'निजी स्वार्थ पूरा गर्न पूर्व सुरक्षाकर्मी राजनीतिमा लागिरहेका छन्'

गोविन्द कुसुम, पूर्व गृहसचिव ।

A+ A A-

अवकाशपछि कुनै पनि कर्मचारी सामान्य नागरिक हुने भएकाले उसले राजनीति गर्ने नगर्ने व्यक्तिगत स्वतन्त्रताको कुरा हो । त्यसैले अवकाशपछि दलमा गएको विषयलाई अन्यथा भन्न मिलेन । तर पूर्व कर्मचारीहरू किन राजनीतिमा गइरहेका छन् ? यो प्रश्न केलाउनु जरुरी छ ।

पहिलो पदका लागि र दोस्रो संरक्षणका लागि । र, तेस्रो, सुरक्षा अंगको उच्च तहमा काम गरेकाहरू समाजको भुइँ तहबाट एकल भएका हुनसक्छन् । समुदायमा कसरी बस्ने भन्ने अभ्यास हुँदैन । जागिरका बेला उनीहरू शक्तिको एउटा रापतापले बाँचेका हुन्छन् । समाजमा उनीहरूका लागि विश्वसनीय वातावारणको कमि हुन्छ । गृहसचिव, प्रमुख जिल्ला अधिकारी भएका निजामती कर्मचारीलाई पनि यो समस्या आउन सक्छ । त्यसैले उनीहरू राजनीतिमा गएर शक्ति हासिल गरिरहन खोज्छन् ।

पूर्वसुरक्षाकर्मी, कर्मचारी अपवादबाहेक धेरैजसो कुनै पार्टी प्रतिको विचार, आस्थालाई मानेर होइन आ–आफ्ना महत्वकांक्षा, स्वार्थ र बाध्यताका कारण राजनीतिमा लागेका छन् ।

तटस्थताको सिद्धान्त अपनाएर उनीहरूले जागिरमा भूमिका खेलेका हुन्छन् भन्ने अपेक्षा हो । तर अवकाशपछि भकाभक राजनीतिमा पस्दा त्यसको असर संगठनमा पर्छ, खासगरी प्रहरीमा । प्रहरी र राजनीतिक नेताहरूको नेक्सस त्यसै पनि हाम्रोमा बेग्लै छ ।

अग्रजहरू अवकाशपछि राजनीतिमा लाग्दा संगठनमा कार्यरतले आजैदेखि पार्टीमा लाग्ने मेलो खोज्ने सोच विकास हुनसक्छ । प्रहरी र सशस्त्र प्रहरीको सरुवा, बढुवामा राजनीतिक चासो त्यसै पनि बढी छ । कुनै पनि जिल्लामा आफूले चाहेको प्रहरी कर्मचारी लगेर चुनाव जितिन्छ भन्ने सोचाइ नेताहरूमा छ ।

त्यसैले पूर्व सुरक्षाकर्मीका लागि राजनीतिमा लाग्ने बाटो निश्चित अवधिका लागि बन्द गरिनुपर्छ । सेना आज राजनीतिकरणबाट बच्नुको एउटा कारण अवकाशपछि उसका उच्च ओहोदाधारीहरू राजनीतिबाट अलग्गै बस्नु पनि हो ।

प्रकाशित मिति: बुधबार, कात्तिक १७, २०७८ ०८:३२