'मलाई आफ्नो कथा भन्न मन थियो, त्यसका लागि संगीत रोजेँ'

A+ A A-

कक्षा १२ को परीक्षा दिएपछि देवेन्द्र बब्लुले नेपालमा आफ्नो भविष्य देखेनन् । उनले जापान जाने सोंच बनाए । भाषा पढे अनि विदेशिने प्रक्रिया सुरु गरे । उनको रहर एउटै थियो, 'ठूलो जहाज चढेर जापान पुग्ने ।'

तर, सोचेजस्तो सजिलो कहाँ छ र ? जापानले देवेन्द्रलाई भिसा दिएन । जापानले भिसा नदिँदा दुःखी थिए, उनी ।

भिसा नलागेर राम्रै भयो । जापान पुगेको भए उनले कहाँ गीत कोर्थे होलान् र ? किन संगीत सिर्जना गर्थे होलान् र ? गाउने र अभिनय गर्ने फुर्सद कहाँ मिल्थ्यो होला र ?

देवेन्द्र पनि मान्छन्, 'जापान पुगेको भए मलाई गीत–संगीतको कीराले टोकिरहने रहेछ । धन्न जान पाइनँ ।'

'अझै केही राम्रा सिर्जना गर्न सकेँ भने त कन्सर्टका लागि जाऊँला नि जापान त', देवेन्द्र यस कुरामा ढुक्क सुनिन्छन् ।

०००

देवेन्द्र बब्लु गीत-संगीतको दुनियाँमा नामी बनिरहेका छन् । एकपछि अर्को सफल गीत दिइरहेका देवेन्द्र सांगीतिक दुनियाँमा स्थापित हुने दाउमा छन् ।

लकडाउनको समयमा देवेन्द्रको खुबै चर्चा चल्यो । उनले तयार गरेको गीत 'म हाँसे हाँस्छौ र ?' सामाजिक सञ्जालमा निकै हिट बनेपछि देवेन्द्रको चर्चा चुलियो । सरल भाषामा तयार भएको यस गीतबाट देवेन्द्रले आफ्नो परिचय बृहत् बन्दै गरेकाे महसुर गरे ।

'म हाँसे हाँस्छौ र ?' अगाडि पनि देवेन्द्रका गीतहरू हिट नभएका होइनन् । उनले 'कसरी', 'बुढाबुढी', 'एक्लै जान सक्छौ र ?' जस्ता गीत सार्वजनिक गरिसकेका थिए । तर, 'म हाँसे हाँस्छौ र ?' बाेलकाे गीत उनको करिअरमा कोसेढुंगा सावित भयो ।

देवेन्द्र स्वीकार्छन्, 'यसै गीतबाट मलाई धेरैले चिन्न थाले ।'

लकडाउनकै समयमा देवेन्द्रको अर्को गीत पनि हिट भयो, 'भेटै हुन्न कि... !'

यस गीतलाई पनि उनले निकै सरल शैलीमा बुने । आफूले भोगेको, देखेको, सुनेको कुरालाई उनले गीतमा रचे । सरल धुन भरे । एउटा साधारण भिडियो पनि बनाए ।

सोही सामान्यपनलाई नै दर्शक-स्रोताले रुचाए । देवेन्द्रलाई यस गीतले थप परिचित गरायो ।

यसबीचमा आएका 'मायाले नि केके गर्च गर्च', 'मायालु, दिल दुखो'ले सोचेझैँ सफलता पाएनन् । पछिल्लो समय उनले सार्वजनिक गरेको 'मनमाया' भने चर्चामा छ ।

'मनमाया' गीतमा प्रयोग भएका शब्द तथा भिडियोको कथालाई दर्शक-स्रोताले रुचाएका छन् । देवेन्द्रले भिडियोमा २६ वर्षे पुरुष र ३६ वर्षे महिलाबीच प्रेम बसेको कुरालाई भिडियोमा उतारेका छन् । देवेन्द्रकै निर्देशनमा बनेको भिडियो रोचक शैलीमा बुनिएको छ ।

गीत तथा भिडियोले पाइरहेको प्रशंसा देख्दा खुसी छन्, देवेन्द्र । उनी भन्छन्, 'सबैले रुचाएका छन् । राम्रो प्रतिक्रिया मिलिरहेको छ । यसमा खुसी नहुने कुरै भएन ।'

देवेन्द्र सुरुमा कथा लेख्छन् । त्यसमा पात्र छान्छन् । अनि बल्ल गीतको शब्द कोर्छन् । गीत बनेपछि मात्र भिडियोको काम सुरु गर्छन् ।

