१७ वर्षपछि प्रहरीले यसरी पत्ता लगायाे राणा परिवारका सदस्य जोडिएको विभत्स हत्या

१७ वर्षपछि प्रहरीले यसरी पत्ता लगायाे राणा परिवारका सदस्य जोडिएको विभत्स हत्या

A+ A A-

१७ वर्षअघि भएको एक हत्या प्रकरणमा जोडिएका उच्च घरनाका एक जनालाई काठमाडौं प्रहरीले पक्राउ गरेको छ । पक्राउ पर्नेमा प्युठान साविक खलङ्गा गाविस घर भएर हाल काठमाडाैंको धुम्बाराही बस्ने ४१ वर्षीय शनिनरसिंह राणा छन् ।

राणासहित गोरखा सिरानाचोक गाउँपालिका–५ का सानो धने भन्ने धनबहादुर गुरुङले २०६१ मा दोलखा भीमेश्वर नगरपालिका–३१ का अर्जुन भन्ने खिमबहादुर शिवाकोटीलाई काठमाडाैंकाे पुतलीसडकमा पार्किङ्को विषयमा विवाद हुँदा हत्या गरेका थिए ।

हत्यालगत्तै फरार भएका उनीहरूमध्ये काठमाडौं प्रहरीले राणालाई १७ वर्षपछि १५ असाेजमा काठमाडौंको मैह्पीबाट पक्राउ गरेको हो । गुरुङको खोजी कार्य जारी रहेको काठमाडौं प्रहरी प्रमुख एसएसपी अशोक सिंहले जानकारी दिए ।

‘हामीले लामो अनुसन्धानपछि शिवाकोटी हत्याका अभियुक्तलाई पक्राउ गर्न सफल भएका छौं । अपराधी कुनै हालतमा पनि बच्न सक्दैन भन्ने यो उदाहरण पनि हो,’एसएसपी सिंहले भने ।

शिवाकोटी हत्याका अर्का अभियुक्त गुरुङलाई पनि प्रहरीले चाडै कानुनी दायरामा ल्याएरै छोड्ने उनले दाबी गरे ।

उसो त काठमाडौं प्रहरी प्रमुखको जिम्मेवारी सम्हाले यता एसएसपी सिंह नेतृत्वको प्रहरी टोलीले हालसम्म एक हजारभन्दा बढी विभिन्न अपराधमा संलग्न भइ फरार रहेका अपराधीलाई पक्राउ गरी कानुनी दायरामा ल्याइसकेको छ । राणा सोही सिलसिलाका एक अभियुक्त हुन् ।

यी बाहेक एसएसपी सिंह काठमाडौं प्रमुख भएर आएयता कुनै ठूला अपराधिक घटना पनि भएका छैनन् ।

यसरी भएको थियो शिवाकोटीको हत्या

दोलखाका खिमबहादुर शिवाकोटीले पुतलीसडकस्थित एकघरको सटर भाडामा लिएर एकता प्रेस छापाखाना सञ्चालन गरेर बसेका थिए ।

२२ पुस २०६१ को साँझ उनको छापाखाना खुल्लै थियो । देशमा त्यतीबेलाक माओवादी द्वन्द्व चर्किएको थियो । आम सर्वसाधारण त्यस्तै पनि त्रासको वातावरणमा बाँचिराखेका थिए । सत्ता राजाको हातमा थियो ।

दलहरूमाथि प्रतिवन्ध लगाइएको थियो । रातिको समय खासै मानिसको हिँडडुल हुँदैन थियो । तर, त्यो साँझ दुई जना युवा शिवाकोटीको छापाखाना अगाडि मोटरसाइकलमा आइपुगे ।

बा१६प ८६५४ नम्बरको बुलेट मोटरसाइकलमा आएका मध्ये एक २४ वर्षीय (हाल ४१ वर्षीय) शनिनरसिंह राणा र अर्का गोरखाका धने भन्ने धनबहादुर गुरुङ थिए ।

उनीहरूले शिवाकोटीको छापाखाना अगाडि नै मोटरसाइकल पार्किङ गर्न खोजेँ । त्यहीँ विषयमा शिवाकोटी र उनीहरूबीच भनाभन भयो ।

