विद्यार्थी नेता आले भन्छन्- मेवा खेतीबाटै वार्षिक ३० लाख कमाउने हाे

A+ A A-

तनहुँकाे व्यास नगरपालिका-१३ बेलबासका बसन्त आले विद्यार्थी नेता भनेर परिचित छन् । तर अब उनी आफूलाई विद्यार्थी नेतासँगै व्यवसायिक किसान भनेर पनि चिनाउन लागिपरेका छन् ।

आलेले तनहुँको पोखरी भञ्ज्याङमा २ सय ९० रोपनी बाँझो जमिन भाडामा लिएर मेवा खेती थालेका छन् । ताइवान रेडलेडी ७ सय ८६ जातका मेवाका बिरुवा ल्याएर उनले खेती सुरु गरेका हुन् ।

पहिले परिवर्तनका लागि राजनीति गरिएकाे बताउँदै उनले अब कृषिमा क्रान्ति ल्याउन मेवा खेती सुरु गरेकाे बताए । आलेले नेपाल विद्यार्थी संघको जिल्ला अध्यक्ष तथा केन्द्रीय सदस्य रहेर काम गरिसकेका छन् ।

‘दुई सय ९० रोपनी बाँझो जमिन भाडामा लिएर दुई हजार बिरुवा हुर्किए । थप पाँच हजार बिरुवा लगाउने काम भइरहेको छ’, उनले भने, ‘समय र मौसमले साथ दिए वार्षिक ३० लाखभन्दा बढी मेवा खेतीबाटै आम्दानी गर्ने लक्ष्य राखेकाे छु ।' आफू मात्र नभएर अन्य राजनीतिकर्मीहरूलाई पनि कृषिमा लाग्ने प्रेरणाका लागि यो पेशामा आएको उनको तर्क छ ।

फल राम्रो लाग्ने र बिक्रीको लागि १५ दिनसम्म नकुहिने भएका कारण ताइवानबाट बिउ ल्याएर मेवा खेती गरेको उनले बताए । स्थानीय जातको मेवा दुई/तीन दिन पनि टिकाउ नहुने र कुहिने भएकोले नयाँ जातको मेवाको बिरुवा विदेशबाट ल्याएर रोपेको उनको भनाइ छ ।

हाल नेपालको बजार भारतीय मेवामै निर्भर छ । नेपालमा मेवा खेती गरेर उत्पादन गर्न हो भने भारतीय बजारको निर्भरता घट्ने आलेको बुझाइ छ । हाल भारतबाट आयातित ९९ प्रतिशत मेवा नेपालमा व्यापार भइरहेको छ ।

६ महिनाअघि लगाइएको बिरुवा फल लागेर छिप्पिँन थालिसकेकाे बताउँदै उनले याे खेतीबाट एक वर्षमै आम्दानी लिन सकिने बताए । नेपालको हावापानी राम्रो भएकोले स्वादिलो मेवा बजारमा पुग्ने उनको विश्वास छ । मेवा खेतीका लागि ६० लाखभन्दा धेरै लगानी गरिसकेको उनकाे दाबी छ ।

१० वर्षका भाडामा लिएकाे जमिनमा मेवा खेतीसँगै बाख्रा तथा भैँसी पालनकाे याेजना पनि रहेकाे उनले बताए ।

मेवाका प्रकार

नेपालमा हनिड्यू, पूसा मेजेस्टी, पूसा जोइन्ट, वासिङ्टन, सोलो, कोयम्बटूर, कुंर्गहनिड्यू, पूसा ड्वार्फ, पूसा डेलिसियस, सिलोन, पूसा नन्हा आदि प्रजातिको मेवा बजारमा पाइन्छ ।

तराई र मध्यपहाडमा समेत मेवा खेती हुने गरेको छ । राम्ररी हुर्किएको मेवाको बोटले वार्षिक ४० केजीसम्म फल दिने गरेको छ । एकपटक रोपिएको मेवाको बोटले ३ वर्षसम्म निरन्तर उत्पादन दिन्छ ।

प्रकाशित मिति: बिहीबार, कात्तिक २५, २०७८ ०९:०७