मनमाया बनाउँदा भने उनले आफैँले बनाएकाे याे नियम ताेडेछन् । ताेड्दा यस्ताे भयाे – सुरुमा कथा लेखे, भिडियो खिचे । बल्ल गीतका शब्द कोरे ।

देवेन्द्र भन्छन्, 'मलाई कथा भन्न मन थियो । सर्ट फिल्म बनाएर रिलिज गर्ने कि भन्ने पनि साेचेँ । तर, अन्तिममा मेरो भावनालाई गीत-संगीतबाटै व्यक्त गरेँ ।'

'मनमाया'ले युट्युबमा साढे ६ लाख बढी भ्युज पाइसकेको छ ।

'अलराउण्डर' देवेन्द्र

देवेन्द्र गायक मात्र होइनन् । उनी गीतकार हुन्, संगीतकार हुन्, अभिनेता हुन्, निर्देशक हुन् । एउटा म्युजिक भिडियो तयार हुन चाहिने सम्पूर्ण पक्षमा देवेन्द्रले काम गर्छन् । कामको लागि काम होइन, न्यायपूर्ण ढंकबाट काम गर्छन् देवेन्द्र ।

हरेक पक्षमा काम गर्दा उनलाई रमाइलो लाग्छ । 'गीत लेख्दा नै कथा सोचिएको हुन्छ । त्यसैले भिडियोमा पनि आफैँ निर्देशन गर्छु । आफूले तयार गरेको कथाको लोभ लागेर अभिनय पनि गरेको हुँ', देवेन्द्र मुस्कुराए ।

अलराउण्डर भएर काम गर्दा पनि विशेषत देवेन्द्रलाई संगीतमै रमाइलो लाग्छ । संगीत गर्दा नै उनी सन्तुष्ट हुन्छन् । देवेन्द्र भन्छन्, 'मेरो वशेष रुचि संगीतमा नै हो । नाटकमा निर्देशन कला पनि सिक्‍न पाइएकाले त्यसको सदुपयोग मात्र गरेको हुँ ।'

देवेन्द्र नाट्यकलाबाट संगीतमा फड्किएका कलाकार हुन् । उनले थिएटरमा तीन वर्षभन्दा लामो समय बिताएका छन् । कुनै नाटकमा उनी अदृश्य भएर काम गरे, कुनै नाटकमा उनी देखिए पनि ।

देवेन्द्रले संगीतमा रुचि राख्ने थिएटरमा सबैलाई थाहा थियो । त्यसैले नाटकमा पनि उनलाई संगीत पक्षमा बढी खटाइन्थ्यो । आखिर थिएटरमा नै संगीत गरेकाले उनले संगीत क्षेत्रमा डेब्यु गरेका थिए ।

देवेन्द्रले आफ्नाे पहिलो गीत 'कसरी' एक नाटकका लागि तयार गरेका थिए । नाटक हेरेका जो कोहीले पनि उक्त गीतलाई रुचाए । अन्तत: उनले सोही गीतलाई रेकर्ड गरेर सार्वजनिक गरे । उक्त गीतबाट नै देवेन्द्रले चर्चा पाएका थिए ।

आमा नै संगीतको गुरु

बाग्लुङमा जन्मिएका देवेन्द्र घाँस-दाउरा गर्दै हुर्किए । घाँस-दाउरा गर्दाको साथी बनिन्, आमा ।

आमा गीत-संगीतको सोखिन । घाँस-दाउरा गर्दा उनले वनपाखा घन्काउथिन् । देवेन्द्र आमालाई साथ दिन्थे ।

देवेन्द्र आफ्नो गुरु नै आमालाई मान्छन् । भन्छन्, 'आमाले गाएको सुनेर नै मैले गाउन सुरु गरेको हुँ । जे जति सिकेको छु, उहाँसँगै सिकेँ ।'

यत्तिका हिट गीत दिइसकेका देवेन्द्रले संगीतका लागि भने कुनै औपचारिक कक्षा लिएका छैनन् । उनी यस्ता उदाहरण हुन्, जसलाई हेरेर भन्न सकिन्छ, 'संगीत गर्न औपचारिक कक्षा होइन, लगाव र मिहिनेत चाहिन्‍छ ।'

देवेन्द्र गीत-संगीतमा जम्दै गर्दा आमा निकै खुसी छिन् । आफ्नो सपना छोराहरुले पूरा गरिरहँदा उनी खुसी नहुने कुरै छैन ।

सांगीतिक दुनियाँमा आफ्नो अलग पहिचान बनाएका गायक प्रकाश सपुत देवेन्द्रका आफ्नै दाइ हुन् । लोक-दोहोरीको क्षेत्रमा प्रकाश चम्किलो तारा बनेका छन् । उनले बनाउने फरक शैलीका गीतलाई दर्शक-स्रोताले रुचाएका छन् ।

