नेपालका १० हजार नर्सलाई बेलायतले जागिर दिने, मासिक अढाइ लाख तलब, सेवासुविधा प्रशस्तै

नेपालका १० हजार नर्सलाई बेलायतले जागिर दिने, मासिक अढाइ लाख तलब, सेवासुविधा प्रशस्तै

A+ A A-

बेलायतले नेपालका १० हजार नर्सलाई जागिर दिने भएकाे छ ।

नेपालस्थित बेलायती राजदूतवासले श्रम, रोजगार तथा सामाजिक सुरक्षा मन्त्रालयसँग सरकारीस्तरमा श्रम सम्झौता गरेर १० हजार नर्स राेजगारीका लागि लैजाने प्रस्ताव गरेको हो । मन्त्रालयका सचिव सूर्यप्रसाद गाैतमका अनुसार प्रस्तावमाथि छलफल गरी सम्झाैताकाे खाका बनाउने कामसमेत थालिएकाे छ ।

'नेपाली नर्सका लागि याे प्रस्ताव रोजगारीको राम्रो अवसर हाे', गाैतमले भने, 'अहिले श्रम बजारमा देखिएको बेरोजगारीदर कम गर्न पनि सघाउ पुर्‍याउने छ ।'

कस्ता नर्सले पाउँछन् बेलायतमा जागिर ?

मन्त्रालयका सचिव गाैतमका अनुसार अहिलेलाई अनुभव भएका नर्सले मात्र बेलायत जान पाउने छन् । 'बेलायत विकासित मुलुक हाे । त्यसैले यहाँबाट पठाइने नर्सहरू दक्ष र अनुभवी हुने छन् । बेलायत जाने नर्ससँग नेपालमा पर्याप्त तालिम, केही अस्पतालमा काम गरेकाे अनुभव हुनुपर्ने छ', उनले भने ।

बेलायतका लागि छानिने नर्सकाे मासिक तलब २ लाख ५० हजारभन्दा बढी हुने श्रम मन्त्रालयले जनाएको छ ।

रोजगारीमा बेलायत नर्स पठाउँदा रोजगारीको ग्यारेन्टी, परिवारिक सुविधा, स्वास्थ्यसँगै रोजगार र अन्य बीमा, आतेजाते खर्च, तलब प्रष्ट खुलाएर, उनीहरूको सम्पूर्ण खर्च रोजगारदाता कम्पनीले बेहाेर्नेगरी सम्झौता हुने गाैतमले बताए ।

दुवै देशबीच चाँडै श्रम सम्झौता भए सन् २०२२ को मध्यतिर नर्स रोजगारीमा पठाउन सकिने श्रम मन्त्रालयले जनाएको छ ।

हाल नेपालमा ६० हजारभन्दा धेरै नर्स अध्ययन सकेर बसेका छन् ।

बेलायत पुगेका १० हजारभन्दा बढी विद्यार्थी अध्ययन सकेर उत्तै काम गर्दै बसेका छन् । बेलायतले पहिलोपल्ट यति ठूलो संख्यामा नेपालबाट जनशक्ति लैजाने औपचारिक प्रस्ताव गरेको हो । यसअघि सन् २००५ मा पनि बेलायतले चार हजार नेपाली नर्सलाई जागिर दिने प्रस्ताव गरेको थियो । त्यो बेला नेपालले नै पठाउन सकेन ।

प्रकाशित मिति: शुक्रबार, मंसिर ३, २०७८ २०:४८