किसानका समस्यामा छलफल गर्न तर्किन्छन् सांसद

A+ A A-

संसदको कृषि, सहकारी तथा प्राकृतिक स्रोत समितिकी सभापति पूर्णाकुमारी सुवेदीले गत आइतबार समितिको बैठक बोलाएकी थिइन् । सुवेदीले प्राकृतिक विपत्ती र वर्षाका कारण पुगेको क्षतिका सम्बन्धमा छलफल गर्न बैठक बोलाएकी थिइन् ।

बेमौसमी वर्षाका कारण धानबालीमा पुगेको क्षति र किसानलाई राहत वितरण गर्ने विषयमा छलफलका लागि बोलाइएको बैठकमा २१ जना समितिका सांसदमध्ये १७ जना अनुपस्थित भए । गत आइतबार १० बजेका लागि समितिको बैठक बोलाइएको थियो ।

समितिमा रहेका सबै सांसदहरूलाई शुक्रबार नै बैठकको बारेमा जानकारीसहितको इमेल पठाएको समितिको सचिवालयले जनाएको छ । शुक्रबार नै बैठकका बारेमा जानकारी गराइएको भए पनि आइतबारको बैठकमा भने माओवादीकी पूर्णाकुमारी सुवेदी (सभापति), एमालेका दलबहादुर राना, शान्ता चौधरी तथा भूपेन्द्र थापा र कृषि तथा पशुपन्छी विकासमन्त्री महिन्द्र राय यादव मात्र उपस्थित भए ।

समितिमा रहेका एमालेका सात, कांग्रेसका पाँच, माओवादीका चार र लोकतान्त्रिक समाजवादीका एक गरी १७ सांसद बैठकमै गएनन् ।

एमालेका उपमहासचिव तथा पूर्वकृषिमन्त्री घनश्याम भुसाल, पाल्देन छोपाङ गुरुङ, भूमिप्रसाद त्रिपाठी, छविलाल विश्वकर्मा, राजबहादुर बुढाक्षेत्री, राधाकुमारी ज्ञवाली र शान्तिमाया तामाङ पाख्रिन बैठकमा आएनन् ।

कांग्रेसका सांसदहरू नागेन्द्र कुमार, सत्यनारायण शर्मा खनाल, देवप्रसाद तिमल्सेना, लालकाजी गुरुङ र सीतादेवी यादव बैठकमा गएनन् । यसैगरी माओवादीका ओनसरी घर्ती, शक्तिबहादुर बस्नेत, सुरेशचन्द्र दास र हरिबोल गजुरेल तथा लोसपाका चन्द्रकान्त चौधरी समितिको बैठकमा गएनन् ।

बेमौसमी वर्षाका कारण कृषिमा पुगेको क्षति, किसानलाई राहत, वर्षाले धानबालीमा क्षति पुगेपछि आगामी दिनमा खाद्यन्नमा पुग्ने असर र बाढीका कारण समस्यामा परेको किसानलाई तीनै तहका सरकारले कसरी सहयोग गर्ने भन्ने विषयमा छलफल गर्न बैठक बोलाइएको समितिकी सभापति सुवेदीले जानकारी दिइन् ।

महत्वपूर्ण छलफल हुने भएकाले अनिवार्य उपस्थित हुन आग्रह गरिएको भए पनि सांसदले बेवास्ता गरेको सुवेदी बताउँछिन् । ‘जनताका प्रतिनिधिले त संसद र संसदीय समितिको बैठकमा प्रस्ट कुरा राख्दै छलफल गर्नुपर्ने हो । तर, उहाँहरू बैठकमै आउनुहुन्न,' उनले भनिन्, ‘कतिपय सांसदलाई सामान्य विषय हो । अरुले छलफल गरे हुन्छ भन्ने होला । प्राकृति, उपभोक्ता र किसानसँग जोडिएको विषयमा बैठकमा नआउनु आफैँलाई नोक्सानी हो ।’ यसअघिका बैठकमा पनि सांसदहरूको सन्तोषजनक सहभागिता नहुने गरेको सुवेदीको भनाइ छ ।