यसरी जाेगियाे डेढ करोडको कार र पाँचतारेको पार्टी

A+ A A-

आइतबार काठमाडौं प्रहरी परिसरमा पुगे, दुई जना युवती । उनीहरुको व्यवहार अनौठो देखिन थाल्यो । रूपवती । हिँडाइ, बसाइ र बोलाइमा उच्च घरानाको छनक ।

दुई युवतीमध्ये एक हुन्, ज्ञानेश्वरकी शिला (परिवर्तित नाम) । उनी केही महिनाअघि मात्र लन्डनबाट काठमाडौं आएकी हुन् । पढाइको सिलसिलामा शिला १० वर्ष लन्डन बसेकी युवती हुन् ।

अर्की युवती हुन्, रेखा (परिवर्तित नाम) । उनी आईटी इन्जिनियर । काठमाडौंकै स्थानीय । एक निजी असिफमा उनी आईटी इन्जिनियरका रूपमा कार्यरत छिन् ।

शिला र रेखाको पृष्ठभूमि फरक छ । तर, उनीहरु संयोगले एकै ठाउँमा आइपुगेका छन् ।

काठमाडौं प्रहरी परिसरका प्रवक्ता प्रहरी नायब उपरीक्षक (डीएसपी) होविन्द्र बोगटीका अनुसार उनीहरु एक ठग युवाको मायाजालमा परेर पीडित भएका हुन् ।

रुप परिवर्तन गरिरहने ‘छेपारे’ युवक को फन्दामा परे शिला र रेखा । उनी ठमेलको स्थानीय हुँ भन्थे । कसैलाई पाइलट, कसैलाई व्यापारी र कसैलाई जग्गा दलाल भनेर परिचय दिन्थे । उनले यिनै परिचयबाट धेरै युवतीलाई मायाजालमा फसाइसकेका रहेछन् ।

को हुन् ती नटवरलाल ?

युवतीलाई मायाजालमा फसाएर करोडौं ठगी गर्ने युवा हुन्, नवलपरासी डन्डीका २८ वर्षीय रेनालराज आचार्य । प्रहरीले उनलाई २० जेठमा शिला र रेखाको उजुरीका आधारमा ठगी मुद्दामा पक्राउ गरेको छ ।

शिला र रेखा आइतबार प्रहरी परिसरमा आचार्यका आफन्तसँग छलफल गर्नका लागि पुगेका थिए । प्लस टुसम्मको अध्ययन गरेका आचार्यसँग युवतीलाई आफूतिर खिच्ने जादुमय शैली छ ।

‘यवतीहरुले उनलाई किनिदिएको एउटा निजी कार समेत छ । केटीलाई फसाउन उनी मिजासिलो पाराले बोल्नेदेखि जे पनि गर्दा रहेछन्,’ परिसरका डीएसपी बोगटीले भने ।

त्यही शैलीले अधिकांश उच्च घरानाका युवतीसमेत आचार्यको मायाजालमा फसेको बोगटीको भनाइ छ ।

यसरी पुगे शिलाको सम्पर्कमा

शिला लन्डनबाट केही महिनाअघि काठमाडौं आएकी थिइन् । सानैमा आमा गुमाएकी शिलाको घरमा बा र हजुरआमा मात्रै थिए । शिलाको परिवारमा अभाव भन्ने कुरा केही पनि थिएन ।

उनी ज्ञानेश्वरबासी हुन् । ज्ञानेश्वरमै उनको दस रोपनी जग्गा छ । लन्डनबाट फर्किएकी शिला काठमाडौं पुगेको केही समयमै बिरामी भइन् । उपचारका लागि उनी धापासीस्थित ग्रान्डी अस्पताल भर्ना भए ।

यतिबेलासम्म शिला र आचार्यबीच चिनजान भएको थिएन । शिलाको कुरुवा थिइन्, हजुरआमा ।

आचार्य र हजुरआमाबीच पहिलेदेखि नै चिनजान थियो । आचार्यले शिलाकी हजुरआमासँग आफू ‘पाइलट हुँ’ भन्थे । हजुरआमाले पनि पत्याइन ।

आचार्य हजुरआमासँगको चिनजानको फाइदा उठाउँदै शिलालाई भेट्न ग्रान्डी पुगे । आचार्य र शिलाबीच चिनजान भयो । आचार्य कुरुवा बसे । आचार्यको सेवाभावका कारण शिलामा प्रेम अंकुरण हुँदै गयो । आचार्य शिलासँग झन् नजिकिँदै गए ।

डीएसपी बोगटीका अुनुसार शिलाको कुरुवा बस्दा आचार्यले खुबै सेवा पनि गरे ।

‘बिरामीको दिशा पिसाब सफा गर्नेदेखि लिएर बान्तासमेत सफा गर्ने गरेको रहेछ । त्यहीँबाट शिलाको मन चोर्न सफल भएछ,’ बोगटीले भने । अस्पतालबाट डिस्चार्ज भएपछि आचार्य र शिला सम्पर्कमै रहेको बोगटीले बताए ।

डेढ करोडको कार पाँच र तारे होटल बुक

भेटघाटले प्रेमको रुप लियो । र, प्रेमले विवाहको रुप लिने तयार हुँदै गर्दा शिलाको परिवारले आचार्यलाई डेढ करोडको कार र विवाह पार्टीका लागि पाँच तारे होटलको व्यवस्था गर्ने सोच बनाएको थियो ।

उनीहरुको इन्गेजमेन्ट हुने तयारी हुँदै थियो । त्यहीअनुसार नै कार र होटेल बुक गरिएको थियो । तर, परिस्थिति अर्कै भइदियो ।

रेखाले शिलालाई गरेको को त्यो कल....

शिला र आचार्यको इन्गेजमेन्ट हुने दिन । शिलालाई अपरिचित नम्बरबाट फोन आयो, ‘म रेखा । हजुरसँग भेट्ने काम छ, समय छ हजुरसँग ?’

शिला प्रतिप्रश्न गर्छिन्, ‘के काम छ र ?’

रेखा कारण खोल्छिन्, ‘हजुर र रेनालराजको बिहे हुँदै रहेछ, त्यहीबारे कुरा गर्नु छ ।’

शिला सहमत हुन्छिन् र भन्छिन्, ‘हुन्छ ।’

केही समयपछि शिलाले आचार्यलाई भनिन्, ‘रेखा भन्ने केटीसँग तिम्रो चिनजाँन रहेछ । भेट्न बोला‘की छ । तिमी र म जानुपर्छ है ।’
शिलाको कुरा सुन्नासाथ आचार्य शिलाबाट सम्पर्कविहीन भए ।

डीएसपी बोगटीका अनुसार आचार्यले रेखालाई समेत चार वर्षसम्म मायाजालमा पारी लाखौं रुपैयाँ ठगी गरेर धोका दिएका रहेछन् । रेखा र शिलाले आचार्यविरुद्ध ४० लाख ठगिएको उजुरी परिसरमा दिएका छन् । अन्य युवती पनि यसरी नै ठगिएको हुन सक्ने प्रहरीको अनुमान छ ।

प्रकाशित मिति: सोमबार, असार २, २०७६ ०३:५७