अमेरिकासहित तीन देशका राजदूतले रारामा बिताए तीन रात

A+ A A-

नेपालका लागि अमेरिकी राजदूत र्‍यान्डी बेरी, अष्ट्रेलियन राजदूत फेलिसिट भोल्क र बेलायती राजदूत निकोला पोलिगले रारामा तीन दिन बिताएका छन् ।

कात्तिक २८ गते मुगुको रारा ताल पुगेका तीन देशका राजदुतहरू बुधबार (मंसिर) १ गते फर्किएका हुन् । जलवायु परिवर्तनको असरबारे छलफल गरेर राजूतहरू फर्किएको मुगुका प्रमुख जिल्ला अधिकारी रोमबहादुर महतले जानकारी दिए ।

जलवायु परिवर्तनका असरबारे सबैलाई जानकारी होस् भन्ने उद्देश्यले रारा भ्रमण गरेको राजदूत बेरीले अमेरिकन दूतावासको फेसबुक पेजमा उल्लेख गरेका छन् । जलवायु परिवर्तन विनाशकारी भएको र यसले सबै समुदाय र पृथ्वीका सबै कुनालाई असर गर्ने हुँदा अहिले खतराको घण्टी बजेको उनले जनाएका छन् ।

‘रारा ताल नेपालको सबैभन्दा ठूलो र हिमाली क्षेत्रमा अवस्थित ताल हो । यो झन्डै-झन्डै लोप हुन लागेका विभिन्न स्थानीय प्रजातिहरूको बासस्थान पनि हो । जलवायु संकटको यो घडीमा विभिन्न भागका नेपालीहरूले आगलागी, बाढीपहिरो, लगायत भीषण ऋतु परिवर्तनका कारणले बालीनालीमा पर्ने गम्भीर असर लगायत विभिन्न कारण जीविकामा विभिन्न अप्ठ्याराको सामना गर्नुपरेको छ,' उलने भनेका छन्, 'अग्ला भेगमा हुने विभिन्न खाले यस्ता संकटको प्रभाव तल्ला क्षेत्रहरूसम्म पनि पर्ने गर्दछ ।’

उनी अगाडि लेख्छन्, ‘त्यसैले म किन यो यात्रा गर्दैछु त । स्पष्ट छ, म तपाईंहरू सबैलाई यी सबै विषयका बारे अवगत होस् भन्ने चाहन्छु ।’

राजदूत बेरीले दोस्रो दिनको रारा डायरीमा विश्वका विभिन्न देशको सहभागितामा हालै भएको कोप २६ सम्मेलनमा नेपाल सरकारले वनक्षेत्र बढाउने र मिथेन ग्याँस घटाउने लगायतको महत्वाकांक्षी प्रतिवद्धताहरू व्यक्त गरेको कुरालाई स्मरण गराएका छन् । साथै उनले जलवायु परिवर्तनका असरहरू घटाउन व्यक्ति, देश हुँदै विश्वस्तरमा प्रतिवद्धता हुनुपर्ने औँल्याएका छन् ।

आफ्नो रारा भ्रमण समापन गर्दै राजदूत बेरी लेख्छन्, 'नेपाल प्राकृतिक सम्पदाले सम्पन्न छ । कोप २६ मा पेस गरेका महत्वाकांक्षी प्रतिवद्धताले देखाउँछ कि नेपालले प्रकृतिमा आधारित समाधान मार्फत नेतृत्वदायी भूमिका खेल्नसक्छ ।’

राजदूतहरूले राराको अवलोकनसँगै मुर्माटप, मुर्मा गाउँको पनि भ्रमण गरेका थिए ।

एकै पटक तीन देशका राजदूत रारा ताल पुगेपछि राराको पर्यटन प्रवर्द्धनमा समेत टेवा पुग्ने विश्वास पर्यटन व्यवसायीहरूले गरेका छन् ।

कर्णाली प्रदेश उद्योग वाणिज्य संघका अध्यक्ष पदमबहादुर शाहीले तीन ठूला देशका राजदूतहरूको रारा भ्रमणले अन्तर्राष्ट्रिय स्तरमा प्रचार प्रसारमा सहयोग पुग्ने बताए ।

तस्वीरहरू : अमेरिकी दूतावासको फेसबुकबाट लिइएको हो ।

प्रकाशित मिति: बिहीबार, मंसिर २, २०७८ १७:३८