सुदाम सिके: रिलमा जंगी, रियलमा डरपोक

A+ A A-

कलाकार सुदाम सिकेलाई फिल्मको पर्दामा निकै रिसाह देखिन्छ । 'होस्टेल रिटर्न्स', 'क्रि'लगायत फिल्ममा दर्शकले उनको डरलाग्दो रूप देखेका छन् ।

पर्दामा मात्र होइन, वास्तविक जीवनमा पनि सुदाम उस्तै देखिन्छन् । रिहास, जंगी, डरलाग्दो ।

के वास्तवमै उनी रिसाह व्यक्ति हुन् ?

उनलाई बुझ्नेहरु भन्छन्, 'होइन, सुदाम डरलाग्दो छैन । डरपोक छ ।'

सुदाम रिसाह देखिन्छन् । बुझ्दै जाँदा उनी कोमल लाग्छन् । शान्त लाग्छन् ।

सुदाम भन्छन्, 'मलाई जसले चिनेको हुन्न उसले रिसाह देख्छ । तर, म त साह्रै डरपोक छु । मलाई मान्छेसँगै त डर लाग्छ ।'

रिसाह अनुहार आफ्नो लागि फाइदाजनक नै रहेको सुदामले सुनाए । 'सायद याे रिसाह अनुहारले मेरो बचाउँ गरिरहेको छ', सुदामले भने ।

सुदामको आमालाई आँटिलो छोरा मन पर्थ्यो । तर, उनी ठीक उल्टो निस्किए । आमाले उनलाई गाली गर्थिन्, 'तँ त हातमा चुरा लगाएर बस्... ।'

कसैले हेप्यो, ठग्यो, विभेद गर्‍यो भने सुदामलाई चुर-चुर रिस उठ्छ । तर, त्यसको तत्काल प्रतिकार गर्ने आँट उनीमा छैन । त्यहाँ उनी लुरुक्क पर्नुको विकल्प देख्दैनन् । तर, भित्र-भित्रै त्यो कुराले उनलाई रिस उठाइरहेको हुन्छ ।

'सायद, म भित्र धेरै रिस जम्मा भएकाले नै होला म यस्तो रिसाह देखिएको', सुदामले आत्मसमीक्षा गरे ।

सुदाम आफूलाई 'आडु' स्वभावको मान्छेका रूपमा परिभाषित गर्छन् ।

जो कोही मान्छे खुसी हुन चाहान्छ, सुदामलाई भने दुःखी हुन मन पर्छ । उनी भन्छन्, 'संसारका मान्छेहरु खुसी मान्छेको संगत गर्न चाहान्छन् । तर, मलाई दुःखी हुन मन पर्छ । मेरो साथी धेरै हुदैँनन् । मलाई धेरै साथी चाहिँदैन पनि ।'

सुदाम आफैँमा भने खुसी छन् । जे जस्तो छन्, सन्तुष्ट छन् ।

उनलाई नियमहरु मन पर्दैन । यो गर्, त्यो नगर् भनेको सुन्नै चाहदैनन् । 'मलाई त बनेका नियमहरु, बन्देजहरु तोड्न मन लाग्छ', सुदाम भन्छन्, 'साच्चिकै म मान्छे आडु छु के ।'

फिल्म 'कृ'को दृष्यमा सुदाम सिके ।

मन नपरेको लोकप्रियता

मान्छे, त्योमाथि कलाकार । लोकप्रियता मन नपराउने को होला र ?

सुदाम यस्ता व्यक्ति हुन्, जो लोकप्रियतासँग भागे ।

'होस्टेल रिटर्न्स' रिलिज पश्चात् सुदामलाई धेरैले चिन्न थाले । सार्वजनिक बसमा, बाटोमा, चिया पसलमा । उनलाई भेट्नेहरूले प्रश्‍न गर्न लागे- 'ए तपाईं त फलानो होइन ?' सुरुमा त सुदामलाई रमाइलो लाग्यो । पछि त्यही कुरा झ्याउ लाग्न थाल्यो ।

फिल्म खेलेपछि लोकप्रिय भइन्छ भन्ने कुरा सुदामलाई पत्तै थिएन । उनले सेलेब्रिटी हुन्छु भनेर फिल्‍म खेलेका पनि थिएनन् । उनलाई त्यो रहर पनि होइन । तर, एक्कासी यो सब भइदिँदा सुदाम दिक्क भए ।

