बैंकहरूको ब्याजदरले दोहोरो अंक टेक्यो : सहमति नजुटे पनि अधिकांश वाणिज्य बैंकको रेट एउटै

बैंकहरूको ब्याजदरले दोहोरो अंक टेक्यो : सहमति नजुटे पनि अधिकांश वाणिज्य बैंकको रेट एउटै

A+ A A-

बैंक तथा वित्तीय संस्थाहरूले नयाँ ब्याजदर निर्धारण गर्ने क्रममा सोमबार निकै रस्साकस्‍सी गरे । नयाँ निक्षेप नआएको र प्रणालीमा भएको निक्षेप नै तानातान भइरहेको अवस्थामा बैंकहरूले ब्याजदरमा अस्वस्थ प्रतिस्पर्धा गरेपछि २ कात्तिक र २८ कात्तिकमा नियमक नेपाल राष्ट्र बैंकले ब्याजदरमा हस्तक्षेप नै गरेको छ ।

यस्तो अवस्थामा मंसिरदेखि लागू हुने ब्याजदरको विषयमा सोमबार वाणिज्य बैंकर्सहरूको छाता संगठन नेपाल बैंकर्स संघ, ख वर्गका वित्तीय संस्थाको विकास बैंकर्स संघ र वित्त कम्पनीहरूको संगठन फाइनान्स कम्पनी संघले औपचारिक अनौपचारिक रूपमा छुट्टा-छुट्टै भेट वार्ता राखे । सबैको प्रयास भद्र सहमति गर्नेमा थियो ।

विकास बैंकर्स र फाइनान्स कम्पनीहरूले भद्र सहमति जुटाउन सफल भए पनि वाणिज्य बैंकहरूले सकेनन् । बैंकिङ प्रणालीबाट निक्षेप घटिरहेको अवस्थामा ब्याजदर बढाउदा सबैको सहमति जुट्न नसके एक बैंकको निक्षेप अर्को बैंकका पुग्ने खतरा भएकाले सहमति जुटाउने प्रयास गरिएको थियो ।

वाणिज्य बैंकर्स संघले गरेको अनौपचारिक बैठकमा अधिकांश प्रमुख कार्यकारी अधिकृत (सीईओ) हरूले ब्याजदर यथावत राख्ने प्रस्ताव गरे पनि सहमति जुट्न सकेन । स्रोतका अनुसार बैंकर्स संघको नेतृत्व गरेका कृषि विकास बैंकका सीईओका साथै नबिल बैंक र एनआईसी एसिया बैंकका सीईओले ब्याजदर बढाउनुपर्ने राय राखेका थिए ।

'ब्याजदर बढाउदा बैंकमा रहेको निक्षेप यताउता हुने मात्रै हो अहिलेलाई नबढाउन अर्को महिना अवस्था हरेर विचार गरौला भन्ने राय थियो । केही साथीहरूले बढाउनु पर्छ भन्नुभयो,' एक सीईओले शिलापत्रसँग भने, 'एउटा मात्रै बैंकले ब्याजदर बढाउदा पनि सबैलाई बढाउनु नै पर्ने बाध्यता थियो ।'

बैकर्स संघमा आवद्ध अधिकांश बैंकका सीईओ ब्याजदर नबढाउने पक्षमा रहे पनि केही बैंक बढाउने पक्षमा देखिएपछि वाणिज्य बैंकहरू सबैले नयाँ ब्याजदर सार्वजनिक गरेका छन् । अधिकांश बैंकका सीईओ भद्र सहमति गर्नुपर्ने पक्षमा भएर पनि केही बैंकले नमानेपछि सबै वाणिज्य बैंकले ब्याजदर वृद्धि गरेका छन् ।

यद्यपि राष्ट्र बैंकले २८ कात्तिकमा अघिल्लो महिनाको औसत ब्याजदरमा १० प्रतिशत मात्रै बढाउन पाउने व्यवस्था गरिदिएपछि अधिकांश बैंकको अधिकतम ब्याजदर समान रहेको छ । २४ बैंकले अधिकतम बढाउन सक्ने सीमा १०.५ प्रतिशत ब्याजदर निर्धारण गरेका छन् । तीन वटा बैंक मेगा, स्ट्यान्डर्ड चार्टर्ड र वाणिज्य बैंकको मुद्दति निक्षेपको ब्याजदर ९.९६, ९.५ र ९.११ प्रतिशत रहेको छ ।

विकास बैंक

केन्द्रीय तथा क्षेत्रीयस्तरका सबै विकास बैंकले पनि मंसिरदेखि लागू हुने ब्याजदर तोकेका छन् । सोमबार गरिएको भद्र सहमतिअनुसार राष्ट्रियस्तरका विकास बैंकले १०.२५ र क्षेत्रीयस्तरका विकास बैंकले १०.३० प्रतिशत ब्याजदर तोकेका छन् ।

यता फाइनान्स कम्पनीहरूले पनि भद्र समहतिअनुसार नै नयाँ ब्याजदर तोकेका छन् । फाइनान्स कम्पनीहरूले अधिकतम १०.३५ प्रतिशत ब्याजदर तोकेका हुन् ।

राष्ट्र बैंकले नीतिगत रूपमा कडाइ गरिदिएसँगै कुनै पनि बैंक तथा वित्तीय संस्थाले ११ प्रतिशतसम्म पनि प्याजदर पुर्‍याउन सकेका छैनन् । राष्ट्र बैंकले हस्तक्षेप गर्नुपूर्व कात्तिकको लागि नै कतिपय वाणिज्य बैंकले ११ प्रतिशतभन्दा माथि ब्याजदर तोकेका थिए ।

प्रकाशित मिति: मंगलबार, कात्तिक ३०, २०७८ २१:१२