भिन्न पेसाबाट कांग्रेसको राजनीतिमा होमिएका युवा

A+ A A-

भर्खरै सम्पन्न नेपाली कांग्रेसको प्रदेश महाधिवेशन प्रतिनिधिको अधिवेशनमा सार्वधिक मतसहित एलिजा ढकाल प्रतिनिधि चुनिइन् । नेपाल विद्यार्थी संघकी पूर्वकेन्द्रीय सदस्यसमेत रहेकी उनले सार्वधिक मत प्राप्त गरिन् । नेपाली कांग्रेस तनहुँ क्षेत्र नं. १ प्रदेश सभा (क) को गण्डकी प्रदेश अधिवेशनबाट उनी प्रतिनिधिमा निर्वाचित भएकी हुन् ।

त्यस्तैऽ १८ वर्षीया उषा सापकोटा प्रदेश महाधिवेशन प्रतिनिधिको रूपमा चुनिइन् । बागलुङ क्षेत्र नम्बर १ (क) बाट प्रदेश महाधिवेशन प्रतिनिधिमा सबैभन्दा बढी मत ल्याएर सापकोटा निर्वाचित भएकी हुन् । २ सय ८६ मत ल्याएर उनी प्रदेश महाधिवेशन प्रतिनिधिमा विजयी भएकी हुन् । जसलाई पार्टीको नेतृत्व पङ्क्तिले पनि तारिफ गर्‍यो ।

महाधिवेशनको संघारमा रहेको कांग्रेसमा नेतृत्व चुन्ने र चुनिने क्रम चलिरहेको छ । भर्खरै प्रदेश महाधिवेशन प्रतिनिधिलगायत विभिन्न स्थानीय तहको अधिवेशन सम्पन्न गरेको कांग्रेस संघीय महाधिवेशन प्रतिनिधिको अधिवेशनको तयारीमा छ । भोलि देशैभर कांग्रेसले महाधिवेशन प्रतिनिधिको निर्वाचन गर्दैछ ।

महाधिवेशन प्रतिनिधि आफैँमा महत्त्वपूर्ण जिम्मेवारी हो । तल्लो तहका कार्यकर्ताले केन्द्रीय तहको नेतृत्व चुन्न आफ्ना प्रतिनिधि पठाउँछन् । ती प्रतिनिधिले काठमाडौंमा २४ मंसिरदेखि २६ सम्म हुने महाधिवेशनमा केन्द्रीय नेतृत्व छान्नेछन् ।

यस पटकको अधिवेशनमा भने युवापुस्ताको आकर्षण बढेको पाइन्छ । वडा कार्यसमितिदेखि क्षेत्रीय प्रतिनिधि, प्रदेश महाधिवेशन प्रतिनिधिसम्मको मतपरिणाम हेर्दा युवा पुस्ताहरू चुनिएको पाइन्छ । तिनैमध्येबाट महाधिवेशन प्रतिनिधि छानिने र छानिएकाले केन्द्रीय तहको नेतृत्व चयन गर्ने हुनाले पनि यसलाई महत्त्वका साथ हेरिएको पाइन्छ ।

सोमबार हुने कांग्रेस महाधिवेशन प्रतिनिधिको निर्वाचनमा पनि युवा आकांक्षी प्रशस्त देखिन्छन् । हुन त युवा कसलाई मान्ने भन्ने विषयमा विभिन्न खाले धारण आइरहन्छन् । उमेरले चालिस नाघिसकेका गगन थापादेखि ६० नाघेका शशांक कोइरालासम्मलाई कांग्रेसमा युवा नेता भन्नेहरू पनि छन् । तर, यहाँ २५–३० वर्ष आसपासमा रहेका नेतालाई युवाको रूपमा हेरिएको छ ।

गुल्मी क्षेत्र नं. २ का ३० वर्षीय पदम भट्टराईले खस आर्यतर्फबाट आफूलाई महाधिवेशन प्रतिनिधिको उम्मेदवारको रूपमा उभ्याएका छन् । उनी पेसाले चार्टर्ड एकाउन्टेन्ट (सीए) हुन् । भारतबाट सीए सकेर नेपाल फर्किएपछि उनी अडिट फर्ममा आबद्ध भए ।

भट्टराईको राजनीतिक पृष्ठभूमि हेर्दा ११–१२ पढ्दादेखि नै नेविसंघमा आबद्ध थिए । साथै, सीए नेविसंघ भारतका संस्थापक अध्यक्ष पनि हुन्, उनी । ‘मैले विद्यार्थी राजनीतिदेखि नै राजनीति र पेसालाई सँगसँगै अघि बढाएँ । राजनीति गर्नेले पहिला आफूलाई आत्मनिर्भर बनाए मात्र पछि भ्रष्टचार, ठगीधन्दाजस्ता चङ्गुलमा फस्दैन भन्नेमा मेरो विश्वास छ’, उनले भने ।

पहिलेका नेताहरू जनताको समस्याबारे जानकार भए पनि समाधान गर्न प्राविधिक ज्ञान नभएको भट्टराईको भनाइ छ । त्यसैले पनि राजनीतिमा प्राविधिक ज्ञान भएका युवाहरूको हस्तक्षेप आवश्यक रहेको उनले बताए ।