उनै प्रकाश सांगीतिक क्षेत्रमा थिए, र त देवेन्द्रलाई पनि सांगीतिक क्षेत्रमा प्रवेश गर्न सहज भयो । देवेन्द्र भन्छन्, 'दाइ हुनुहुन्थेन भने सायद मैले सांगीतिक क्षेत्रमा प्रवेश गर्ने आँट गर्दिनँ थिएँ होला ।'

देवेन्द्रले गीत–संगीतबाट आफ्नाे परिचय त बनाएकै छन् । तर त्योसँगै जोडिने उनको अर्को परिचय छ- प्रकाश सपुतको भाइ ।

यो परिचयले देवेन्द्र दुःखी छैनन् । उनी भन्छन्, 'मेरो गीत–संगीतले चिनाउन नसकेको दर्शकमाझ पनि म दाइको पहिचानले परिचित भएको छु । त्यो खुसीको कुरा हो ।'

प्रकाशको भाइ भएकै कारण आफ्ना सिर्जनाहरूमा दर्शक-स्रोताको नजर पर्ने गरेको देवेन्द्रले सुनाए । 'भाइले कस्तो गाएछ भनेर पनि मेरो सिर्जनालाई दाइले हेरिदिनुहुन्छ', देवेन्‍द्र भन्छन्, 'दाइकै कारण मेरा दर्शक बढेका छन् ।'

तर, देवेन्द्रमा एउटै डर छ– 'दाइको जत्तिकै राम्रो सिर्जना गर्न नसक्ने हुँ कि !'

देवेन्द्र भन्छन्, 'यही डरले पनि मलाई थप मिहिनेत गर्न प्रेरित गर्छ । यसलाई पनि म सकारात्मक नै मान्छु ।'

प्रकाशका जति पनि हिट गीत छन् ती सबैकाे भिडियाेमा भाइ देबेन्द्रकाे पनि याेगदान छ । प्रकाशको हिट गीत 'बोल माया', 'गलबन्दी', 'दोहोरी ब्याटल', 'बदला बरिलै', 'यो देश' लगायतमा उनले सहायक निर्देशक बनेर दाइलाई साथ दिएका छन् । प्रकाशको 'नमस्कार' बोलको म्युजिक भिडियोमा भने देवेन्द्रले निर्देशक नै बनेर काम गरेका छन् ।

यति मात्र होइन, देवेन्द्रले निर्देशन गर्ने धेरै भिडियोमा प्रकाशले अभिनेताका रूपमा काम गरेका छन् । देवेन्द्र भन्छन्, 'दाइ र मैले धेरै काममा सहकार्य गरेका छौँ । हामी एक-अर्काको सल्लाह लिएर नै काम गरिरहेका हुन्छौँ ।'

फिल्ममा पनि देवेन्द्र

संगीतमा जमिरहेका देवेन्द्रलाई फिल्ममा पनि काम गर्ने रहर थियो । फिल्मको ठूलो पोस्टरमा आफ्नो अनुहार देख्ने उनको सपनाजस्तै थियो ।

देवेन्द्र उक्त सपनाबाट टाढा छैनन् । दाइ प्रकाशले नै डेब्यु गर्न लागेको फिल्म 'परदेशी २' बाट देवेन्द्र पनि फिल्मी दुनियाँमा उदाउने तरखरमा छन् । तर, यस फिल्ममा भने उनको खासै ठूलो भूमिका छैन ।

लकडाउनमा नै देवेन्द्रले नयाँ फिल्म सम्झौता गरे, 'गणपति' । यस फिल्ममा भने देवेन्द्र मुख्य भूमिकामा छन् । फिल्मको छायांकन सकिसकेको छ । यस फिल्मका लागि देवेन्द्रले एउटा गीतको जिम्मासमेत लिएका छन् ।

देवेन्द्र आफ्नो फिल्म यात्रालाई लिएर उत्साहित छन् । उनी भन्छन्, 'आफूलाई रहर लागेको काम गर्न पाएको छु । काम राम्रै पनि भएको छ । आशा छ, फिल्ममा पनि मलाई दर्शकहरूले स्वीकार्नुहुनेछ ।'

फिल्ममा काम गरे पनि गीत-संगीतलाई भने निरन्तरता दिने सोचमा छन्, देवेन्द्र ।

फोटो : सुशील श्रेष्ठ

प्रकाशित मिति: सोमबार, कात्तिक २९, २०७८ १४:११