त्रिविसँग विद्यार्थीको गुनासो- बल्लतल्ल पढाइ सुरु भएको छ, परीक्षाको फारम खुलिसक्यो

त्रिविसँग विद्यार्थीको गुनासो- बल्लतल्ल पढाइ सुरु भएको छ, परीक्षाको फारम खुलिसक्यो

A+ A A-

त्रिचन्द्र क्याम्पसको स्नातक तह तेस्रो वर्षमा पढ्ने गोविन्द कोइरालाको राम्रोसँग कक्षा सञ्चालनसमेत हुन पाएको छैन । गएको भदौमा दोस्रो वर्षको परीक्षा दिएका उनको छठपछि मात्र तेस्रो वर्षको कक्षा सुरु भयो । उनले कलेजमा तेस्रो वर्षको भर्नासम्म गर्न भ्याएका थिएनन् ।

तर, त्रिविले एकाएक तेस्रो वर्षको परीक्षा फारम खुलायो । जसको समयावधि कात्तिक मसान्तमै सकिएको छ । सो समयमा फारम भर्न छुटाएका विद्यार्थीका लागि त्रिविले दोब्बर दस्तुरमा फारम भर्ने व्यवस्था गरेको छ ।

यता विद्यार्थी भने पढाइ पनि राम्रोसँग सुरु नभई परीक्षा फारम खुलाएकोमा असन्तुष्ट देखिन्छन् । ‘दोस्रो वर्षको परीक्षा पनि अलि ढिलोढिलै भयो । त्यसपछि छठसम्म छुट्टी नै भयो । पढाइचाहिँ भएको छैन’, गोविन्दले शिलापत्रसँग भने, ‘एकाएक परीक्षा फारम खुलाएपछि विद्यार्थी त आत्तिन्छ नै । कि यति समयपछि परीक्षा लिन्छौँ भनेर फारम खुलाएर सँगसँगै भन्नुपर्थ्यो ।’

त्यस्तै, रत्नराज्य क्याम्पसमा पढ्ने विनोदराज जोशीको पनि समस्या उस्तै छ । उनी आरआर क्याम्पसमा राजनीतिशास्त्रका विद्यार्थी हुन् ।

परीक्षा फारम खुलेर पनि बन्द हुने बेला भइसक्दा नियमित कक्षा भने बल्ल सुचारु हुनु दु:खद रहेको विनोद बताउँछन् । उनका अनुसार भदौमा दोस्रो वर्षको परीक्षा सकिएपछि बीचमा अनलाइनबाटै तेस्रो वर्षको कक्षा चलेको थियो । तर, प्रविधिको पहुँच नभएकाले पढ्न नपाएको उनको गुनासो छ ।

‘अहिले खुलेको फारम भर्न छुट्नेहरू पनि छन् । गाउँतिर गएका साथीहरूको नेट नहुँदा धेरैको फारम छुटिसकेको छ । कलेजमै भर्नासमेत गरिसकेको थिएन । अचानक त्रिविले परीक्षा फारम खुलायो’, उनले भने, ‘बरु सेकेन्ड इयरको रिजल्ट निकाल्न पनि यस्तै हतार गरिदिए कस्तो हुन्थ्यो होला ? यो खालि विद्यार्थीलाई प्रेसर दिने काम हो ।’

गोविन्द र विनोदको जस्तै चिन्ता पब्लिक युथ क्याम्पसका सागरबाबु भट्टको पनि छ । अन्य समयमा परीक्षा नजिकिएको अवस्थामा मात्र फारम खुलाउने त्रिविले यसपटक पढाइ पनि राम्रोसँग सुरु नहुँदै खुलायो । त्यसैले पनि परीक्षा तत्काल गरिहाल्ने मनसायले त्रिविले फारम खुलाएको हो कि भन्ने डर विद्यार्थीमा देखिन्छ ।

