महाधिवेशनको बन्दसत्रका लागि २ बिघामा हल बनाउँदै एमाले

A+ A A-

नेकपा (एमाले) को १०औँ महाधिवेशनको बन्दसत्रको लागि सौराहामा हल निर्माण सुरु भएको छ । बन्दसत्र हुने होटल सेभेन स्टारसँगै जोडिएको दुई बिघा जग्गामा हल बनाउन सुरु गरिएको महाधिवेशन स्वयंसेवक परिचालन समितिका संयोजक एवं एमाले केन्द्रीय सदस्य विनोद श्रेष्ठले जानकारी दिए ।

२ हजारदेखि २२ सय प्रतिनिधि सजिलै अट्ने गरी हल बनाउन लागिएको श्रेष्ठले बताए । होटलको दक्षिण तर्फ दुई बिघामा पार्किङको व्यवस्था गरिएको छ । होटल सेभेन स्टारकै एक हलमा ९० देखि ९५ वटा मतदान मेसिन राखिने उनले बताए । महाधिवेशनमा एकैचोटी ९५ जनाले मतदान गर्न सक्नेछन् भने एक जना मतदाताको लागि झण्डै आधा घण्टा समय लाग्ने बताइएको छ ।

सौराहामा बन्त्रसत्रको लागि आवश्यक पूर्वाधार मंसिर ९ गते बेलुकासम्म निर्माण भइसक्ने श्रेष्ठले जानकारी दिए ।

आवास समितिका संयोजक कृष्णभक्त पोखरेलले आवासका लागि ३५ सय बेड बुकिङ गरिएको जानकारी दिए । त्यसका लागि झण्डै एक करोड ६० लाख रुपैयाँ लाग्नेमा ८० लाख पेश्की दिइसकेको उनको भनाइ छ ।

काठमाडौंबाट आएका गाडीलाई भरतपुर– १ आपटाँडीमा, लुम्बिनीबाट आएका सवारीलाई गैँडाकोटमा र पूर्वबाट आएका बसलाई टिकौली अथवा केन्द्रीय टर्मिनल बसपार्कमा व्यवस्थापन गर्ने तयारी भएको पोखरेलले जानकारी दिए । चितवनलाई सजाउन ७ गतेदेखि दैनिक ३ सय स्वयंसेवक खटाउने तयारी भएको पोखरेलको भनाइ छ ।

नारायणी नदी किनारमा मंसिर १० गते महाधिवेशनको उद्घाटन समारोह सकिएपछि ११ र १२ गते सौराहामा बन्दसत्र हुनेछ । बन्दसत्रमा करिब २ हजार प्रतिनिधि सहभागी हुँदैछन् । प्रतिनिधिको अलवा सौराहामा दुई दिन हुने बन्दसत्रका क्रममा करिब ५ हजार मान्छे आउने अपेक्षा व्यवसायीहरूले गरेका छन् ।

प्रतिनिधिका लागि दुई छाक खाना र ३ पटकको नास्ता होटलमै व्यवस्था गरिएको छ । ११ गते र १२ गते बिहानको खाना सामूहिक रूपमा खाने गरी होटल सेभेन स्टारले व्यवस्थापन गर्नेछ ।

प्रकाशित मिति: सोमबार, मंसिर ६, २०७८ १७:५१