकार, राष्ट्रका चुनौती, स्वतन्त्रता, सार्वभौम स्वायत्तताका आधारमा आफ्ना कुरा राख्नेजस्ता कुरालाई महत्त्व नदिई निर्वाचन, पद आफ्नो स्वार्थलाई मात्रै प्रधान ठान्ने संस्कृति भएकाले यस्ता आशंका हुनु स्वाभाविक हो । तर, मेरो हकमा त्यो लागू हुँदैन । विगतदेखि अहिलेसम्म मैले जे कुरा भनेको छु, त्यही गरेको छु । मैले जे कुरा गर्न खोजेको छु, त्यही कुरा बोलेको छु । त्यसकारण मैले दशौँ महाधिवेशनमा आफ्नो उम्मेदवारी घोषणा गर्दा त्यसका लक्ष्य, उद्देश्य, मान्यतासहित ठूलो जनमानसका सामु घोषणा गरेको छु । अझै कहीँकतै भ्रम छ भने पनि म साँच्चैको उम्मेदवार हो भनेर बुझिदिन सबैलाई अनुरोध गर्छु ।

तपाईंसँग उम्मेदवारी घोषणा गर्ने थुप्रै आधारहरू होलान्, तर जित्ने आधारचाहिँ के-के छन् ?

अवश्य छन् । बिनाआधार कसले उम्मेदवारी घोषणा गर्छ र ? मैले जितको आधार भएर नै उम्मेदवारी घोषणा गरेको हुँ । पार्टी निर्माणमा, लोकतन्त्रको लडाइँमा, राष्ट्रियताको सवालमा मैले काम गरेको छु । पार्टी, मुलुक र जनताको पक्षमा निरन्तर आफ्नो निष्ठामा रहेर काम गर्दै आएको छु । मैले पार्टीमा विभिन्न भूमिकामा रहेर उल्लेख्य योगदान पुर्‍याउँदै आएको छु । मेरो जितका मुख्य आधारहरू यिनै हुन् ।

निर्वाचनमा कति मत ल्याउनुहोला ?

त्यो त तपाईंले मूल्यांकन गर्ने विषय हो । तर, आजसम्म म हरेक पदमा निर्वाचित भएरै आएको हुँ । त्यसैले यो पटक पनि निर्वाचित हुन्छु भन्ने आत्मविश्वास छ ।

तपाईंलाई निर्वाचनमा हामी सहयोग गर्न तयार छौँ भन्ने कुनै प्रभावशाली नेताहरूले आश्वासन दिएका छन् ?

मलाई महाधिवेशनमा साथ दिन्छौँ भन्ने ठूलो नेता र कार्यकर्ताहरूको पङ्क्ति छ । सहयोगीहरू नभई उम्मेदवारी घोषणा गर्ने कुरै आउँदैन नि । पार्टीमा मेरो योगदानका आधारमा, राष्ट्रिय स्वाधीनताको पक्ष र लोकतन्त्रको लडाइँमा मैले निर्वाह गरेको भूमिकाका आधारमा साथीहरूले मलाई मतदान गर्नुहुनेछ भन्ने आशा लिएको छु । तर, मलाई क-कसले आश्वासन दिए भनेर सार्वजनिक रूपमा भन्नु उपयुक्त हुँदैन । यो व्यक्ति-व्यक्तिबीचको आपसी समझदारीको कुरा हो ।

उम्मेदवारी घोषणा गरेपछि तपाईंले अध्यक्ष केपी ओलीसँग कुनै कुराकानी गर्नुभएको छ ?

हिजो उहाँसँग स्थायी कमिटीको बैठकमा भेटघाट भएको हो । तर, त्यहाँ व्यक्तिगत कुराहरू भएनन् । स्थानीय तहमा भएका अधिवेशनमा जुन किसिमका अराजकता र धाँधलीका घटना भएका छन्, तिनका विषयमा बैठकमा मैले प्रश्न उठाएको थिएँ । ती घटनाको निष्पक्ष छानबिनको माग गरेको थिएँ । अध्यक्षले पनि महाधिवेशनलाई सम्पूर्ण रूपमा विवादरहित बनाउने आश्वासन दिनुभएको थियो । यो संवादबाहेक अध्यक्षसँग छुट्टै छलफल भएको छैन ।

अध्यक्षमा मलाई विजयी गराउनुस् अध्यक्षज्यू भनेर पार्टी अध्यक्ष ओलीसँग भोट माग्न जानुहुन्छ कि जानुहुन्न ? माग्नुहुन्न ?

उहाँसँग मैले भोट मागिसकेको छु । हिजो (मंगलबार) स्थायी कमिटीमै मैले मेरो उम्मेदवारीको विषयमा प्रस्ट पार्दै त्यहाँ उपस्थित पार्टीका सबै साथीहरूलाई मलाई भोट दिनुहोला भनेर औपचारिक रूपमै अनुरोध गरिसकेको छु ।

निर्वाचन निष्पक्ष हुनेमा कत्तिको विश्वस्त हुनुहुन्छ ?

देशका विभिन्न भागमा जुन किसिमका परिदृश्य देखिएका छन्, तिनले आशंका उत्पन्न गराएको छ । तर, पार्टी अध्यक्षले स्थायी कमिटीमा यो महाधिवेशनलाई विवादरहित बनाउँछु भनेर आश्वस्त तुल्याउनुभएको छ ।

इलेक्ट्रोनिक भोटिङ मेसिनमा छेडखानीको सम्भावना कत्तिको देख्नुहुन्छ ?

प्राविधिक टिमका साथीहरूले मेसिनको परीक्षण गरेर देखाउनुभएको छ । परीक्षणपछि हामी आश्वस्त भएका छौँ ।

अरु नेताहरू संयन्त्र निर्माण गर्न लागेका छन् । तर, तपाईंहरूको 'दश भाइ'को समूह अहिले छिन्नभिन्न भएको छ । यो अवस्थामा कसरी अगाडि बढ्नुहुन्छ ?

बाहिरबाट हेर्दा मात्रै यो समूह छिन्नभिन्नजस्तो देखिएको हो । हामी राजनीतिक, सैद्धान्तिक र वैचारिक रूपमा सँगै छौँ । र, यो महाधिवेशनमा हामी सँगै रहन्छौँ ।

हेर्नुस् रावलसँग गरिएको भिडियो अन्तर्वार्ता :