अनि प्रधानन्यायाधीश जबरामाथि खनिए वकिल...

A+ A A-

प्रधानन्याधीश चोलेन्द्र शमशेर जबराको राजीनामा माग्दै न्यायिक वृत्त आन्दोलित भएको १९ दिनमा पुग्दा सर्वाेच्च अदालत परिसरमा झडपकाे दृश्य देखापरेकाे छ ।

१४ कात्तिकदेखि नेपाल बार एसोसिएसन प्रधानन्याधीश जबराको राजीनामा माग्दै सर्वोच्च अदालत परिसरमा दैनिक एक घण्टा धर्ना दिइरहेको छ । आज पनि साढे १० बजेतिर पाखुरामा कालोपट्टी बाँधेर कानुन व्यवसायी सर्वोच्चसँगै जोडिएको बारको आँगनमा भेला भए ।

'प्रधानन्यायाधीश राजीनामा देऊ' लेखिएको कालो व्यानर बोकेर कानुन व्यवसायी सर्वोच्च अदालतको आँगनमा पुगे । यस अगाडि पनि कानुन व्यवसायी यसरी नै बारको आँगनमा भेला भएर सर्वोच्चको आँगनमा जान्थे । एक घण्टा धर्ना दिएर फर्किन्थे ।

प्रधानन्यायाधीश जबरा विवादमा तानिएदेखि नै सर्वोच्च परिसरमा सुरक्षाकर्मीको उपस्थिति बाक्लो छ । सादा पोशाकमा रहेका सुरक्षाकर्मीको संख्या पनि उल्लेख्य छ । तर, आज भने कानुन व्यवसायी धर्ना दिन भन्दै सर्वोच्चको आँगनमा पुगेसँगै प्रहरीले अवरोध गर्‍यो । सर्वोच्चको आँगनमै कोणसभा गर्न खोजिरहेका कानुन व्यवसायीलाई प्रहरीले रोक्न खोज्यो ।

त्यसपछि बारका अध्यक्ष चण्डेश्वर श्रेष्ठले सुरक्षाकर्मीसँग संवाद गर्न खोजे । तर, सुरक्षाकर्मीसँग संवाद गर्न उभिएका श्रेष्ठ र धर्नाका लागि भेला भएका कानुन व्यवसायीलाई प्रहरीले घेराउ गर्‍याे । केही सुरक्षाकर्मीले कानुन व्यवसायीको पाखुरामा समाउँदै कुराकानी गर्न खोजेपछि कानुन व्यवसायी आक्रोशित भए । आफूहरू शान्तिपूर्ण धर्ना कार्यक्रमका लागि उभिएको भन्दै प्रहरीसँग हारगुहार गरिरहे कानुन व्यवसायीले । तर, लाठी र अश्रुग्याँस प्रहार गर्ने ‘गन’सहित सर्वोच्च परिसरमा उभिएका प्रहरीले कानुन व्यवसायीको कुरा सुनेनन् ।

त्यसपछि कानुन व्यवसायीले शान्तिपूर्ण कार्यक्रम गर्न पाउनुपर्ने भन्दै नारा लगाउन सुरु गरे । अनि प्रहरीले पनि लाठीको छेकबार लगाउँदै कानुन व्यवसायीलाई रोक्ने प्रयास गर्‍यो । त्यसपछि आक्रोशित कानुन व्यवसायी र प्रहरीबीच केहीबेर घम्साघम्सी पर्‍यो । घम्साघम्सीमा नेपाल बार एसोसिएसनकी उपाध्यक्ष रक्षा बस्याल, महासचिव लीलामणि पौडेलसहित पाँच जना कानुन व्यवसायी सामान्य घाइते भए ।

बारका पूर्वउपाध्यक्ष कुमार शर्मा आचार्य, केन्द्रीय सदस्य प्रकाश महर्जन, पूर्व केन्द्रीय सदस्य रमन कर्ण, पाटन उच्च अदालत बारका सदस्य मुकुन्द भट्टराईलगायतका कानुन व्यवसायी सामान्य घाइते भए । प्रहरीसँगको रस्साकस्सीबीच कानुन व्यवसायीले प्रधानन्यायाधीश जबराविरुद्ध केही चर्का र गम्भीर आराेपसहितका नाराबाजी गरे ।

‘प्रहरी दमन मुर्दावाद !’

