असोजमा दुई वर्षयताकै धेरै नेपाली कामदार विदेसिए, ४० हजारले लिए श्रम स्वीकृति

असोजमा दुई वर्षयताकै धेरै नेपाली कामदार विदेसिए, ४० हजारले लिए श्रम स्वीकृति

A+ A A-

कोरोनाका कारण थलिएको वैदेशिक रोजगारको क्षेत्र विस्तारै लयमा फर्किन थालेको छ । असोज महिनामा मात्रै वैदेशिक रोजगारीमा जान ३६ हजार पुरुष र ४ हजार महिलाले श्रम स्वीकृति लिएको वैदेशिक रोजगार विभागले जनाएको छ ।

कोरोना महामारी फैलिनुअघि वैदेशिक रोजगारीमा मासिक ४५ हजारभन्दा बढी कामदार जान्ने गरेको विभागको तथ्यांक छ । चालु आर्थिक वर्षको साउन र भदौ महिनामा श्रम स्वीकृति लिनेको संख्या ४१ हजार ८ सय २८ जना थियो ।

गत वर्ष असोज महिनामा श्रम स्वीकृति लिनेको संख्या ८ हजार ९७ थियो । गत आर्थिक वर्षमा १ लाख ६७ हजार कामदार रोजगारीको सिलसिलामा विदेश पुगेको विभागले जनाएको छ । अघिल्लो आर्थिक वर्षमा ३ लाख ६८ हजार ४ सय १३ जना रोजगारीका लागि विदेसिएका थिए ।

विभागका अनुसार साउनमा २५ हजार ४ सय २८ र भदौमा १६ हजार ४ सय र असोजमा ४० हजारले श्रम स्वीकृति लिएका छन् । यो संख्या गत आर्थिक वर्षको सुरुको तीन महिनाको तुलनामा चार गुणा बढी रहेको विभागले जनाएको छ ।

कोरोनाका कारण ठप्पजस्तै अवस्थामा पुगेको वैदेशिक रोजगारी विस्तारै सामान्य अवस्थामा फर्किन थालेको विभागका महानिर्देशक दिपक काफ्लेले जानकारी दिए । सरकारले वैदेशिक रोजगारीमा जान्न कामदारका हकमा कोभिड खोपको विषेश व्यवस्थापन र सहजीकरण गरेकाले पनि रोजगारीका लागि विदेसिनेको संख्या बढेको महानिर्देशक काफ्लेको भनाइ छ ।

कतार, युएई, साउदी अरब, बहराइन, कुवेत र ओमानले समेत कोरोना सामान्य बन्दै गएपछि नेपालबाट कामदार लिने संख्या बढाउन थालेको म्यानपावर व्यवसायीहरूले बताएका छन् । मलेसियाको रोजगारी नोभेम्बरदेखि खुलेपछि वैदेशिक रोजगारीमा जाने कामदारको संख्या बढ्ने व्यवसायीको अनुमान छ ।

प्रकाशित मिति: शुक्रबार, कात्तिक १२, २०७८ १३:१६