‘पहिला त कोर्स सकेपछि आरामले फारम भर्न पाइन्थ्यो । अहिले त एकाएक परीक्षा फारम खुलेको छ । कम्तीमा गर्न खोजेको के हो भन्ने जानकारी विद्यार्थीलाई दिनुपर्छ नि’, उनले भने ।

त्रिचन्द्र बहुमुखी क्याम्पसका उपप्रमुख शिव महत्तो भने त्रिविले क्याम्पसहरूसँग समन्वय नै नगरी फारम खुलाएको बताउँछन् । सामान्य अवस्थामा यस्ता निर्णय लिँदा त्रिविले क्याम्पसहरूसँग छलफल गरेर मात्र काम गर्ने गरेको थियो । ‘यसअघि त्रिविले हामीलाई बोलाएर कोर्सको अवस्था केकस्तो छ भन्ने बुझेर मात्र निर्णय लिन्थ्यो । यसपटक भने त्यस्तो पाइएन’, उनले भने ।

महतोका अनुसार त्रिचन्द्रमा तेस्रो वर्षमा अध्ययन गर्ने करिब ११ हजार विद्यार्थी छन् । यसबीचमा अनलाइन कक्षा सञ्चालन भए पनि अधिकांश विद्यार्थी पढ्नबाट वञ्चित थिए । ‘कोही गाउँमा गएका छन्, कोही यतै छन् । हाम्रोमा सबै वर्गका विद्यार्थी पढ्ने भएकाले अनलाइन कक्षा चलाउँदा प्रत्येक विद्यार्थीको पहुँचमा पुग्ने स्थिति छैन’, उनले भने, ‘राम्रोसँग पढाइ नै बल्ल सुरु भइरहेको अवस्थामा त्रिविले एकाएक परीक्षा फारम नै खुलाउँदा विद्यार्थी त आत्तिने नै भए नि ।’

विद्यार्थीका लागि पर्याप्त तयारी गर्न केही समय दिनुपर्ने महतोको मत छ । त्रिविले गर्न खोजेको के हो भनेर स्पष्ट पारिदिनुपर्ने उनी बताउँछन् । गतसाल कोरोनाका कारण बिग्रिएको शैक्षिक क्यालेण्डर मिलाउने नाममा पढाउँदै नपढाई परीक्षा लिनु नहुनेमा उनको जोड छ ।

पशुपति बहुमुखी क्याम्पसका प्रमुख चन्द्र पन्त भने दोस्रो वर्षको परीक्षा सकिनासाथ तेस्रो वर्षका लागि अनलाइन कक्षा चलाएको बताउँछन् । ‘हामीले कोरोना महामारीलाई ध्यानमा राखेर अनलाइनबाट पढायौँ । अब धेरै खालका विद्यार्थी यहाँ पढ्ने भएकाले अनलाइनको पहुँचबाहिर रहेका हुन सक्छन्’, उनले भने, ‘अब त्यस्ता विद्यार्थीलाई पनि हुनेगरी बल्ल भौतिक रूपमा कक्षा चलाउने स्थिति आयो । उनीहरूचाहिँ त्रिविको एकाएक फारम खुलाउने निर्णयले आत्तिएका हुन सक्छन् ।’

त्रिविका शिक्षाध्यक्ष शिवलाल भुसाल भने कोरोना महामारीले बिगारेको शैक्षिक क्यालेण्डर मिलाउनुपर्ने भएकाले छिट्टै फारम खुलाउनुपरेको बताउँछन् । ‘हामीले पढाउँदै नपढाएको होइन । बीचमा महामारीको समयमा पनि अनलाइनबाटै कक्षाहरू चलेका छन्’, उनले भने, ‘फेरि कोरोना महामारीले हाम्रो शैक्षिक क्यालेण्डर नै बिग्रिएका छन् । ती सबैलाई मिलाउनुपर्ने स्थिति आएकाले यताउता भएको हो । सम्भवत: पुसतिर परीक्षा लिन्छौँ होला ।’

प्रकाशित मिति: शुक्रबार, मंसिर ३, २०७८ १७:१९