नतिजा खारेजीको माग गर्दै २४ दिनदेखि विद्यार्थी अनशनमा

A+ A A-

त्रिभुवन विश्वविद्यालय सेवा आयोगले लिएको लिखित परीक्षाको नतिजा खारेजीको माग गर्दै विद्यार्थीले रिले अनशन सुरु गरेको २४औं दिन पुगेको छ । आयोगले सञ्चालन गरेको परीक्षामा पदाधिकारी र कर्मचारीका नातेदार तथा आफन्तलाई उत्तीर्ण गराइएको भन्दै विरोधस्वरुप विद्यार्थी संगठनले रिले अनशन सुरु गरेका हुन् ।

त्रिविस्थित आयोग परिसरमा २३ दिनदेखि अनशन बस्दासमेत माग सुनुवाइ नभएको अखिल क्रान्तिकारी निकट विद्यार्थीले गुनासो गरेका छन् ।

आयोगले २०७५ जेठमा खुला प्रतियोगिताअन्तर्गत प्रशासन तथा प्राविधिक तहका विभिन्न पदमा परीक्षा लिएको थियो । आयोगले नतिजा गत १४ वैशाखमा सार्वजनिक गरेको थियो । आयोगका पदाधिकारीले आफू निकट तथा उच्च राजनीतिक नेतृत्वको दबाबमा केही व्यक्तिलाई उत्र्तीण गराएको भन्दै नतिजा सार्वजनिक भएलगत्तै अख्तियारमा उजुरी परेको थियो ।

अनुसन्धान आयोगले प्राथमिकतासाथ अनुसन्धान गरिरहेको अनुसन्धान आयोगका सहप्रवक्ता मदन कोइराला बताउँछन् ।

त्रिवि सेवा आयोग अध्यक्ष चैतन्य शर्मा, प्रमुख परशुराम कोइराला, त्रिवि केन्द्रीय क्याम्पसका प्रिन्सिपल कृष्ण आचार्य, पूर्वरजिस्ट्रार चन्द्रमणि पौडेल, नेतालगायत उच्च पदाधिकारीका ३९ जना नातेदार त्रिवि सेवा आयोगले लिएको परीक्षामा उत्तीर्ण भएको अखिल क्रान्तिकारी निकट विद्यार्थी संगठनले जनाएको छ ।

त्रिभुवन विश्वविद्यालय सेवा आयोगले लिएको लिखित परीक्षा विवादमा परेपछि शाखा अधिकृत पदको २ जेठ २०७६ देखि हुने भनिएको मौखिक परीक्षा स्थगित गरिएको थियो । तर, आन्दोलनरत विद्यार्थीले भने त्रिवि सेवा आयोगले अन्तर्वार्ता लिइरहेको जनाएका छन् । यस विषयमा त्रिवि सेवा आयोगका अध्यक्ष शर्मालाई बारम्बार सम्पर्क गर्न खोज्दा उनीसँग सम्पर्क भएन ।

अनुसन्धान आयोगका सहप्रवक्ता कोइराला भन्छन्, ‘अनुसन्धान आयोगले यस विषयलाई प्राथमिकताका साथ अनुसन्धान गरिरहेको छ । अन्तर्वार्ता भइरहेको भनिए पनि अनुसन्धानमा कैफियत भेटिएमा परीक्षा र अन्तर्वार्ताको सबै प्रक्रिया रद्द हुनेछ ।’

अखिल क्रान्तिकारी निकट विद्यार्थी संगठनकी केन्द्रीय उपाध्यक्ष शिलु न्यौपानेले शान्तिपूर्ण आन्दोलनबाट कुनै निष्कर्ष ननिस्किए आन्दोलनको स्वरुपमा परिवर्तन हुने बताइन् । न्यौपाने भन्छिन्, ‘सेवा आयोगले शिक्षा मन्त्रालयलाई पत्र पठाएको बताएको छ । शिक्षामन्त्रीको कस्तो जवाफ आउँछ, पर्खेर बसेका छौं ।’

आयोगका भ्रष्ट कर्मचारीलाई बर्खास्त गर्नुपर्ने, त्रिवि सेवा आयोग खारेज गर्नुपर्ने र अवैधानिक रुपमा प्रकाशित गरिएको नतिजा खारेज गर्नुपर्ने मागसहित २४ दिनदेखि अखिल क्रान्तिकारी निकट विद्यार्थी संगठन रिले अनशनमा छन् ।

प्रकाशित मिति: बिहीबार, जेठ ३०, २०७६ ००:५५