अनि निरुता सिंह नेपाल छोडेर मुम्बईतिर लागिन्

A+ A A-

सन् २०११ सम्म निरुता सिंह नेपाली फिल्म क्षेत्रकी चल्तीकी अभिनेत्री थिइन् । उनका फिल्महरू दर्शकले रुचाइरहेका थिए । निर्माताहरूकाे राेजाइमा पनि निरुता नै थिइन् ।

फिल्म क्षेत्रमा चल्दाचल्दै निरुता मुम्बईतिर लागिन् । नेपालमा निरुताको खोजी नभएको होइन, तर उनी लामो समय मुम्बईमा गुमनामजस्तै भइन् ।

निरुता आफूले ठीक समयमा नै फिल्म क्षेत्रबाट विश्राम लिएको बताउँछिन् । फिल्म क्षेत्रलाई अपमान गर्ने व्यक्तिहरू बढी सक्रिय भएका कारण आफू मुम्बई पुगेको उनको भनाइ छ ।

भन्छिन्, 'फिल्म क्षेत्रलाई अपहेलना गरेर स्वार्थका लागि मात्र धेरै मानिस आए । उहाँहरूको सोच नै नराम्रो थियो । त्यसैले मैले काम गर्न सकिनँ र मुम्बईतिर लागेँ ।’

निरुताका अनुसार त्यो समय हिरोइन च्याप्न पाउने आसमा फिल्म बनाउन आउने निर्माताहरूको विगविगी थियो । बुझेका, पढेका निर्देशकहरू पनि थिएनन् । राम्रो फिल्म बन्न छाडेपछि निरुताले पनि फिल्म क्षेत्र छाड्ने निर्णय गरेकी थिइन् ।

'हामीले पूजेको क्षेत्रमा यस्ता फोहरहरू सल्बलाएका थिए । त्यस्तोमा कसरी काम गर्न सकिन्थ्यो र ?', निरुता भन्छिन्, 'म त हिनताबोध भएर मुम्बई पुगेकी थिएँ ।'

निरुता झण्डै आठ वर्ष नेपाली फिल्म क्षेत्रबाट टाढा रहिन् । त्यो समय नेपाली फिल्म क्षेत्रलाई निकै याद गरेको निरुताले सुनाइन् ।

'दाल भात तरकारी'को दृष्यमा निरुता र हरिवंश आचार्य ।

सुखद् भएन कमब्याक

लामो समयको विश्रामपछि दर्शकले निरुतालाई फिल्म 'नाई नभन्नु ल ५' मा झुलुक्क देख्न पाए । तर, उक्त फिल्ममा निरुताको गोस्ट रोल मात्र थियो ।

मह जोडीले बनाएको फिल्म 'दाल भात तरकारी'मा भने निरुता मुख्य भूमिकामा देखिइन् । सोही फिल्मलाई निरुता आफ्नो कमब्याक फिल्म मान्छिन् । तर, निरुताको लागि कमब्याक खासै सुखद् रहेन ।

व्यापारिक रूपमा औसत यस फिल्मले समीक्षात्मक रूपमा भने धेरै गाली खेप्नुपर्‍यो । निरुता पनि गालीको हिस्सेदार बनिन् । उनको अभिनयमाथि धेरैले प्रश्न तेर्स्याए । उनको अभिनय चर्को भएको भन्दै आलोचनासमेत भयो ।

निरुता भन्छिन्, 'केही आलोचनाहरू पनि भए, केही राम्रो पनि भयो । उक्त फिल्मले मलाई नयाँ अडियन्ससम्म पुर्‍यायो । मह जोडीसँग काम गर्ने अवसर जुरायो । यसलाई म राम्रो मान्छु ।'

मुम्बईमा नै रहेको समय निरुताले पछिल्लो पुस्ताका चल्तीका हिरो अनमोल केसीसँग काम गर्ने इच्छा देखाएकी थिइन् । निरुताले उक्त इच्छा पनि पूरा गर्न सकिनन् । फिल्म 'क्याप्टेन'को एक गीतमा निरुताले अनमोल र अनमोलका पिता भुवन केसीसँग ठुम्का लगाइन् ।

निरुताले यस बीचमा केही फिल्मको अफर पाइरहेकी छिन् । तर, निरुताले महँगो पारिश्रमिक माग्दा निर्माताहरू उनीबाट पछि हटिरहेका छन् । यसअर्थ, निरुताको कमब्याक खासै सुखद् भने छैन ।

त्‍यो क्रेज...

