युरोप, अमेरिकाको लोभमा ठगिन्छन् पढेलेखेकै युवा, दुबई र बैंककमा अलपत्र पारेर भाग्छन् एजेन्ट

युरोप, अमेरिकाको लोभमा ठगिन्छन् पढेलेखेकै युवा, दुबई र बैंककमा अलपत्र पारेर भाग्छन् एजेन्ट

थाइल्याण्डकाे पटाया सिटीस्थित सामुद्रिक तट । तस्वीरः शिलापत्र ।

A+ A A-

लमजुङ बेँसीशहरकी २३ वर्षीया मनिता क्षत्री बीबीए सिध्याएपछि काठमाडौंको एउटा नामी ट्राभल एजेन्सीमा काम गर्थिन् । कोरोना महाव्याधिका कारण ट्राभल एजेन्सी बन्द भयाे । त्यसपछि वैदेशिक रोजगारीमा जान उनी सुनसरीका राजेश सापकोटाको सम्पर्कमा पुगिन् । सापकोटा व्यक्तिगत कन्सल्टेन्सीमार्फत श्रमिकलाई अवैध बाटोहुँदै विदेश पठाउने काम गर्छन् ।

सापकोटाले आफूलाई यूएईहुँदै क्यानडा छिराएर काममा लगाइदिने लोभ देखाएर भिजिट भिसामा यूएई पुर्‍याएको नेपाल प्रहरीकाे मानव बेचबिखन अनुसन्धान ब्युरोमा भेटिएकी मनिताले बताइन् । सापकोटाले थाइल्यान्डमा बसेर नेपालबाट एजेन्टको सहयोगमा मानव तस्करी गर्दै आएको ब्युरोकाे मानव बेचबिखनसम्बन्धी रिपोर्टमा उल्लेख छ ।

ब्युरोका अनुसार सापकोटाले यूएई भिजिट भिसामा तथा अफ्रिकी, युराेपेली देश र उत्तर अमेरिकी मुलुक क्यानडामा काम लगाइदिने भन्दै धेरै जनालाई ठगेका उजुरीहरू छन् ।

क्यानडा जान सजिलो हुन्छ भनेर सापकोटाले यूएई पुर्‍याएकाे मनिताले बताइन् । योभन्दा अगाडि गाउँका दुई जना दाइलाई पनि सापकाेटाले क्यानडा पठाएका कारण आफू विश्वस्त हुँदा तस्करको फन्दामा परेको मनिताकाे भनाइ छ ।

‘म बीबीए सकेर काम गर्दै थिएँ । कोरोनाका कारण ट्राभल बन्द भएपछि परिवारको सल्लाहमै क्यानडा जान भनेर यूएई पुगेँ, भिजिट भिसामा’, उनले भनिन्, ‘यूएईबाट सर्बिया जाने हो भनेर एजेन्ट सोध्यो । जादिनँ भनेपछि यूएईमै चार महिना राख्यो ।' त्यो चार महिनासम्म एक जना भारतीय एजेन्टले आफूलाई शारीरिक शोषणसमेत गरेको उनले सुनाइन् ।

मनितालाई दियुराज नाम गरेको एजेन्टले चार महिना बाहिर निस्कन दिएन । राहदानी र अन्य सबै कागजात एजेन्टले नै राखेका कारण आफू बाध्य भएर भित्रै बस्नुपरेको मनिताले सुनाइन् ।

चार महिनापछि भारतीय एजेन्टले थाइल्यान्डसम्म ल्याएर अर्को एजेन्टकाे जिम्मा लगाएको मनिताले बताइन् । यूएईबाट थाइल्यान्डसम्म आइपुग्दा उनकाे करिब ५ लाख खर्च भइसकेको थियो । यूएई भिजिट भिसामा जाँदा मनिताले एजेन्टलाई २ लाख ४० हजार रुपैयाँ तिरेकी थिइन् ।

यूएई पुर्‍याएका नेपाली महिलाहरूको बिजोक रहेकाे र उनीहरूलाई एजेन्टले बन्धक बनाएर राख्ने गरेको उनले खुलाइन् ।

रेस्टुरेन्टमा नाङ्गै नचाए

थाइल्यान्डमा मनितालाई क्यानडा पठाउने एजेन्टकाे नाम थियाे, सरोज तामाङ । बैंककमा उनलाई एजेन्टले दुई साता सँगै राख्यो । अर्काको देश भएका कारण उसैसँग बस्न बाध्य भएको मनिताले बताइन् ।

त्यसबीचमा एजेन्ट सराेज तामाङले क्यानडा जाने सबै प्रक्रिया पुगिसकेकाे भन्दै साढे २ लाख रुपैयाँ लाग्ने बताए । त्यसपछि मनिताले घरबाट उक्त रकम मगाएर एजेन्टलाई बुझाइन् । त्यसपछि तामाङले महिलाहरूलाई नाङ्गै नचाउने रेस्टुरेन्टमा पुर्‍याएर फरार भएको उनले बताइन् ।

‘भिसा आउन तीन महिना लाग्छ भन्दै एउटा होटलमा क्यासियरको काम गर्न भनेर पुर्‍यायो । त्यो रेस्टुरेन्ट थियाे’, उनले भनिन्, ‘जहाँ ग्राहकलाई नाचेर खुसी बनाउनुपर्थ्यो । दिउँसै अर्धनग्न बनाएर नचाउँथे ।’

उक्त रेस्टुरेन्टमा पालैपालो गरी दिनमा १५ जनाभन्दा बढी नेपाली युवती डान्स गर्दै बसेको र ती सबै रोजगारीका लागि तेस्रो देश जाने प्रलोभनमा परी त्यहाँ पुगेको मनिताको भनाइ छ ।

मनिता ब्युरो र थाइल्यान्डमा बसोबास गर्दै आएका नेपालीहरूको सहयोगमा दसैँअगाडि स्वदेश फर्किएकी हुन् । युरोप, अमेरिका, क्यानडामा रोजगारीको प्रलोभनमा पारेर तस्करहरूले धेरै नेपाली महिलालाई बैंकक पुर्‍याएको र त्यहाँ अवैध धन्दामा लाग्न बाध्य पारिएकाे मनिताले बताइन् ।

रोजगारीका नाममा तस्करको फन्दामा परी थाइल्यान्डमा दुई महिना बसेर स्वदेश फर्किएकी मनितासँग अन्य दुई जना युवती पनि ब्युरोमा उजुरी गर्न आएका थिए ।

युराेप, अमेरिकाकाे प्रलोभनमा पढेलेखेका युवासमेत गठिने गरेकाे ब्युरोका प्रवक्ता अनुराग कुमार द्विवेदीले बताए । विदेश जाने लाेभमा वार्षिक ४ सयभन्दा धेरै नेपाली युवायुवती आर्थिक र शारीरिक शोषणमा पर्ने गरेको ब्युरोको तथ्यांक छ । (नाेटः पीडित भनिएकी युवतीकाे नाम परिवर्तित हाे)

प्रकाशित मिति: सोमबार, पुस १२, २०७८ ०७:२२