परदेशीको तिहार : देउसुरे भनेको सुन्दा खुट्टा उचालिन्छ

A+ A A-

तीन वर्षदेखि दक्षिण कोरियामा कार्यरत पाँचथरका प्रेम सिग्देललाई तिहारका बेला गाउँघरकाे खुबै याद आइरहेकाे छ । विगतमा हातमा लाठी बोकेर साथीसँग देउसी खेल्न हिँडेको सम्झिँदा र अहिले सामाजिक सञ्जालमा उनै साथीभाइले देउसी खेलेको तस्वीर तथा भिडियाे राखेकाे देख्दा मन थाम्नै नसकिने गरी गाउँघरकाे सम्झनाले सताउने गरेकाे उनले सुनाए ।

तिहारमा साथीभाइसँग मिलेर देउसी खेल्न हिँड्नुको मजा बेग्लै हुने गरेको सिग्देल सम्झन्छन् । ‘कोरियामा कामलाई धेरै महत्वमा राखिन्छ । परदेशमा दसैँ तिहारको के महत्व', उनले भने, 'मिल्याे भने साथीहरूसँग कोठामै एक दिन रमाइलो गर्ने हो ।’

दसैँमा परदेशमै पनि आफूभन्दा ठूलासँग टीका लगाउने चलन भए पनि तिहारमा भने त्यसाे नहुने उनले बताए । अहिले सामाजिक सञ्जालबाट देउसी भट्याएकाे सुने काम गरिरहेका बेला पनि खुट्टा उचालिने गरेकाे उनी बताउँछन् ।

साउदी अरबमा एक दशकयता कार्यरत झापामा लिला गिरीकाे अवस्था पनि सिग्देलकाे जस्तै छ ।तिहारमा मादल बोकेर नाँच्दै साथीभाइसँग देउसी खेल्न हिँडेको उनलाई याद आइरहेकाे छ । रोजगारीका लागि विदेशिएपछि उनलाई दसैँतिहार राम्राेसँग नमनाएकाे वर्षाैँ भइसकेकाे छ ।

छोराले तिहारमा 'देउसी खेल्न जान्छु ल बाबा' भनेपछि विगतमा आफूले रातभर देउसी खेल्न हिँडेको स्मरण भएको उनले साउदीबाट सुनाए । ‘अरु बेला त काम गरिन्छ । चाडपर्वका बेला भने गाँउघरको धेरै याद आउँछ’, उनले भने, ‘पछिल्लो समय प्रविधिको विकासका कारण चाडपर्व मनाएको हेर्ने पाइन्छ । आफूले मनाउन नपाए पनि अरूले मनाएकाे हेर्दा म पनि सँगै छुकि जस्ताे लाग्छ ।'

रामेछापका सञ्जय कार्की विगत ६ वर्षदेखि जापानमा कार्यरत छन् । सञ्जयलाई पनि नेपालमा हुँदा देउसी खेलेको सम्झनाले सताइरहेकाे छ । रोजगारीका लागि विदेशिँदा दसैँ तिहार जस्ता चाडपर्वसँगकाे सम्बन्ध नै टाढिएको जस्तो भएको उनले बताए । सानाे छँदा दसैँमा टिका लगाएपछि तिहार कहिले आउँछ भनेर दिनगन्ती सुरु गरेको कार्की सम्झिरहेका छन् ।

रातभर पैसा गन्दै देउसी खेलेको सम्झिँदा कुदेर घर फर्किने मन लाग्ने गरेको उनले बताए । ‘पछिल्लो समय साथीसँग मिलेर तिहारमा रमाइलोका लागि देउसी खेलिन्छ, त्यो पनि बिदा मिल्यो भने । नत्र काम गरेर तिहार गएको थाहा नै हुँदैन’, उनले भने ।

वैदेशिक रोजगारीमा कार्यरत नेपालीहरूलाई कम्पनीमा हुने कामको चाप र सम्बन्धित देशको फरक धर्मले गर्दा स्वदेशमा जस्तो गरी तिहार मनाउन सहज हुँदैन । रोजगारीका लागि युरोप, अमेरिका, अस्ट्रेलिया, कोरिया र जापान लगायतका देशमा रहेका नेपालीहरू दसैँतिहार मनाउने फुर्सद नै नमिल्ने गरेको बताउँछन् ।

यद्यपि, छोटो समय निकालेर वा कामबाट फर्केपछि भए पनि उनीहरूले आफ्नै तरिकाले चाडपर्व मनाउने गरेका छन् । विदेशमै परिवार भएकाहरूले पनि नेपाली भाषा, कला, संस्कृति मौलिक परम्पराअनुसार नै चाडपर्व मनाउने गरेका छन् ।

प्रकाशित मिति: शुक्रबार, कात्तिक १९, २०७८ ०९:२३