‘विचौलियाको नाइके चोलेन्द्र राजीनामा दे !’

यस्ता नारा लगाउँदै कानुन व्यवसायी प्रहरीसँग भिडिरहे । प्रहरीले पनि थप जनशक्ति मगाएर सर्वोच्च परिसर घेर्‍यो । सर्वोच्च परिसर बाहिर पनि प्रहरीको संख्या थपियो ।

प्रहरीसँगको घम्साघम्सीमा वयोवृद्ध वरिष्ठ अधिवक्ता कृष्णप्रसाद भण्डारीलाई जोगाउन हम्मे-हम्मे पर्‍यो कानुन व्यवसायीलाई । प्रहरीसँग रस्साकस्सी चलिरहँदा दुई जना कानुन व्यवसायीले भण्डारीलाई हातको घेराभित्र पारेर त्यो घम्साघम्सीबाट बाहिर ल्याउन खोजे ।

तर, छेकबार बनेर बसेका प्रहरीले वयोवृद्ध अधिवक्तालाई पनि रोकेर राखे । त्यहीबेला पछाडिबाट कानुन व्यवसायीको हुल प्रहरीसँग ठेलमठेलम गर्दै अगाडि बढ्यो । ९६ वर्षे अधिवक्तालाई सुरक्षित स्थानतर्फ जान प्रहरीले रोकेपछि उनलाई सुरक्षा दिइरहेका अधिवक्ता प्रहरीसँग आक्रोशित भए ।

‘तिम्रो प्रधानन्यायाधीशको पनि गुरु हो, उहाँ । उहाँलाई त जान देऊ,’ ती कानुन व्यवसायीले आक्रोशित हुँदै भने । तर, प्रहरीले बाटो नछाडेपछि कानुन व्यवसायीले भण्डारीलाई पार्किङमा राखिएको गाडीको चेपबाट छिराएर सर्वोच्चको पेटीमा पुर्‍याए ।ठेलमठेलमा च्यापिएका भण्डारी पेटीमा थुचुक्क बसेर सुस्ताउन थाले ।

यता कानुन व्यवसायी र प्रहरीको घम्साघम्सी चलिरह्यो । घम्साघम्सीमाझ कानुन व्यवसायी आँगनमै पलेटी कसेर बसे । त्यसपछि पनि प्रहरीले चारैतिर घेरा हालेपछि बारका अध्यक्ष चण्डेश्वर श्रेष्ठले प्रहरीलाई आग्रह गरे, ‘हामी यहाँ ढुंगामुढा गर्न आएका होइनौं, तपाईंहरू दुई मिटर पर बस्नुहोस् ।’

श्रेष्ठले बोली नसक्दै कानुन व्यवसायीले नारा लगाउन सुरु गरे, ‘प्रहरी दमन मुर्दावाद !’

यसअघि नाराबाजी नगरी आन्दोलन गरिरहेका कानुन व्यसायीले प्रधानन्यायाधीश जबरालाई लक्षित गरेर नारा लगाउन सुरु गरे, ‘विचौलियाका नाइके चोलेन्द्र राजीनामा दे !’

‘प्रधानन्यायाधीश मुर्दावाद !’

‘भ्रष्ट प्रधानन्यायाधीश राजीनामा दे !’

‘हाम्रो आन्दोलन जारी छ !’

