बागमतीको गठबन्धन सरकार : भागबण्डा मिलाउन मन्त्रालय फुटाइँदै

A+ A A-

बागमती प्रदेशमा ४४ महिनापछि एमाले नेतृत्वको सरकार विस्थापनसँगै बिहीबार नयाँ मुख्यमन्त्रीमा गठबन्धनका राजेन्द्र पाण्डे नियुक्त भए । चार दलीय गठबन्धनको नेतृत्व गर्दै मुख्यमन्त्री भएका नेकपा (एकीकृत समाजवादी)का उपाध्यक्ष पाण्डेले सोही दिन तीन जनालाई मन्त्री पनि बनाए ।

गठबन्धनमा नेकपा माओवादी केन्द्र, नेपाली कांग्रेस, नेकपा (एकीकृत समाजवादी) र जनता समाजवादी पार्टी (जसपा) रहेका छन् । गठबन्धन सरकारले तिहारपछि मात्रै मन्त्रिपरिषद् विस्तार गर्ने तयारी गरेको छ । गठबन्धनमा मन्त्रालय भागबण्डा लगाउन भने मुख्यमन्त्री पाण्डेलाई सकस पर्ने देखिएको छ । तर उनले मन्त्रालय फुटाएर सरकार विस्तार गर्ने बताइसकेका छन् ।

बुधबार प्रदेशसभा बैठक सकिएपछि पत्रकारहरूसँग कुरा गर्दै पाण्डेले गठबन्धन सरकार बन्ने र मन्त्रालयहरू विभाजन गरेर मन्त्रिपरिषद् विस्तार गर्ने बताएका थिए । पाण्डेले भौतिक पूर्वाधार विकास मन्त्रालय फुटाएर यातायात हेर्ने छुट्टै मन्त्रालय बनाउने तयारी गरेका छन् । यस्तै, उद्योग, पर्यटन, वन तथा वातावरण मन्त्रालय र भूमि व्यवस्था कृषि तथा सहकारी मन्त्रालय पनि फुटाउने योजना उनको रहेको स्रोतको दाबी छ ।

उद्योग र पर्यटन हेर्ने गरी दुई मन्त्रालय र कृषि मात्रै छुट्टै मन्त्रालय बनाइने बुझिएको छ । बागमतीमा मुख्यमन्त्री तथा मन्त्रिपरिषद्को कार्यालयसहित ८ मन्त्रालय छन् । पूर्वमुख्यमन्त्री डोरमणि पौडेलकाे पालामा ७ मन्त्रालय थिए । प्रदेश सरकारको नेतृत्वमा अष्टलक्ष्मी शाक्य आएपछि उनले सामाजिक विकास मन्त्रालय फुटाएर स्वास्थ्य मन्त्रालय थपेकी थिइन् ।

एमाले विभाजनको संघारमा २ भदौमा मुख्यमन्त्री नियुक्त भएकी शाक्यले पार्टीभित्रै भागबण्डा मिलाउन सकस परेपछि मन्त्रालय फुटाउने र राज्यमन्त्री नियुक्तसम्म गरिन् ।

‘एमालेको सरकार हुँदा त मन्त्रालय फुटाइँयाे, राज्यमन्त्री बनाइयो । यो त गठबन्धन सरकार हो । यहाँ दुई भन्दा बढी दल छन् । मन्त्रालयको संख्या बढ्नु स्वभाविक हो,’ कांग्रेस निकट एक प्रदेशसभा सदस्यले शिलापत्रसँग भने, ‘संविधानभित्रै रहेर सरकार विस्तार हुनेछ । सबै दलका सदस्यले सरकारमा सहभागिता जनाउने भएपछि संख्या त थपिन्छ नै ।'

नवनियुक्त मुख्यमन्त्री पाण्डेले बिहीबार एकीकृत समाजवादीका कृष्ण शर्मा खनाललाई आन्तरिक मामिला तथा कानुन मन्त्रालय, माओवादी केन्द्रबाट कुमारी मोक्तानलाई सामाजिक विकास मन्त्रालय र कांग्रेसबाट कृष्णलाल भडेललाई भौतिक पूर्वाधार विकास मन्त्रालयको जिम्मेवारी दिएका थिए ।

कांग्रेस सचेतक छिरिङ दोर्जे लामाले हाललाई चार सदस्यीय मन्त्रिपरिषद् बनाइएको र अब तिहारपछि मात्रै मन्त्रिपरिषद् विस्तार गरिने जानकारी दिए ।

अब माओवादीका युवराज दुलालसहितका नेता र कांग्रेसका सचेतक निमा लामासहितका नेताहरू मन्त्री बन्ने लाइनमा रहेको स्रोत बताउँछ । जसपाका प्रेम तामाङलाई राज्यमन्त्री बनाउने चर्चा गठबन्धनमा चलेको छ ।

प्रकाशित मिति: शनिबार, कात्तिक १३, २०७८ ०६:५८