उनी भन्छन्, 'म निर्धक्‍क भएर हिँड्न पाउँदिन, चिया पसलमा बसेर चिया-चुरोट खान पाउँदिन, सार्वजनिक यातायातमा पनि विभिन्न प्रश्न खेप्नुपर्छ भने त्यो लोकप्रियता मलाई चाहिदैँन । ममाथि को हो ? के हो ? भन्ने चासो नहोस् भन्ने लाग्छ ।'

फिल्म खेलेकै कारण उनले केही ठाउँमा अफ्ठ्याराे महसुस गर्नु परेको अनुभव सुनाउँछन्, सुदाम ।

सुदाम कलाकार बन्नु पूर्व 'पोर्टर'को काम गर्थे । फिल्म खेलिसकेपछि पनि उनले त्यो काम गरे । उनलाई लाज त्यो बेला लाग्यो, जब भारी बोकिरहेका सुदामसँग उनका शुभचिन्तक सेल्फी खिच्न आइपुगे ।

सुदाम भन्छन्, 'सुरुमा त उहाँहरू नै अलमलमा पर्नुभयो । पछि चिनिसकेर फोटो खिच्नुभयो । मलाई साह्रै नराम्रो लाग्यो ।'

कलाकार बन्न पूर्व सुदामले धेरै काम गरेका छन् । सबै कामलाई उनले उत्तिकै सम्मान गर्छन् । कलाकारितालाई ठूलो र अन्य कामलाई सानो नजरले उनले कहिल्यै हेरेनन् । 'आखिर सबैले काम नै गरेको त हो', सुदाम भन्छन्, 'कलाकारितालाई मात्रै किन यस्तो महत्व दिइन्छ मलाई पत्तो छैन ।'

नसोचेको कलाकारिता क्षेत्र

धादिङको ग्रामीण भेगमा हुर्किएका सुदामलाई कलाकार बन्ने ठूलो सपना थिएन । अलिअलि फिल्म हेर्न पाएका उनलाई निर्देशक तुलसी घिमिरे भने मन पर्थ्यो । केही संयोगले कलाकार बने भने तुलसी घिमिरेसँग काम गर्ने रहर उनको कलिलो दिमागमा दबेको थियो ।

उमेर बढ्दै गयो, रहर भुल्दै गए ।

एसएलसीमा राम्रो अंक ल्याएपछि उनलाई धेरैले इन्जिनियर पढ्न सुझाए । आफ्नो इच्छाले भन्दा पनि अर्काले पढ्न भनेकै भरमा उनी इन्जिनियर पढ्न काठमाडौं छिरे । तर, उनले इन्जिनियरको पढाई पूरा गरेनन् ।

त्यहीँ समय उनलाई विदेश जाने भूत चड्यो । वेटर सिकेर विदेश जाने सोचले उनले वोटर सिके । विभिन्न होटलमा काम गरे । अन्तत: दुबई जाने निधो गरेर त्यसको तयारी सुरु गरे ।

होटलमा काम गरिरहेकै समयमा उनले 'हिमालयन टाइम्स' पत्रिकाका अभिनयको वर्कसपका लागि आवेदन खुल्ला भएको विज्ञापन देखे । सोही विज्ञापनले उनको करिअरलाई 'यू टर्न' गरायो ।

सुदामले एकचोटी अडिसन दिने निधो गरे । राष्ट्रिय नाचघरमा भएको उक्त अडिसनमा सुदाम छनोट भए । पहिलो वर्कसप राम्रै भयो । सुदामको काम धेरैको नजरमा पर्‍यो ।

दोस्रो वर्कसप बलिउड अभिनेता नसुद्धिन शाहसँग पर्‍यो । जहाँ अहिलेका नामी कलाकारहरू दयाहाङ राई, नम्रता श्रेष्ठ, ऋचा शर्मा, विनय श्रेष्ठ लगायत पनि सामेल थिए । नसुद्धिनले पनि सुदामको कामलाई रुचाए ।

वर्कसप सकियो, अब गर्ने के ?

