पैसा नपुगेर झण्डै अमेरिका जान नपाएकी शिवानी जब जागिरे बनेर गुगल अफिसमा छिरिन्

पैसा नपुगेर झण्डै अमेरिका जान नपाएकी शिवानी जब जागिरे बनेर गुगल अफिसमा छिरिन्

A+ A A-

काठमाडाैंकाे सामान्य परिवारमा जन्मिएकी शिवानी अर्यालले जागिरेका रूपमा क्यालिफाेर्नियाकाे गुगल अफिस टेकेपछि निचाेड निकालिन्, 'लक्ष्यअनुसार निरन्तर काम गरियाे भने सफलता अवश्यम्भावी छ ।' हुन पनि, गुगल अफिससम्म उनकाे यात्रा सजिलाे कहाँ थियाे र ! अहिले उनी अमेरिकाकाे न्युयाेर्कमा बस्छिन् ।

हावर्ड युनिभर्सिटीबाट एमबीए पूरा गरेकी शिवानीबारे केही साता अघिसम्म ट्वीटरतिर चर्चा थियाे, गुगलको एन्ड्रोइड विभागमा राइजिङ एक्जिक्युटिभका रूपमा काम गर्ने पहिलाे नेपाली महिला भनेर । उनले अघिल्लाे वर्षदेखि नै यो विभागमा काम थालेकी थिइन् । अझै, विश्वकै लब्धप्रतिष्ठित कम्पनीकाे कार्यकारी प्रमुख भएर काम गर्ने उनकाे अठाेट छ ।

तीन छाेरी मध्ये जेठी छाेरीका रूपमा काठमाडाैंमा जन्मिएकी शिवानीका बुवा निजामती कर्मचारी थिए । गृहणी आमा पनि पढेलेखेकी थिइन् । 'त्यसैले छाेरा भएनन् भनेर उहाँहरूले कहिल्यै गुनासाे गरेकाे सुनेनाैँ बरू छाेरीहरूलाई नै शिक्षादीक्षा दिने कुरामा जाेड गर्नुभयाे', अमेरिकाबाट फाेन संवादमा शिवानी भन्छिन् ।

सानैदेखि वक्तृत्वकला, वादविवाद, गायन र खेलकुदमा भाग लिन रूचाउने शिवानी महत्त्वाकाङ्क्षी थिइन् । पढ्नमा पनि उनी राम्राे छात्राका रूपमा चिनिन्थिन् । १२ कक्षा उत्तीर्ण गरेपछि उनले विदेश पढ्न जाने साेच बनाइन् । कुन देश जाने कुरा तय गर्नुअघि उनले पढाइ सकेपछि कहाँ सुनाैलाे अवसर पाइन्छ भन्ने कुरा खाेजिन्, बुझिन् । उनले अमेरिका नै उपयुक्त हुने निधाे गरिन् । तर, परिवारकाे आर्थिक अवस्था त्यति सबल पनि थिएन, जहाँ उनी पूरापूर पैसा तिरेर अमेरिका गएर पढ्न सकुन् ।

उनले छात्रवृत्तिमा प्रयास गरिन् । पढ्नमा अब्बल शिवानी सित्तैमा पढ्न पाउनेगरी छनाैट भइन् । 'विकल्पहरू साँघुराे भएका बेला अथवा भनाैँ 'गर् वा मर्'काे स्थितिमा मेहनत त गर्नैपर्छ । मैले त्यसै गरेँ । नाम ननिकालेकाे भए शायद म अमेरिका आउन पाउँदिन थिएँ कि !', शिवानी भन्छिन् ।

उनी अमेरिका डाक्टर बन्ने उद्दश्यले गएकी थिइन् । 'तर, गणित र अर्थशास्त्रमा म रमाउन थालेँ । अनि त्यसैलालाई निरन्तरता दिएँ', शिवानी सुनाउँछिन् ।

पढ्दापढ्दै उनले वित्तीय कम्पनीहरूमा काम गरिन् । त्यसक्रममा उनले आफूमा नेतृत्व क्षमता पनि बढाउँदै लगिन् । हावर्ड विजनेस स्कुलमा छात्रवृत्तिमा पढ्ने माैका पाएकी ३२ वर्षीया शिवानीसँग गुगलअघि अन्य प्रतिष्ठित कम्पनीहरूमा काम गरेकाे अनुभव पनि छ ।

गुगल छिर्नुअघि उनले मेकिन्जियन कम्पनीमा काम गरेकी थिइन् । सो कम्पनीमा रहेर उनले विश्वका ‘फर्च्युन ५००’ कम्पनीका सीईओहरूका समस्या समाधानमा सक्रिय भूमिका खेलिन् । दुई वर्ष मेकेन्जी एण्डी कम्पनी काम गरेपछि उनलाई अवसरका अन्य ढोका खुल्ला भए ।

त्यसपछिको दुई वर्ष उनले ब्लूमबर्ग कम्पनीमा माइकल ब्लूमबर्गसँग पनि काम गरिन् । माइकल एक सफल व्यापारी, लेखक अनि राजनीतिज्ञको रूपमा चर्चित छन् । अहिले गुगलमा शिवानी ‘उत्पादनको व्यवसायीकरण' का लागि क्रियाशील विभागमा काम गरिरहेकी छन् । विश्वव्यापी एन्ड्रोइड रणनीतिअनुसार एन्ड्रोइड मोबाइल फोनका समस्या सम्बोधन गर्ने काममा पनी उनकाे भूमिका रहन्छ ।

संसारकै प्रतिष्ठितमध्येकाे कम्पनीमा काम गर्दैगर्दा उनी आफ्नो बुबाले सिकाएका कुरालाई आदर्शको रूपमा लिन्छिन् । ‘अनुशासित भएर काम गर्नु, नैतिकवान भएर काम गरेमा पछाडि फर्किँनु पर्दैन’, बुबाले दिएका अर्तीबारे उनी भन्छिन्, ‘काम गर्ने क्रममा मैले निर्णायक पदमा रहेका व्यक्तित्वहरूका कुरा नियालेँ अनि आफूले पनि गर्न सक्छु भन्ने आत्मविश्वास पलायो ।’

नेपाली समाजमा छाेरीकाे महत्त्वलाई लिएर चेतना बढेकाे भन्दै उनी सन्तुष्टि जनाउँछन् । 'हुन त छाेरी काठमाडाैं वा यस्तै सहरका मात्रै हाेइनन् । नेपालका दूरदराजमा छाेरीहरूलाई अझै कमजाेर नै ठानिन्छ । तर, अब त्यस्ताे साेच्नु भनेकाे समाजलाई पछि धकेल्नु हाे', शिवानी भन्छिन् ।

उनी विश्वप्रतिष्ठित कम्पनीकाे उच्च पदमा काम गरी नेपालकाे नाम चिनाउन चाहन्छिन् । भन्छिन्, 'म जति माथि पुग्छु, सँगै मेराे परिचय, पहिचान पनि पुग्छ । मेराे देश पनि चिनिन्छ ।'

प्रकाशित मिति: बिहीबार, कात्तिक १८, २०७८ ०७:२३