ठगहरूलाई ठाउँकाे ठाउँ ठाेक्ने चेतावनी दिँदै श्रममन्त्रीले भने- म टाइम पास गर्न आएकाे हैन

ठगहरूलाई ठाउँकाे ठाउँ ठाेक्ने चेतावनी दिँदै श्रममन्त्रीले भने- म टाइम पास गर्न आएकाे हैन

A+ A A-

श्रम, रोजगार तथा सामाजिक सुरक्षामन्त्री कृष्णप्रसाद श्रेष्ठले आफू श्रम मन्त्रालयमा टाइम पास गर्न नआएकाे बताएका छन् । वैदेशिक रोजगारीका क्षेत्रमा विगतदेखि हालसम्म भएका मुख्य समस्याका विषयमा अध्ययन गरिरहेको बताउँदै उनले बेथिति अन्त्यका लागि काम गर्ने बताए ।

'म श्रम मन्त्रालयको कुर्सीमा बसेर समय खेर फाल्न आएको हैन । श्रमिककाे हकका लागि काम गर्छु', काठमाडाैंमा शनिबार आयाेजित एक कार्यक्रममा उनले भने, 'कसैले कानुनभन्दा बाहिर गएर काम गर्छ भने मैले सहने छैन ।'

उनले म्यानपावर कम्पनीहरूले फ्रि भिसा र फ्रि टिकटका नाममा राज्यसँगै कामदारलाई ठगिरहेकाे बताउँदै अब दाेहाेराे लुट अन्त्य गर्ने बताए । ‘म्यानपावर कम्पनीहरूले फ्रि भिसा र फ्रि टिकटका नाममा राज्यसँगै कामदारलाई ठगिरहेका छन् । यो दोहोरो लुट हो । अब यो विषयमा पनि गम्भीर छलफल हुन्छ’, उनले भने ।

उनले वैदेशिक रोजगारीका नाममा ठगी गर्ने म्यानपावर, शोषण गर्ने कर्मचारीदेखि अन्य संस्थालाई निगरानीमा राखेकाे बताउँदै कानुनी कारबाहीका लागि अग्रसर हुने बताए ।

वैदेशिक रोजगारीका नाममा भइरहेको आर्थिक ठगी र मानव तस्करी नियन्त्रण गर्न परराष्ट्र र गृह मन्त्रालयसँग पनि समन्वय भइरहेकाे मन्त्री श्रेष्ठले बताए ।

वैदेशिक रोजगारीमा मात्र नभइ आन्तरिक श्रम बजारका समस्या समाधानमा पनि आफूले जाेड दिने उनले बताए ।

‘मेरो शब्दकाेशमा भोलि भन्ने शब्द छैन । वैदेशिक रोजगारीमा जाने होस् अथवा देशभित्र काम गर्ने श्रमिकमाथि शाेषण गर्ने कर्मचारी, म्यानपावर र अन्य संस्थालाई कानुनमा बसेर आजकाे आजै ठोक्छु,’ उनले भने, ‘अब श्रम मन्त्रालय र मन्त्रालयअन्तर्गतका निकायहरूमा तीव्र गतिमा काम गर्ने टिम बन्छ । यो टिमले यो त्यो भन्ने होइन कानुनको दायराभित्र बसेर काम गर्छ । कसैको शक्तिको केही लाग्दैन ।’

प्रकाशित मिति: आइतबार, मंसिर ५, २०७८ ११:१६