कैलालीमा २१ हजार हेक्टरमा लगाइएको धानबाली पूर्ण रूपमा नष्ट, दुई अर्ब रुपैयाँ भन्दा धेरैकाे क्षति

कैलालीमा २१ हजार हेक्टरमा लगाइएको धानबाली पूर्ण रूपमा नष्ट, दुई अर्ब रुपैयाँ भन्दा धेरैकाे क्षति

A+ A A-

कैलालीमा बेमौसमी वर्षाले धानबालीमा ठूलो क्षति गरेको छ । वर्षा र डुबानले जिल्लाभरि करिब २१ हजार हेक्टर क्षेत्रफलमा लगाएको धानबाली पूर्ण रुपमा क्षति भएको कृषि ज्ञान केन्द्र कैलालीले जनाएको छ ।

कृषि ज्ञान केन्द्रका प्रमुख खगेन्द्र शर्माले प्रारम्भिक तथ्यांक हेर्दा २१ हजार हेक्टरको धानबाली पूर्ण रुपमा नष्ट भएको बताए । लामो समय पानीमा रहेकाले धान टुसाउन थालेको उनले बताए ।

उत्पादकत्वका आधारमा करिब साढे नौ लाख क्वीन्टल धान नष्ट भएको ज्ञान केन्द्रले जनाएको छ । प्रतिक्वीन्टल धान दुई हजार रुपैयाँका दरले हिसाब गर्दा पनि धानबालीमा वर्षाले करिब दुई अर्ब रुपैयाँको क्षति भएको शर्माले बताए ।

उनले धानबालीमा मात्रै नभइ तोरी, मसुरो, आलुसमेत गरी करिब तीन अर्बको क्षति भएको अनुमान रहेको बताए । यस वर्ष धानको उत्पादन १५ प्रतिशतले घट्ने बताइएको छ । कुल धानबाली लगाउने क्षेत्रमध्ये ५० प्रतिशतमा भित्र्याइसकिएको र १५ प्रतिशतजति काट्न बाँकी रहेको ज्ञान केन्द्रले जनाएको छ ।

भिजेको धान लामो समय भण्डारण गर्न समस्या हुने र व्यापारीले पनि मूल्य नदिने भन्दै किसान चिन्तित छन् । काटेको धान भिज्दा धानमा दाग हुने, कुट्दा चामल टुक्रिने र लामो समय भण्डारण गर्न नसकिने कृषि ज्ञान केन्द्रका प्रमुख शर्माले बताए ।

‘उन्नत बीउको बढ्दो प्रयोग, सिँचाइ सुविधा विस्तार, नियमित पानी पर्नुजस्ता कारणले यसवर्ष धानबाली सप्रेको थियो । विगतभन्दा ५–७ प्रतिशत उत्पादन बढ्ने अनुमान गरेका थियौँ । बाली सप्रिएकाले किसान पनि खुसी थिए’, शर्माले भने, ‘तर भित्र्याउने बेला भएको अनपेक्षित वर्षाले क्षति पुग्दा समग्र उत्पादन प्रभावित हुने देखिन्छ ।’

भिजेको धान टुक्रिने र दागी छ भनेर व्यापारीले राम्रो मूल्य नदिन सक्ने भएकाले किसान मारमा पर्ने उनले बताए । चाहिने बेला नियमित वर्षा भएकाले यस वर्ष धान उत्पादन बढ्ने अनुमान गरिएको थियो ।

कैलालीमा करिब ७० हजार हेक्टर जमिनमा धानखेती हुने गरेको छ । ज्ञान केन्द्रका अनुसार प्रतिहेक्टर औषत ४५ क्वीन्टल धान उत्पादन हुने गरेको छ । गत वर्ष यहाँ करिब सवा तीन लाख मेट्रिक टन धान उत्पादन भएको कृषि ज्ञान केन्द्रले जनाएको छ ।