एमाले पालिका अधिवेशन : ओलीकाे गृहजिल्लामा जुटेन सहमति, कमाण्डर छान्न सकस

A+ A A-

झापामा एमाले नगर अधिवेशन अझै नतिजामा पुग्न सकेको छैन । अन्तिम अवस्थासम्म पनि सहमतिका लागि जोड दिने प्रयास सार्थक हुन सकेकाे छैन । झापाका १५ मध्ये अझै १० वटा पालिकाको नतिजा आएको छैन ।

पूर्व प्रधानमन्त्री तथा एमाले अध्यक्ष ओलीको गृह जिल्ला भएको कारण पनि सहमतिका लागि एमालेले जोड दिएको हो ।नतिजा सार्वजनिक भएका पाँचवटा पालिका मध्ये एमालेले दुई पालिकामा मात्र सहमति जुटाउन सक्यो ।

कमल गाउँपालिका र गौरीगञ्ज गाउँपालिकामा सहमति जुटेको एमाले झापाले जनाएको छ । बाँकी तीनवटा पालिकामा चुनावी प्रक्रियाबाट नतिजा सार्वजनिक भएको छ । एमाले झापाका अनुसार कचनकवल र हाल्दिबारी अन्तिम चरणमा पुगेको छ । सम्भवतः आज बेलुका वा भोलि बिहानसम्ममा नतिजा सार्वजनिक हुनेछ ।

एमाले झापाका अनुसार कमल गाउँपालिकामा भने सर्वसम्मत नेतृत्व चयन भइसकेको छ । कमलको अध्यक्षमा प्रेम पोखरेल, उपाध्यक्ष पृथ्वीपति राई, सचिव हरि ढकाल र उपसचिवमा वीरेन्द्र अधिकारी र चन्द्रकला ढकाल चयन भएका छन् ।

गएराति अबेला गरेर गौरीगञ्जको अध्यक्षमा सहमति जुटेको एमालेले जानकारी दियो । योसँगै सहमति जुटेको यो दोस्रो पालिका हो । गौरीगञ्जमा गोविन्द कुँवर सर्वसम्मत चयन भएका छन् । त्यसैगरी उपाध्यक्षमा रामकृष्ण पन्त, सचिव श्रवण गिरी, उपसचिवमा राजकुमार राजवंशी र कृष्ण महतो सर्वसम्मत भएका छन् । तीन दिनको छलफलले सर्वसम्मतबाट ७५ सदस्यीय गौरीगञ्ज गाउँ कमिटी गठन भएको छ ।

कमल गाउँपालिकाबाट सुरु भएको सहमतिको लहरले निरन्तरता पाउन भने सकेको छैन । शिवसताक्षीमा अहिले निर्वाचन प्रकृया चलिरहेको छ । सहमति गर्ने तीन दिनको कसरतमा पनि कुरो नमिलेपछि निर्वाचन हुन लागेकाे हाे । अध्यक्षका लागि सीताराम भेटवाल र रोशन लिम्बु चुनावी मैदानमा छन् ।

भद्रपुरमा पनि लामो समय सहमतिको प्रयास गरिएको थियो । तर, अन्नतः भद्रपुर एमाले निर्वाचनमा गयो । चुनावपछि अध्यक्षमा व्रम्हलाल ढुङ्गाना विजयी भएका छन् । लक्ष्मण पोख्रेललाई पराजित गरी ढुङ्गाना नगर अध्यक्षमा विजयी भएका हुन् । ढुङ्गानाको पक्षमा १६६ मत खसेको थियो, पोख्रेलले ३१ मत मात्र ल्याउन सके ।

अर्जुनधारामा पनि सहमति जुट्न सकेन । बिहीआार भएकाे चुनावकाे नतिजा अनुसार अध्यक्षमा बलदेव गोम्देन विजयी भएका छन् । लोकनाथ गौतमलाई पराजित गरी गोम्देन विजयी भएका हुन् । गोम्देनले गौतमलाई १५ मतले पराजित गरेका हुन् ।

यता झापाको दमक नगर कमिटीमा अध्यक्ष र सचिव सर्वसम्मत चयन भएका छन् भने अन्य पदहरूमा सहमति जुट्न सकेको छैन । अध्यक्षमा गेहनाथ पोखरेल र सचिवमा इन्द्र बहादुर गुरुङ सर्वसम्मत भइसकेका छन् ।

एमाले झापाका अध्यक्ष चिन्तन पाठक अझै पनि धेरै पालिकामा सहमति नै हुने बताउँछन् । उनी भन्छन्, ‘हामी अन्तिम अवस्थासम्म सहमतिकै लागि कसरत गरिरहेका छौँ, केही पदबाहेक धेरैमा सहमति भइसकेको छ । धेरै ठाउँको नतिजा सहमतिमै आउँछ ।’

तर झापाको पूर्ण नतिजा सार्वजनिक भइसक्न अझ केही दिन लाग्ने पाठकको भनाइ छ । बिर्तामोडमा १४ जनाले अध्यक्षका लागि आकांक्षा राखेका थिए । आज पनि चार जना आफ्नाे अडानमा कायम नै छन् ।

८ जनाले आकांक्षा राखेको बाह्रदशीमा ५ जना सहमतिका लागि तयार छैनन् । उनीहरूसँग छलफल भइरहेको एमाले जिल्ला कार्यालय सचिव शिव ढुङ्गेलले जानकारी दिए । कनकाईको नतिजा आउन धेरै बेर नलाग्ने उनको भनाइ छ ।

कतिपय ठाउँमा तीन र कतिपय ठाउँमा चार दिनदेखि एमाले झापा सहमति जुटाउन लागि परेको छ । बिर्तामोड र बाह्रदशीमा भोलि दिनभरसम्म पनि सहमतिको प्रयास गरेपछि मात्र चुनावी प्रक्रियामा जाने एमालेले जनाएको छ ।

प्रकाशित मिति: शनिबार, कात्तिक १३, २०७८ १२:४९