कम्पनीको नाम परिवर्तन गर्दै फेसबुक, के राख्ला नयाँ नाम ?

A+ A A-

सामाजिक सञ्जाल फेसबुक कम्पनीले आफ्नो नाम परिवर्तन गर्ने भएको छ । फेसबुकले कम्पनीलाई 'रि–ब्रान्ड' गर्न २८ अक्टोबरमा नयाँ नाम उद्घोष गर्ने बताएको छ ।

फेसबुकका सीईओ मार्क जुकरबर्गले कम्पनीको वार्षिक सम्मेलनको अवसरमा नाम परिवर्तन गर्ने योजना बनाएको अमेरिकी टेक्नोलोजी वेबसाइट दी भर्जले जनाएको छ ।

केही समयअघि मात्र फेसबुकले आफ्नो कम्पनी विकास गर्न करिब १० हजार जागिरको पद खुलाउने घोषणा गरेको थियो । फेसबुकले प्रयोगकर्ताको मानसिक स्वास्थ्यमा असर पुर्‍याएको, डाटा किनबेच गरेको आरोप खेपिरहेको बेला आफ्नो रि–ब्रान्ड गर्ने निर्णय गरेको हो ।

फेसबुक मेटाभर्समा पनि प्रयोगकर्ताको ध्यान केन्द्रित गर्न चाहन्छ ।

सामान्य हिसाबमा बुझ्दा मेटाभर्स भन्नाले भर्चुअल रियालिटी (भीआर) को विस्तारीत रूप हो । हाल भीआर गेमिङहरूको लागि मात्र प्रयोग हुने गरेको छ । तर अब भीआरमार्फत हेडसेट प्रयोग गरी मान्छेले एकअर्कासँग कुराकानी गर्न, गेम खेल्न तथा काम गर्न सक्ने अनुमान गरिएको छ ।

त्यस्तै फेसबुकले ध्यान केन्द्रीत गर्न चाहेको मेटाभर्समार्फत पनि प्रयोगकर्ताले काम गर्न, खेल्न, कन्सर्ट गर्न, सिनेमा हेर्न लगायतका कामहरू गर्न सक्छन् ।

यसरी नाम परिवर्तन गर्नेमा फेसबुक पहिलो कम्पनी भने होइन । यसअघि पनि थुप्रै कम्पनीले रिब्रान्डिङको लागि नाम परिवर्तन गरेका छन् ।

जस्तो, सन् २०१५ मा गुगलले आफ्नो मुख्य कम्पनीको नाम अल्फाबेट बनाएको थियो । त्यस्तै स्न्यापच्याटले पनि आाफ्नो नाम परिवर्तन गरी ‘स्न्याप इंक‘ बनाएको थियो ।