प्रधानन्यायाधीश जबराको राजीनामाको माग राखेरै बेन्चमा फर्किने भए सबै न्यायाधीश

प्रधानन्यायाधीश जबराको राजीनामाको माग राखेरै बेन्चमा फर्किने भए सबै न्यायाधीश

A+ A A-

प्रधानन्यायाधीश चोलेन्द्र शमशेर जबराको राजीनामा माग्दै बेञ्च बहिष्कार गरिरहेका सबै न्यायाधीश बेन्चमा फर्किने भएका छन् ।

जबराको राजीनामा माग्दै ८ कात्तिकदेखि बेञ्च बहिष्कार गरिरहेका न्यायाधीशहरू बेन्चमा फर्किने भएका हुन् । मंगलबार नेपाल बार एसोसिएसन र सर्वोच्च अदालत बार एसोसिएसनका पदाधिकारीसँगको छलफलमा आन्दोलनरत न्यायाधीशहरूले बेञ्चमा फर्किने बताएका हुन् ।

छलफलमा सहभागी सर्वोच्च अदालत बार एसोसिएसनका सचिव ऋषिराम घिमिरेका अनुसार, जबराको राजीनामा मागिरहेका न्यायाधीशहरूले बन्दी प्रत्यक्षीकरण, मुद्दा फिर्ता, तामेली र मिलापत्रलगायतका मुद्दा हेर्नेगरी बेञ्चमा फर्किने धारणा सुनाएका छन् ।

बैठकपछि न्यायाधीश अनिल कुमार सिन्ह्वाले गोला प्रथामार्फत पेसी तोक्ने काम सुरु नभएसम्म बन्दी प्रत्यक्षीकरण, मुद्दा फिर्ता, तामेली र मिलापत्रसम्बन्धी मुद्दामात्रै आफूहरूले हेर्ने गरी बेन्चमा फर्किने बताए । 'न्यायालय सुधारको माग यथावत छ । गोलाप्रथामार्फत पेसी तोक्ने काम नभएसम्म हामीले प्रधानन्यायाधीश जबरासँग संयुक्त इजलासमा बस्दैनौं,' उनले शिलापत्रसँग भने ।

उनले प्रधानन्यायाधीश जबराले बोलाएको फूलकोर्ट बैठकमा पनि आफूहरू सहभागी हुने बताए । यसअघि जबराको राजीनामा मागिरहेका न्यायाधीशहरूको समूहबाट हिजो मात्रै पाँच जना न्यायाधीश अलग भएका थिए ।

सोमबार प्रधानन्यायाधीशको राजीनामा मागिरहेका समूहका १९ मध्ये न्यायाधीशहरू तेजबहादुर केसी, बमकमार श्रेष्ठ, मनोज शर्मा, कुमार चुडाल र कुमार रेग्मी अलगिएका थिए । यी न्यायाधीशले आजदेखि नै बन्दी प्रत्यक्षीकरणबाहेक अरु मुद्दा समेत हेर्न सुरु गरिसकेका छन् ।

बार पदाधिकारीसँगको छलफलमा पनि १३ जना न्यायाधीश मात्र सहभागी थिए । छलफलमा सहभागी न्यायाधीशहरूले जबराको राजीनामाको माग कायम राखेरै बेन्च फर्किने निर्णय गरेका छन् । यता बारले भने कार्यसमितिको छलफलपछि मात्र बहसमा जाने कि नजाने भन्ने निर्णय गर्ने बताएको छ ।

मंगलबारको छलफलमा विद्रोही न्यायाधीशहरूले गोला प्रथाबाट पेसी तोक्ने प्रक्रिया सुरु नहुँदासम्म प्रधानन्यायाधीशले आफूलाई बेन्च तोक्न नहुने शर्त राखेका छन् । प्रधानन्यायाधीश जबराले मंगलबार आफूलाई पेसी तोकेका थिएनन् ।

जबराको राजीनामा माग्दै भएको आन्दोलनमा कहिले के भयो ?

५ कात्तिक : पूर्वप्रधानन्यायाधीश फोरमले जबराले राजीनामा दिनुपर्ने । नदिए महाभियोगसम्म लगाउन सुझाव दिए ।

८ कात्तिक : सर्वोच्च अदालत बार एसोसिएसनले जबराको राजीनामा माग्दै विज्ञप्ति निकाल्यो ।

८ कात्तिक : पूर्वप्रधानन्यायाधीशहरु मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले जबराको बहिर्गमनको माग गर्दै विज्ञप्ति निकाले ।

८ कात्तिक : १४ जना न्यायाधीशले बेन्च र फूलकोर्ट बहिष्कार गरेर आन्दोलन सुरु गरे ।

९ कात्तिक : नेपाल बार एसोसिएसनले पनि जबराको राजीनामा माग्दै विज्ञप्ति निकाल्यो ।

१२ कात्तिक : जबराको राजीनामा बटमलाइन घोषणा गर्दै नेपाल बार एसोसिएसनद्वारा विरोध कार्यक्रम घोषणा ।

१४ कात्तिक : बारले सर्वोच्च अदालत परिसरमा कालोपट्टी बाँधेर १ घण्टा धर्ना दियो । ‘सम्मानजनक बर्हिगमन’ चाहेको भन्दै जबराले विद्रोही न्यायाधीशसमक्ष प्रस्ताव पठाए । जबरासँग संवाद गर्न न्यायाधीश अनिल कुमार सिन्हा, सपना प्रधान मल्ल र मनोज शर्माको टिम गठन ।

१५ कात्तिक : बन्दी प्रत्यक्षीकरणका मुद्दा हेर्न सुरु ।

२३ कात्तिक : जबराले आफूलाई पनि पेसी तोकेपछि बन्दी प्रत्यक्षीकरणका मुद्दा पनि हेर्न बन्द ।

२५ कात्तिक : सर्वोच्च परिसरभित्रै कानुन व्यवसायीमाथि धरपकड भएपछि जबराविरुद्ध चर्को नारावाजी ।

२६ कात्तिक : सर्वोच्चको मूल गेटमा जबराको प्रवेश निषेध गर्दै धर्ना ।

२९ कात्तिक : जबराले संवादमा आउन आन्दोलनरत बारलाई आह्वान गरे ।

२९ कात्तिक : पूर्वन्यायाधीश फोरमले जबराको बहिर्गमन अनिवार्य भएको भन्दै विज्ञप्ति निकाल्यो ।

२९ कात्तिक : ५ जना न्यायाधीशले आन्दोलनको कित्ता छाड्दै जबराविरुद्धको आन्दोलनमा नबस्ने घोषणा गरे ।

३० कात्तिक : आठवटा संवैधानिक आयोगले संयुक्त विज्ञप्ति जारी गरेर नागरिकलाई न्यायको हकबाट बञ्चित नगराउन । वार्ता र संवादको माध्यमबाट समस्या हल गरेर नियमित मुद्दा सुनुवाइ गर्न आग्रह गरे ।

३० कात्तिक : जबराको राजीनामा माग्दै बेन्च बहिष्कार गरिरहेका न्यायाधीश बेन्चमा फर्किने निर्णय ।

प्रकाशित मिति: मंगलबार, कात्तिक ३०, २०७८ २१:३०