अभिनयमा उनले विकल्प देखेनन् । पुन: विदेश जानकै लागि प्रकृयामा लागे ।

विदेश जाने लगभग पक्का भयो । बुबा-आमालाई भेटेर विदेश जाने सोचले उनी धादिङ लागे । घर पुग्दा नपुग्दै उनलाई मण्डला थिएटरका राजन खतिवडाको फोन आयो, 'सुदाम नाटक खेल्छौ ?'

सुदामले एक पटक प्रयास गरौँ न त भन्ने सोचेर 'ओके' गरे ।

नाटक राम्रै भयो । सुदामको कामलाई धेरैले रुचाए पनि । तर, सुदाम नाटक गरेर नै पालिन्छु भन्ने कुरामा विश्वस्त थिएनन् ।

सुदाम भन्छन्, '१५ वटा नाटक र केही फिल्ममा काम गरिसक्दा पनि म मेनपावर धाइरहेको थिए । केही राम्रो अवसर आए भन्नुस् है भनेर म बारम्बार मेनपावर पुग्थे ।'

मेनपावर र नाटकको दौडधुप ७ वर्षदेखि चलिरहेको थियो । सुदामले केही गम्भीर भएर सोचे, 'जे भयो भयो । अब ३ वर्ष चाहिँ नाटकलाई नै दिन्छु । अनि पनि भएन भने विदेश जान्‍छु ।'

सुदाम भन्छन्, 'नाटकमा आफ्नो स्थान भेट्न अलिकति मात्रै ठाउँ बाकीं छ कि भन्ने लागेर नै नाटकलाई पूर्ण समय दिने सोच बनाएको थिए । त्यसपश्चात् विदेश जाने सोच नै हरायो ।'

नाटक नै गरेर काठमाडौंमा टिक्नु गाह्रो कुरा थियो । सुदामले यस बीचमा धेरैको साथ पाए । त्यसैबाट उनी टिक्न सके । सुदाम भन्छन्, 'ती सहयोगी मनहरू थिएनन् भने म यतिबेला कहाँ हुन्थे थाहा छैन ।'

सुदामलाई नाटक गरेर धेरै पैसा कमाउनु पनि छैन । रहर लागुन्जेल गर्ने, रहर पुगेसी गाउँ फर्किने सोचमा छन् उनी । बुढेलकालमा उपचारका लागि केही रकम जम्मा गर्न सके उनी काठमाडौं छोड्ने पक्षमा छन् ।

कथा भन्ने रहर

अहिले सुदाम नाटकमा अल्छिनुको एउटै कारण छ- कथा भन्न ।

सुदामभित्र धेरै कथाहरू छन्, जुन उनी भन्न चाहान्छन् । उनलाई नाटकमा केही नयाँ अभ्यास गर्नुछ । थाहा पाएर होइन, थाहा पाउनको लागि गर्नुछ ।

नाटकमात्र होइन, अहिले उनलाई फिल्ममा काम गर्ने रहर पनि बढिरहेको छ । आफू भित्र रहेका विभिन्न भावनालाई अभिनयमार्फत् व्यक्त गर्न चाहन्छन्, सुदाम ।

उनी भन्छन्, 'नाटकमा साना-साना कुराहरूमा काम गर्न सकिँदैन । सायद मैले जान्दिनँ पनि । तर, फिल्ममा मैले आफ्नो भावना विभिन्न माध्यमबाट व्यक्त गर्न सक्छु । त्यसैले मलाई अहिले फिल्‍ममा काम गर्ने रुचि बढेको छ ।'

आफूले खोजेजस्तो कथा, आफूलाई सुहाउने भूमिका र आफूलाई बुझ्ने निर्देशक भेटे उनी तत्काल फिल्ममा काम गर्न तयार छन् ।

तर, पछिल्‍लो समय सुदामलाई फिल्मको अफर आउँदैन । सायद आफूलाई सुहाउने क्यारेक्टर नभएकाले अफर नआएको सुदामको बुझाई छ । उनी भन्छन्, 'सुहाउँदो भूमिका आएको खण्डमा फिल्ममा काम गर्नेछु ।'

तस्वीरहरू : सुशील श्रेष्ठ

प्रकाशित मिति: शनिबार, कात्तिक ६, २०७८ ०७:३२