कांग्रेस जिल्ला अधिवेशन : कैलालीका १३ मध्ये ११ पालिकामा संस्थापन समूहकाे कब्जा

कांग्रेस जिल्ला अधिवेशन : कैलालीका १३ मध्ये ११ पालिकामा संस्थापन समूहकाे कब्जा

A+ A A-

नेपाली कांग्रेस कैलालीले १३ वटै स्थानीय तहको नेतृत्व चयन गरेको छ । ८ स्थानीय तहमा निर्वाचनमार्फत र ५ मा सर्वसम्मत रूपमा नेतृत्व चयन गरिएको प्रचार प्रसार संयोजन नृप सुनारले बताए । सुनारका अनुसार कैलालीको धनगढी उपमहानगरपालिकाको सभापति पदमा यज्ञराज उपाध्याय सर्वसम्मत चयन भएका छन् ।

सभापतिमा उपाध्याय चयन भए पनि अन्य पदाधिकारी र सदस्यहरूको टुंगो भने अझै लागेको छैन । जानकी गाउँपालिकामा गणेश रेग्मी, कैलारी गाउँपालिकामा कृष्ण चौधरी, मोहन्याल गाउँपालिकामा कमल साउँद र जोशीपुर गाउँपालिकामा बसिराम चौधरी सभापतिमा निर्वाचित भएका छन् । उनीहरू सबै सर्वसम्मत सभापति चयन भएका हुन् ।

त्यस्तै गौरीगंगाकाे नगर सभापतिमा पहलबिक्रम चन्द, लम्किचुहा नगर सभापतिमा ईन्द्र कुँवर, टीकापुर नगर सभापतिमा नरेश खत्री, भजनी नगर सभापतिमा नवराज मिश्र, गोदावरी नगर सभापतिमा वीरबहादुर चोखाल निर्वाचित भएका छन् ।

यस्तै घोडाघोडी नगरपालिकाको सभापतिमा बमबहादुर सिंह, चुरे गाउँपालिकाको सभापतिमा हेम शाह र बर्दगोरिया गाउँपालिकाको सभापतिमा कृष्ण बिष्ट निर्वाचित भएका छन् । यी पालिकाहरूमा निर्वाचन भएको थियो ।

कैलालीको १३ मध्ये ११ स्थानीय तहमा जिल्ला पार्टी सभापति नरनारायण शाह ‘मनु’ समर्थित उम्मेदवारहरू निर्वाचित भएका छन् । घोडाघोडी र गोदावरीमा उनीइतरका सभापति निर्वाचित भएका छन् ।

घोडाघोडीमा निर्वाचित सिंह यसअघिकाे अधिवेशनमा शाहसँग जिल्ला सभापतिमा पराजित भीम बडुवाल समर्थक हुन् भने गोदावरीमा निर्वाचित चोखाल पूर्व राज्यमन्त्री दीर्घराज भाट समर्थित हुन् ।

प्रकाशित मिति: बिहीबार, मंसिर २, २०७८ ०९:३५