सामान्य पार्किङकाे विषयबाट उत्पन्न विवादका क्रममा राणा र गुरुङले शिवाकोटीलाई हेलमेट, फलामको रड र चिया पकाउने भाडोले टाउकाे र अनुहारमा विभत्स तरिकाले प्रहार गरेर फरार भए ।

राणा र गुरुङको कुटपिटबाट घाइते भएका शिवाकोटीलाई उनका परिवारले तत्कालै उपचारको लागि वीर अस्पताल पुर्‍याए । तर, अस्पतालले लगत्तै उनलाई मृत घोषणा गरेको थियो ।

प्रहरीकाे प्रारम्भिक अनुसन्धानबाट रााणा र गुरुङ शिवाकाेटीकाे छापाखाना नजिकै रहेका आफ्नाे साथी भेट्न पुगेकाे खुलेकाे छ ।

को हुन् शनिनरसिंह राणा ?

१७ वर्षअघिको हत्या मुद्दाका अभियुक्त शनिनरसिंह राणा हालसम्म खुल्लम खुल्ला काठमाडौंमै बस्थे । शिवाकोटीको हत्या हुँदा नै प्रहरीले उनले प्रयोग गरेको मोटरसाइकल सनाखत गरिसकेको थियो ।

तर, यो बीचमा उनीमाथि कहिल्यै सोधपुछसमेत हुन सकेको थिएन। कारण हो–उनको परिवारिक सम्बन्ध दरबारसम्म नै थियो ।

प्रहरीका अनुसार राजपरिवारसँग सम्बन्ध जोडिएका र उच्च घरनाका शनिनरसिंहका आफन्त शिवाकोटीको हत्या हुँदा नेपाली सेनादेखि नेपाल प्रहरीकै उपल्लो तहमा कार्यरत थुप्रै अधिकृत थिए ।

जसको प्रभाव अनुसन्धान गर्ने प्रहरीमाथि सिधा पर्ने गर्थ्याे । त्यसकारण हालसम्म प्रहरीले उनीमाथि कुनै अनुसन्धान गर्न सकेको थिएन ।

त्यसैको आडमा उनी शिवाकोटीको हत्यादेखि हालसम्म निर्वाध काठमाडौंमै बसे । तर, १७ वर्षदेखि अनुसन्धान हुन नसकेको शिवकोटी हत्या प्रकरण हाल आएर टुङ्गाे लागेकाे प्रहरी दाबी छ ।

काठमाडौं परिसरका एक प्रहरी अधिकारीका अनुसार राणाले शिवाकोटीको हत्यापछि आफ्नो नागरिकतासमेत परिवर्तन गरेको खुलेको छ ।

परिसरका निमित्त प्रवक्ता डीएसपी निरञ्जन भट्टले राणामाथिको अनुसन्धान अझै जारी रहेका कारण धेरै कुरा भन्न नमिल्ने बताए ।

राणाले प्रयोग गरेको बा १६ प ८६५४ नम्बरको मोटरसाइकल उनको नाममा नभई ईश्वरी राणाको नाममा रहेको खुलेको डीएसपी भट्टको भनाइ छ । ईश्वरी र शनिनरसिंह नजिकका आफन्त हुन् ।

ईश्वरी राणा हाल फरार छन् । प्रहरीका अनुसार हत्या हुँदा प्रयोग भएको मोटरसाइकलसमेत राणाको घरमा भेटिएको छैन । उनीहरूले त्यो मोटरसाइकल बेचेको पनि देखिएको छैन ।

उनीहरूले उक्त मोटरसाइकल कतै नष्ट गरेको अनुमान प्रहरीको छ । यातायत कार्यालयमा दर्ता भएको उक्त मोटरसाइकल धनी खोज्दै जाँदा प्रहरी अभियुक्तसम्म पुग्न सफल भएको हो ।

राणामाथि अहिले महानगरीय प्रहरी वृत्त सिंहदरबारले अनुसन्धान जारी राखेको छ ।

प्रकाशित मिति: बिहीबार, कात्तिक ४, २०७८ १०:१८