प्रवासमा दसैँ-तिहार : विदेशीहरू पनि नेपालीसँग टीका लाउँछन्, उफ्रीउफ्री देउसी भैलो खेल्छन्

प्रवासमा दसैँ-तिहार : विदेशीहरू पनि नेपालीसँग टीका लाउँछन्, उफ्रीउफ्री देउसी भैलो खेल्छन्

काठमाडाैँस्थित बेलायती राजदूतावासको तर्फबाट राजदूत निकाेला पाेलिटले तिहारकाे शुभकामना व्यक्त गरेकी छन् । तस्वीर निकाेलाकाे ट्विटरबाट ।

A+ A A-

रोजगारी, अध्ययन तथा अन्य उद्देश्यले विदेशिएका नेपालीहरूले दसैँ, तिहारजस्ता ठूला चाड आफू बसेकाे देशमै मनाउने गरेका छन् ।

उनीहरूले विदेशमा पनि नेपालमा जस्तै गरी आफू-आफूबीच रमाइलाे गर्छन्, टीका लगाउँछन्, देउसी खेल्छन् । यसरी नेपालीहरूले हर्षोल्लासपूर्वक दसैँ, तिहार मनाएकाे देखेर विदेशीहरूले यी चाडप्रति चासो देखाउन थालेका छन् । यति मात्र हाेइन, उनीहरू आफै नेपालीहरूसित दसैँ, तिहारजस्ता पर्व मनाउने कार्यक्रममा सहभागी हुने गरेका छन् । यसले दसैँ र तिहारकाे प्रचारलाई विश्वव्यापी बनाउन मद्दत पुगेकाे जानकारहरू बताउँछन् ।

नेपालीहरूले दसैँ, तिहार मनाउँदा जापानीहरू पनि सहभागी हुने गरेकाे जापानबाट तुलसी पाठक बताउँछन् । पाठक जापान-झापा सम्पर्क कमिटीका संयोजक हुन् । उनका अनुसार जापानका केही रोजगारदाता कम्पनीले त दसैँ र तिहारमा बिदासमेत दिन थालेका छन् ।

जापान आउने नेपालीहरूको संख्यासँगै नेपाली चाडपर्वको प्रचार पनि बढेको उनले बताए । केही जापानीहरूले रातो टीका लगाएर दसैँ मनाउन थालेको उनकाे भनाइ छ । सामाजिक सञ्जालका कारण पनि यस्ता चाडपर्वको प्रचार बढ्दै गएको उनले बताए ।

घरपरिवारले दसैँ-तिहार मनाएको तस्वीर सामाजिक सञ्जालमा आफूहरूले पोष्ट गर्दा विदेशीले त्यसका बारेमा सोधखोज गर्ने गरेको यूएईबाट दिपेन्द्र लिम्बू बताउँछन् । उनी यूएई समाज झापासँग आबद्ध छन् । विदेशमा साथीभाइ भेला भएर दसैँ-तिहार मनाउँदा विदेशीहरू पनि सहभागी हुने गरेकाे उनकाे भनाइ छ ।

खाडीका देश र मलेसियाका कतिपय रोजगारदाता कम्पनीले नेपालीहरूलाई दसैँ र तिहारमा एक/एक दिन बिदा दिन थालेका त्यहाँ कार्यरत नेपालीहरूकाे भनाइ छ । फेसबुक, ट्विटरलगायतका सामाजिक सञ्जालका कारण विदेशमा चाडपर्व मात्र नभएर नेपाली पोसाककको चर्चा पनि बढेको कतारमा रहेका चितवनका सन्दीप पौडेल बताउँछन् ।

युरोपेली देशमा पनि पछिल्ला वर्षहरूमा दसैँ, तिहारको रौनक बढ्न थालेको छ । युरोपका केही रोजगारदाता कम्पनीले नेपालीहरूलाई दसैँ र तिहारमा छुट्टी दिन थालेको रोमानियामा रहेका पाँचथरका योगेश सुनुवार बताउँछन् ।

सुनुवारका अनुसार नेपलीहरूले खेलेको देउसीभैलो विदेशीहरूले चासोपूर्वक हेर्छन् । त्यस्ता कार्यक्रमहरूमा विदेशीको सहभागीता बढ्न थालेको उनले बताए । 'प्रवासमा पनि दसैँ-तिहार रमाइलाे हुन थालेकाे छ । विदेशीहरू पनि नेपालीसँग टीका लागाउँछन् । अनि तिहारमा उफ्रीउफ्री देउसी भैलो खेल्न थालेका छन् ।'

अमेरिका, क्यानडा, सिंगापुर, जर्मनी, इटाली, हङकङलगायत मुलुकमा कार्यरत नेपालीहरूले पछिल्लो समय आफू कार्यरत कम्पनीमै टीका कार्यक्रमको आयोजना गर्न थालेका छन् ।

कामको खोजीमा विदेशिएका नेपालीहरूका लागि यस्ता चाडमा बिदाको व्यवस्था मिलाउन सरकारले पहल गर्नुपर्ने पूर्वश्रम सचिव पूर्णचन्द्र भट्टराई बताउँछन् । दसैँ, तिहारका बारेमा रोजगारदाता देश र कम्पनीलाई जानकारी गराउँदा त्यहाँ रहेका नेपालीलाई सहज हुने उनको भनाइ छ ।

नेपालीहरू रोजगारीका लागि १ सय ८९ देशमा पुगेका छन् । करिब ४५ लाख नेपाली वैदेशिक रोजगारीमा कार्यरत रहेको सरकारी अनुमान छ । विदेशमा रहेका हिन्दू धर्म मान्ने अधिकांश नेपालीहरूले कुनै न कुनै तरिकाले दसैँ, तिहार मनाउँदै आएका छन् ।

प्रकाशित मिति: बिहीबार, कात्तिक १८, २०७८ १०:३६