चाेरी भएकाे, हराएकाे माेबाइल खाेज्न के गर्ने ?

सांकेतिक तस्वीर : डटमेड ।

A+ A A-

केही समयअघि भक्तपुरकी सपना खत्रीको माेबाइल चाबहिल मित्रपार्कबाट चोरी भयो । उनले प्रहरीमा उजुरी दिइन् । तर, माेबाइल फेला पार्न उजुरी काफी भएन । माेबाइल फोन खाेज्न प्रहरीले उनीसित इन्टरनेसनल मोबाइल इकुपमेन्ट आइडेन्टीटी (आईएमईआई) नम्बर माग्याे । तर, सपनासँग आईएमईआई थिएन ।

'कतै टिपेर राखिराखेकाे भए हराएकाे माेबाइल भेट्टाउन सहज हुन्थ्याे हाेला', सपना भन्छिन्, 'नम्बर नभएकै कारण प्रहरीबाट अपेक्षित सहयाेग पाइएन ।'

उनले नेपाल दूरसञ्चार प्राधिकरणको पोर्टल https://eir.nta.gov.np/ मा पनि आईएमईआई दर्ता गरेकी थिइनन् । याे पाेर्टलमा दर्ता गरेकाे भए माेबाइल हराउँदा वा चोरी हुँदा भेट्टाउन मद्दत मिल्थ्याे ।

के हो आईएमईआई नम्बर ?

आईएमईआई नम्बर हरेक फोनमा हुन्छ । १५ अंकका यीनै नम्बर ट्रेस गरेर नेटवर्क पहिल्याउन र फोन पत्ता लगाउन सकिन्छ । फोनमा दुई वटा सिम कार्ड रहेमा दुई वटा आईएमईआई वा मोबाइल इक्विपमेन्ट आइडेन्टिफायर (एमईआईडी) नम्बर हुन्छ ।

यो नम्बर *#06# डायल गरेर पनि थाहा पाउन सकिन्छ । त्यसबाहेक फोनकै सेटिङभित्र पनि नम्बर फेला पार्न सकिन्छ ।

आईएमईआई दर्ता कसरी, किन गर्ने ?

नेपाल दूरसञ्चार प्राधिकरणकाे वेबसाइट https://eir.nta.gov.np/ मा गएर साइन अप गर्नुपर्छ । अनि फोनको आईएमईआई नम्बर, फोन नम्बर, नाम, ठेगाना र परिचय खुलाउनलाई नागरिकता, परिचयपत्र र पासपोर्टको स्क्यान कपी बुझाउनुपर्छ । आफ्नो इमेल ठेगाना पनि राख्नुपर्ने हुन्छ ।

आईएमईआई दर्ता गरेपछि फोन हराउँदा वा चोरी हुँदा अनलाइनबाटै नेपाल दूरसञ्चार प्राधिकरणमा उजुरी दिन सकिन्छ । उजुरीका लागि नेपाल दूरसञ्चार प्राधिकरणको अनलाइन पोर्टल https://eir.nta.gov.np/ अकाउन्ट भए लग इन गरेर, नभए व्यक्तिगत युजरबाट लग इन गर्न सकिन्छ ।

यसरी लग इन गरेपश्चात सूचना भर्न सकिन्छ । प्रयोगकर्ताहरूले सो नम्बरमार्फत आफ्नो फोन हराएमा ट्र्याक वा ब्लक गर्न सक्छन् ।

प्राधिकरणले प्रयोगकर्ताले उपलब्ध गराएको जानकारीका आधारमा टेलिकम अपरेटरहरूलाई मोबाइल फोन खोज्न अनुरोध गर्छ । उनीहरूले मोबाइल फोनको बारेमा प्रहरीलाई जानकारी दिन्छन् । सोही आधारमा प्रहरीले हराएको फोनको खोजी गर्छ ।

प्रकाशित मिति: सोमबार, कात्तिक ८, २०७८ ०८:०३