त्यस्तै, नेपाल विद्यार्थी संघका पूर्वकेन्द्रीय सदस्यसमेत भइसकेका नवराज त्रिपाठी पनि महाधिवेशन प्रतिनिधिमा उठेका छन् । उनको आफ्नै भन्कटेश इन्जिनियरिङ कन्सल्टेन्सी छ । राजनीति गर्न पहिला आफू आत्मनिर्भर हुनुपर्ने र सेवाभावका साथ राजनीतिमा आउनुपर्ने उनको मत छ ।

‘राजनीतिलाई गरिखाने भाँडोको रूपमा हेर्नुहुँदैन भनेर नै मैले राजनीतिसँगै आफ्नो पेसालाई अघि बढाएको हो । अब हरेक राजनीतिज्ञ पहिला आफू आत्मनिर्भर हुन आवश्यक छ’, उनले भने, ‘सँगसँगै अब समस्या देखाउने मात्र होइन, समाधानको बाटो देखाउन सक्ने नेतृत्व हामीले छान्नुपर्छ । यसैका लागि हो, महाधिवेशन प्रतिनिधिमा मेरो उम्मेदवारी ।’

त्रिपाठीले बारा जिल्ला क्षेत्र नं. ४ बाट महाधिवेशन प्रतिनिधिका लागि उम्मेदवारी दिएका छन् ।

आर्किटेक्चरल इन्जिनियरसमेत रहेका रञ्जन काफ्ले पनि महाधिवेश प्रतिनिधिको प्रतिस्पर्धामा छन् । राजनीतिबाहेक उनले आफ्नो आर्किटेक्टसम्बन्धी पेसालाई सँगसँगै लगेका छन् । उनी ‘फ्रिलेन्सर’ पनि हुन् । हाल विकास तथा राजनीति अध्ययनका लागि अन्तर्राष्ट्रिय केन्द्रको प्रमुख कार्यकारी अधिकृतको रूपमा पनि काफ्ले कार्यरत छन् ।

काफ्ले गुटगत राजनीतिबाट टाढा रहेर अधिवेशनमा होमिएका छन् । रूपन्देही क्षेत्र नं. २ बाट आफ्नो उम्मेदवारी दिएका काफ्ले कुनै गुटमा संलग्न छैनन् । एजेन्डा हेरेर भन्दा पनि प्यानल हेरेर भोट दिने प्रचलन रहेकाले आफूले जित्ने गुञ्जायस नरहेको उनले बताए ।

‘यहाँ दुईवटा टिम (संस्थापन र संस्थापनइतर) प्यानल बनाएर लडेका छन् । म कुनै समूहमा छैन, स्वतन्त्र हिसाबले उम्मेदवारी दिएँ । त्यसैले जित्ने सम्भावना न्यून छ’, काफ्लेले भने, ‘यद्यपि, कति जनाले एजेण्डा, कार्यक्रम हेरेर मत हाल्छन्, त्यसको सर्वेक्षणका लागि पनि मेरो उम्मेदवारी हो ।’

डा. सन्तोष उपाध्याय पनि महाधिवेशन प्रतिनिधिको उम्मेदवारी दिएर कांग्रेस अधिवेशनमा होमिएका छन् । उनले महाराजगंज मेडिकल क्याम्पसबाट छात्रवृत्तिमा पढे । त्यहीँबाट राजनीतिमा जोडिए । ३० वर्षीय उपाध्याय अहिले चिकित्सकको रूपमा कार्यरत छन् ।

उनी अछाम जिल्लाबाट महाधिवेशन प्रतिनिधि उठ्दैछन् । भोलि हुने निर्वाचनमा आफू चुनिए आछामको सार्थक प्रतिनिधित्व गरेर माथिल्लो तहमा कुशल नेतृत्व छान्ने प्रतिबद्धता उनको छ । ‘अछामजस्ता विकटबाट आएकाले केही गर्न सक्दैनन् भन्ने गर्छन् । त्यसैले पनि अछामलाई थप चिनाउने र बनाउने उद्देश्यले राजनीतिमा लागेको हुँ’, उनले भने, ‘महाधिवेशन प्रतिनिधिमा मेरो उम्मेदवारी त्यसैको एउटा खुट्किलो हो । आफू आत्मनिर्भर भएर मात्र यो सबै सम्भव छ भनेर पेसालाई पनि सँगसँगै अघि बढाएको छु ।’

सिन्धुली क्षेत्र नं. १ बाट महाधिवेशन प्रतिनिधिको उम्मेदवारी दिएका मुकेश घिमिरे पनि पार्टीभित्र युवाहरूको हस्तक्षेप आवश्यक रहेको बताउँछन् । युवाहरूले पुस्तान्तरण र रूपान्तरणको संयोजन मिलाउन भूमिका खेल्नुपर्नेमा उनको जोड छ ।

‘हिजोको पुस्ताले व्यवस्था परिवर्तन गरेर हामीलाई यहाँसम्म ल्याइपुर्‍यायो । अब हाम्रो पुस्ताले अवस्था परिवर्तनका लागि राजनीतिमा सार्थक हस्तक्षेप गर्न आवश्यक छ’, घिमिरेले शिलापत्रसँग भने, ‘पुस्तान्तरण भनेर मात्र पनि हुँदैन । पुस्तान्तरणसँगै रूपान्तरणको बाटोमा पार्टी र देशलाई डोर्‍याउन भूमिका खेल्न लागिपर्नेछु । यसैका लागि मैले महाधिवेशन प्रतिनिधिमा उम्मेदवारी दिएको हुँ ।’

प्रकाशित मिति: आइतबार, मंसिर ५, २०७८ १९:०३