बागमती प्रदेशकी मुख्यमन्त्री शाक्यले दिइन् राजीनामा

A+ A A-

बागमती प्रदेशकी मुख्यमन्त्री अष्टलक्ष्मी शाक्यले राजीनामा दिएकी छिन् ।

बुधबार प्रदेशसभा बैठकलाई सम्बोधन गर्दै मुख्यमन्त्री शाक्यले राजीनामा दिएकी हुन् । राजीनामाको घोषणा गर्दै मुख्यमन्त्री शाक्यले प्रदेशको विकास र समृद्धिका लागि आफ्नो पार्टीले रचनात्मक सहयोग गर्ने बताइन् ।

'प्रदेशको समृद्धि र विकासका लागि हामी सबै मिल्नुपर्छ । हामी मिलेरै अघि बढ्नुको कुनै विकल्प छैन,'उनले भनिन् । उनले संसदको गरिमालाई बचाउन सबै दल एकताबद्ध हुनु पर्ने पनि बताइन् ।

मुख्यमन्त्री शाक्यले छोटो समयमा उल्लेख्य काम गर्न सक्ने भए पनि आफूले काम गर्न नपाएको गुनासो पनि गरिन् । उनले आफूले समाजवादउन्मुख कार्यक्रमको खाका ल्याएको पनि बताइन् ।

मुख्यमन्त्री शाक्यले आफ्नो दलभित्र छलफल गरेर आफूले राजीनामाको निर्णय गरेको बताइन् । संसद बैठकअघि मुख्यमन्त्री शाक्यले मन्त्री तथा पार्टीभित्रका सांसदहरूसँग राजीनामा दिने विषयमा छलफल गरेकी थिइन् । विश्वासको मत नपाउने भएपछि एमालेकै सांसदहरूले राजीनामा दिएर मार्ग प्रशस्त गर्न मुख्यमन्त्री शाक्यलाई सुझाएका थिए ।

मुख्यमन्त्री शाक्यले राजीनामाको घोषणा गरेपछि सभामुख सभामुख सानुकुमार श्रेष्ठले अर्को सूचना जारी नभएसम्मका लागि बैठक स्थगित गरेका छन् । शाक्य प्रदेशसभाको एकल बहुमत प्राप्त दलको नेताको हैसियतमा २ भदौमा मुख्यमन्त्री नियुक्त भएकी थिइन् । तर, एमाले विभाजन भएपछि १३ सांसदले एकीकृत समाजवादी पार्टी रोजेपछि मुख्यमन्त्री शाक्य अल्पमतमा परेकी थिइन् ।

अल्पमतमा परेपछि मुख्यमन्त्री शाक्यले विश्वासको मत लिने प्रयोजनका लागि २४ असोजमा प्रदेशसभामा प्रस्ताव पेस गरेकी थिइन् । विश्वासको मत नपाउने निश्चित भएपछि बुधबार विश्वासको मत माग्नुअघि नै उनले राजीनामा दिएकी हुन् ।

पाण्डे मुख्यमन्त्री बन्ने पक्का

शाक्यले राजीनामा दिएसँगै एकीकृत समाजवादीका संसदीय दलका नेता राजेन्द्र पाण्डे मुख्यमन्त्री बन्ने पक्का भएको छ ।

बागमती प्रदेशमा एकीकृत समाजवादी र कांग्रेसबीच आधा-आधा कार्यकाल सरकारको नेतृत्व गर्ने सहमति भएकाले सुरुमा पाण्डे मुख्यमन्त्री बन्नेछन् । पाण्डेलाई एकीकृत समाजवादी, कांग्रेस, माओवादी केन्द्र, विवेकशील साझा र जसपाको समर्थन छ ।

१०९ सदस्यी प्रदेशसभामा एमालेका ४३, माओवादी केन्द्रका २३, कांग्रेसका २२, एकीकृत समाजवादीका १३, विवेकशील साझाका तीन, नेमकिपाका र राप्रपाका २-२ र जसपाका एक सांसद छन् । प्रदेशसभामा सरकार बनाउन ५५ सांसदको समर्थन आवश्यक हुन्छ, जुन एमालेइतर दलको गठबन्धनसँग छ । एमालेइतरको गठबन्धनसँग ५९ सांसद छन् ।

प्रकाशित मिति: बुधबार, कात्तिक १०, २०७८ १४:३०