र, त्यसपछि सर्वोच्चको आँगनमै पलेटी कसेर बसे कानुन व्यवसायी । अनि कानुन व्यवसायीले प्रधानन्यायाधीशलाई ‘सम्माननीय’ नभन्ने घोषणा गरे । त्यसपछि विराेध सभालाई सम्बाेधन गर्दा बारका पदाधिकारी र कानुन व्यावसायीले प्रधानन्यायाधीशप्रति अशाेभनीय भाषा प्रयाेग गरे ।

प्रधानन्यायाधीशलाई सम्बोधन गर्दा सम्माननीय भन्ने चलन छ । प्रधानन्यायाधीश जबराले सम्माननीय पदलाई नै असम्माननीय बनाएको भन्दै कानुन व्यवसायीले सम्माननीय नभन्ने घोषणा गरे । अनि पलेटी कसेर बसेका कानुन व्यवसायीलाई सम्बोधन गर्न अगाडि उभिए नेपाल बारका अध्यक्ष श्रेष्ठ । प्रहरीसँगको ठेलमेलमा असिनपसिन भएका श्रेष्ठको स्वर सुकिसकेको थियो । उनले प्रधानन्यायाधीश जबरालाई चुनौती दिए, ‘प्रहरी खटाएर हामीमाथि दमन गरेर हाम्रो आन्दोलन कमजोर हुँदैन । हिम्मत छ भने यहाँ आएर हामीसँग कुरा गर ।’

‘हिजो निरंकुश राजा त हटायौं । साढे दुई वर्ष हामी विचौलियाबाट ग्रसित भयौं, भ्रष्टाचारमा लिप्त हुँदा पनि हामी मौन बस्यौं,’ श्रेष्ठ रोकिएनन्, ‘रञ्जन कोइरालाको फैसलामा नागरिकले आन्दोलन गर्दा हामीले जबरा सुध्रेलान् भन्ने ठानेर आन्दाेलन नगर्न भनेका थियाैं । तर, अब हामी नै हटाउँछौँ चाेलेन्द्रलाई ।’

श्रेष्ठपछि सर्वोच्च बारका अध्यक्ष पूर्णमान शाक्यले नारा लगाए, ‘विचौलियाको नाइके राजीनामा दे !’ ‘सर्वोच्च अदालत छोडेर जा !’

जबराको राजीनामाले मात्र नहुने अब पदच्युत गराउनुपर्ने भन्दै बारका अध्यक्ष आक्रोशित सुनिए । उनले भने, ‘विचौलिया, भ्रष्टाचारीको संरक्षण चोलेन्द्रले नै गरिरहेकाे छ । त्यसैले हामी उसकाे राजीनामा मागिरहेका छौँ । अब राजीनामाले मात्र हुँदैन पदच्युत गराऔँ ।’

पलेटी कसेर बसेका कानुन व्यवसायीले स्वर खापे, ‘पदच्युत गराऊँ’

सर्वोच्च अदालतको आँगनबाट कानुन व्यवसायीहरू फेरि बारको आँगनमा फर्के । आफूहरूमाथि गरेको धरपकडको विरोधमा शुक्रबार सर्वोच्च अदालतका न्यायाधीशलाई बेञ्चमा नजान बारले आग्रह गर्‍यो ।

सर्वोच्च अदालत बार र नेपाल बारले एकैसाथ घोषणा गर्‍यो, ‘भोलि (शुक्रबार) प्रधानन्यायाधीश जबरालाई अदालत प्रवेश गर्न नदिने ।’

सधैँ शान्त र सौम्य देखिने बारका अध्यक्ष आज निकै आक्रोशित भए । सधैँ इजलासकाे बहसमा चर्काचर्की गर्ने कानुन व्यवसायी आज भने सर्वाेच्चकाे प्रांगणमा प्रहरीसँग धक्कामुक्कामा उत्रिए । जबरालाई अदालत प्रवेश गर्न नदिने भन्दै बार अध्यक्ष श्रेष्ठले थपे, ‘प्रधानन्यायाधीशलाई गेटबाट भित्र छिर्न नदिन भोलि सबै साथीहरूलाई सर्वोच्च गेटमा भेला हुन अनुरोध गर्दछु । नागरिकहरू पनि अब सडकमा आए हुन्छ ।’