शिक्षण अस्पतालमा बिरामीको चाप: एउटै बेडमा तीन जना बिरामी

A+ A A-

त्रिवि शिक्षण अस्पताल महाराजगञ्जको आकस्मिक कक्षअगाडि खोटाङ दिक्तेलबाट आएकी ५१ वर्षीया चामछरी राई छोरीलाई भन्दै थिइन्, ‘कतै पल्टिन मात्र पाए पनि हुन्थ्यो ।’ पेटको समस्याले सिकिस्त भएपछि परिवारले उपचारका लागि उनलाई काठमाडौं ल्याएको हो । तर, बिरामीले भरिभराउ आकस्मिक कक्षमा उनले बेड पाउन सकिनन् । पेटीमा छोरीलाई आड हालेर आइय्या-आइय्या भन्दै थिइन्, चामछरी ।

उनी त सोमबार बिहान मात्र आइपुगेकी हुन् । आकस्मिक कक्षभित्र दुई-तीन दिनदेखि बेड नपाएर बसेका बिरामीको चाप थियो । हात्तीगौडाबाट आएकी ७८ वर्षीया पम्फादेवी लुइँटेल अस्पताल आएको दुई दिन बित्यो । तर, उनी बसेको बेडमा कहिले तीन जना, कहिले दुई जना बिरामी हुन्छन् । ‘इमरजेन्सीमा यस्तो नहुनु पर्ने हो । कति पटक भनेको मान्दैनन् । बेड खाली छैन । खाली भएपछि राख्छौं भन्नुहुन्छ,’ फम्फादेवीकी बुहारी भन्छिन् ।

गोरखादेखि आएकी ७५ वर्षीया मनकुमारी भट्ट पनि बेडको प्रतीक्षामा थिइन् । दमले च्यापेर आएकी उनी एउटै बेडमा तीन जना चेप्पिएर बसिरहेकी छिन् । एउटा बिरामीको खुट्टा अर्को बिरामीको टाउकोमा राख्नु पर्ने स्थिति देखिन्थ्यो, आकस्मिक कक्षमा । टिकट काउन्टरमा ठूलो भिड थियो । न दूरी कायम थियो । कतिले मास्क पनि राम्रोसँग लगाएका थिएनन् ।अस्पतालबाटै कोरोना संक्रमण फैलिने जोखिम देखिन्थ्यो ।

थेग्नै नसक्ने भयौं : अस्पताल

कोभिड कम भएपछि नन-कोभिडका बिरामीको चाप बढेको अस्पताल प्रशासनको भनाइ छ । ‘कोभिडको रफ्तार हुँदा सर्छ भनेर अरू बिरामी आएनन् । कोभिड कम भएपछि नन-कोभिडका बिरामी धेरै आएर हो,’ अस्पतालका प्रवक्ता रामविक्रम अधिकारी भन्छन्, ‘अस्पतालले थेग्नै नसक्ने स्थिति छ । एउटै बेडमा तीन जना राख्न बाध्य भएका छौँ ।'

क्षमताभन्दा बढी बिरामी

क्षमताभन्दा बढी बिरामी आएको बताउँछन्, उनी । ‘इमरजेन्सीको क्षमता ५० जना बिरामीको हो । हिजोमात्र १३२ जना बिरामी इमरजेन्सीमा आए,’ उनी भन्छन्, ‘बिरामी धेरै, बेड कम छ । तत्काल बेड बढाउन सकिँदैन । त्यसैले इमरजेन्सीमा जाम भएको हो । भौतिक संरचना र जनशक्ति अनुसार बिरामी राख्ने हो ।’

दसैंपछि ओपीडीमा मात्र २ हजारको हाराहारीमा बिरामी उपचारका लागि आइरहेको उनले बताए । ‘हिजोको रिपोर्ट अनुसार १ हजार ७ सय ८९ जना ओपीडीमा आएका थिए । स्वास्थ्य बीमाको डेढ सय जति हुन्छ । दैनिक २ हजार बिरामी आउँछन् । हामीसँग ७ सय जति बेड छ । जति बेड बढाए पनि थेग्न सक्ने अवस्था छैन,’ उनी भन्छन् ।

बिरामीलाई अन्य अस्पतालमा जान सुझाव दिँदा पनि नगएको बताउँछन्, उनी । ‘प्राइभेटले चुस्नसम्म चुस्छन् । पैसा सकिएपछि यहाँ आउने बिरामी धेरै छन् । अन्त जानै मान्दैनन् । मरे मर्छु भुइँमै बस्छु भन्नुहुन्छ । हामीले के गर्ने ? टिचिङको विश्वास र सस्तो भएकाले मेची महाकालीका मानिस आउँछन् । व्यवस्थापन गर्न खोज्दा पनि सकिएको छैन,’ उनी भन्छन् ।

अस्पतालबाटै कोरोना संक्रमण फैलियो भने के गर्ने भन्ने प्रश्नमा प्रवक्ता अधिकारी भन्छन्, ‘धेरै समय रहँदा एउटै बेडबाट अर्कोलाई सर्ने जोखिम हुन्छ । शंकास्पद भए पीसीआर गराउने हो । मास्क लगाएको छ । अरू भगवान भरोसा ।’

कोभिड वार्डमा अब नन कोभिडका बिरामी

कोभिडका बिरामीको संख्या घटेसँगै विस्तारै नन-कोभिडका बिरामी राख्न थालिएको उनले बताए । ‘कोभिडका बिरामी ३७ जनामा झरेको छ । ४ जना भेन्टिलेटरमा छन् । एक हप्ताअघि बिरामी ५० जना थिए । क्रमशः कोभिडका बिरामी घटिरहेका छन् । कोभिडका बिरामी एक ठाउँमा राखेर विस्तारै अरु बिरामी राख्न थालिएको छ,’ उनी भन्छन् ।

अस्पताललाई व्यवस्थित गर्ने उपाय के ?

संरचना थप गर्नुको विकल्प नरहेको बताउँछन्, प्रवक्ता अधिकारी । ‘यहाँको २०६ रोपनी जग्गामा भवन भरिएको छ । कीर्तिपुरमा बन्दै छ । त्यसपछि सहज हुने अपेक्षा छ,’ उनी भन्छन् ।

ल्याबको रिपोर्ट हेर्न र टिकटको व्यवस्था अनलाइनबाट नै गरेकाले अस्पतालमा नआउन सेवाग्राहीलाई उनको आग्रह छ । ‘टिकट अनलाइनबाट लिन सकिन्छ । ल्याबको रिपोर्ट पनि अनलाइनबाट हेर्न सकिन्छ । फिजिकल आउनु नपरोस् भनेर अनलाइन सुरू गरेको हो तर सेवाग्राही यहीँ आउनु हुन्छ,’ उनी भन्छन्, ‘अनलाइनबाट सेवा लिने हो भने काउन्टर र अस्पतालमा भिडभाड नै हुने थिएन ।’