कलिलो उमेरमा नै निरुताले एउटा सपना देखेकी थिइन्, 'तुलसी घिमिरेले बनाएको फिल्मकी हिरोइन बन्ने ।'

निरुता र तुलसीको पारिवारिक सम्बन्ध थियो । सोही सम्बन्धबाट निरुताले तुलसीको फिल्म खेल्ने अवसर पाइन् ।

निरुता सम्झिन्छिन्, 'तुलसी सरले दक्षिणा फिल्म बनाउन लाग्नुभएको रहेछ । हिरोइनका लागि मेरो अंकलसँग कुरा गरेपछि अंकलले नै मलाई देखाइदिनुभएछ । फोटो हेरेपछि तुलसी सरले पक्का गर्नुभएको रहेछ । म त त्यो सुनेर दंग परेकी थिएँ ।'

फिल्ममा अनुबन्धित त भइन्, तर काम गर्न नसक्ने हो कि भन्ने डरले निरुतालाई सताइरहेको थियो । तर, पहिलो टेकमा नै निरुताले निकै राम्रो अभिनय गरिन् । तुलसीले तारिफ गर्दा निरुता फुरुङ्गै भइन् ।

'दक्षिणा' निकै सफल भयो । उक्त फिल्मपश्चात् निरुताले करिअरमा पछाडि फर्केर हेर्नु परेन । 'दर्पण छाया'मा काम गरेपछि त निरुताको करिअर नै कायापलट भइदियो ।

'मेरो करिअरमा म कहिल्यै खाली हात बस्नु परेन', निरुता भन्छिन्, 'बरू मैले समय नमिलेका कारण धेरै फिल्महरू अस्वीकार गर्नु परेको थियो ।'

निरुता करिअरको उच्च बिन्दुमा थिइन् । त्यो बेला एउटा कथन निकै हिट थियो, 'निरुता रुँदा, निर्माता हाँस्छन् ।'

निरुता उक्त कुरालाई स्विकार्छिन् । 'प्राय: फिल्ममा मेरो रुन्चे नै भूमिका हुन्थ्यो । जो कोही निर्देशकले पनि मलाई रुवाउनुहुन्थ्यो । म रोए फिल्म हिट हुन्छ भन्थे', निरुताले हाँस्दै विगत सम्झिइन् ।

त्यहीँ रुन्चे भूमिका गरेकै कारण आफूलाई धेरै दर्शकले माया गरेको उनको बुझाइ छ । निरुता भन्छिन्, 'म रुँदा, मायालु देखिँदा दर्शकको मन पग्लिन्थ्यो । उहाँहरूले मलाई आफ्नै परिवारजस्तो सम्झिनुहुन्थ्यो । त्यो मेरो सफलता हो ।'

फरक रूपमा दर्शकमाझ

नृत्यमा पोख्त निरुता अब डान्सिङ रियालिटी शो 'डान्स च्याम्पियन' को जजका रूपमा देखिने छिन् । छिट्टै प्रशारणको तयारीमा रहेको शोका लागि निरुता अहिले नेपाल आएकी छन् ।

पहिलो पटक रियालिटी शोको निर्णायक बन्न पाएकोमा निरुता हर्षित छिन् । भन्छिन्, 'म केही फरक ढंगबाट दर्शकमाझ आउँदैछु । यसले मलाई उत्साहित बनाएको छ । अब मलाई तपाईंहरूको साथ र हौसला चाहिएको छ ।'

शोसँगै केही फिल्मबाट पनि कुरा आइरहेको र मिलेसम्म फिल्ममा पनि काम गर्ने निरुताले प्रस्ट्याइन् ।

प्रकाशित मिति: शुक्रबार, कात्तिक २६, २०७८ ०८:००