एमाले महाधिवेशन : साैराहाका हाेटलमा बेड अभाव

A+ A A-

इको एड्भेन्चर रिसोर्ट सौराहाका सञ्चालक ऋषि तिवारीलाई अहिले भ्याईनभ्याई छ । नेकपा एमालेको १०औँ राष्ट्रिय महाधिवेशनको बन्द सत्र सौराहामा हुने भएपछि उनको रिसोर्टमा आउने पर्यटकको संख्या ह्वात्तै बढेको छ । कोरोनाले लामो समयसम्म थलिएको व्यवसायलाई एमाले महाधिवेशनले तताएको छ ।

एक महिनादेखि भएको प्रचारप्रसारले सौराहामा सभा सम्मेलनहरू र पर्यटकीय गतिविधि थप चलायमान हुँदै गएका छन् । ‘महाधिवेशनको प्रचारले एक महिनायता फुर्सद छैन हामीलाई । सभा, सम्मेलनहरू भइरहेका छन् । आज पनि ५५ जनाको विद्यार्थी टोली आउँदै छ’, उनले उत्साहकासाथ सुनाए ।

एमाले महाधिवेशनका लागि उनको रिसोर्टमा अग्रिम बुकिङ् भइसकेको छ । विदामा गएका होटलका कर्मचारीलाई फिर्ता बोलाइसकेको उनले बताए । महाधिवेशनमा आएका प्रतिनिधिमार्फत राम्रो सन्देश दिनको लागि आफूहरू लागेको तिवारीले बताए ।

‘हाइजेनिक खानाका मेनुहरूमा डिस्काउन्टको व्यवस्था गरेका छौँ, सहुलियत रूपमा काेठा दिन तयार भएका छौँ । सबै होटलले खानाको मेनु एउटै बनाएका छौँ । सेवासुविधामा उत्तिकै सचेत छौँ’, उनले भने ।

युनाइटेड हात्ती सञ्चालन सहकारी संघ सौराहाका अध्यक्षसमेत रहेका तिवारीले महाधिवेशन लक्षित गरेर हात्ती सफारीका लागि समयावधि बढाएर २ घण्टा बनाएको बताए । सहकारीमा दर्ता भएका ३३ र अन्य गरी ५० वटा हात्ती रहेका छन् । निकुञ्ज र सामुदायिक वनमा सफारीका लागि जिप डेढसय रहेका छन् । महाधिवेशनस्थलमै सहुलियत दरमा स्टल राखेर सफारी गराउनेबारे पहल भइरहेको उनले बताए ।

निकुञ्जभित्र ४० र सामुदायिक वनमा ९० वटा जिप गुड्ने गर्दछन् । महाधिवेशन बन्द सत्र हुने होटल सेभेन स्टारका अध्यक्ष माधव दुवाडी १० हजारभन्दा बढी बेडको माग भए पनि पूरा गर्ने स्थिति नरहेको बताउँछन् । ‘हामीले पहिलो प्राथमिकता महाधिवेशन प्रतिनिधिलाई दिएका छौँ, यसबाहेक पनि खुल्लारूपमा माग प्रशस्तै छ । तर सबै माग पूरा गर्न सकिएको छैन’, उनले भने ।

क्षेत्रीय होटल संघ सौराहाका अध्यक्ष दीपक भट्टराई महाधिवेशन प्रतिनिधिको लागि ३ हजार ५ सय बेड बुक भइसकेको र पेश्की समेत व्यवसायीले बुझिसकेको बताउँछन् । ‘अहिले हामी व्यवसायी एकदमै उत्साहित छौँ, एमालेको महाधिवेशनले नयाँ ट्रेन्ड पनि सेट गर्‍यो । पहिल्यै पेश्की बुझिसकेका छौँ’, उनले भने, ‘यसअघि विभिन्न पार्टीका कार्यक्रम हुन्थे । अग्रिम बुकिङकाे पैसा त परै जाओस्, रुममा उल्टो डिस्काउन्ट, चन्दा र उस्तै परे रुम फ्रीमै दिनुपर्ने बाध्यता थियो । अहिले ८० लाख पेश्कीस्वरुप बुझिसकेका छौँ । अरु बाँकी रहेको रकम कार्यक्रम सकिएको १५ दिनभित्रै उपलब्ध गराउने विश्वस्त पार्नुभएको छ ।’

उनले आफूहरू सेवासुविधा दिनमा कुनै कसर बाँकी नराख्ने गरी लागिपरेको बताए । इतिहासमै पहिलोपल्ट साैराहामा सबै होटलको कोठा खाली नरहने स्थिति आएको उनले बताए । सौराहामा जम्माजम्मी ६५ सय बेड छन् । ‘सौराहामा महाधिवेशन हुने हल्ला सुरुमै भएपछि १ हजार ५ सय बेड त पहिल्यै बुक भइसकेका रहेछन् । ३ हजार ५ सय पुर्‍याउनै धौधौ भयो । यस्तो भएको इतिहासमै पहिलोपल्ट होला’, उनले सुनाए ।

महाधिवेशनको तीन दिनमा १० करोडको व्यापार हुने अनुमान गरिएको भट्टराईले बताए । महाधिवेशनलाई लक्षित गरेर मंसिर नौ गतेदेखि १२ गतेसम्मलाई अन्य सबै कार्यक्रम बन्द गरिएको उनले बताए । सौराहामा क्षेत्रीय होटल संघ र रेष्टुरेण्ट व्यवसायी संघमा दर्ता भएका १२० वटा होटल छन् । संघमा दर्ता भएकाबाहेक झण्डै ८० वटा होटल रहेका छन् । होटलको सेवासुविधा र स्तर हेरेर ठूलो, मझौला र सानो भनी होटलको वर्गीकरण गरिएको र सोही अनुसार कोठाको मूल्य तोकिएको छ ।

‘विगतमा पूर्वको दुईवटा प्रदेशमा सौराहा सुरक्षित छ भने प्रचारको लागि गएको थियौँ भने नेकपा एमालेको कार्यक्रमपछि अब सौराहा पूर्ण रूपमा सुरक्षित छ र ठूला कार्यक्रम गर्न सक्षम पनि भन्ने सन्देश जानेछ’, उनले भने ।

प्रकाशित मिति: मंगलबार, मंसिर ७, २०७८ ०९:०७