सरकारको १०० दिनबारे प्रदीप ज्ञवाली- सरकारप्रति मोहभंग भएको अवस्था छ (अन्तर्वार्ता)

सरकारको १०० दिनबारे प्रदीप ज्ञवाली- सरकारप्रति मोहभंग भएको अवस्था छ (अन्तर्वार्ता)

A+ A A-

आज सरकारले आफ्नो सय दिन पूरा गरेको छ । सरकार गठनको सय दिनलाई हनिमुन अवधिको रुपमा व्याख्या गरिन्छ । यो अवधिमा सरकाले मुख्यत: संविधान जोगाएको, कोरोनाविरुद्ध खोपको सुनिश्चितता बढाएको, आर्थिक लगानीको माहोल सिर्जना गरेको लगायतलाई आफ्नो उपलब्धीको रुपमा प्रस्तुत गरिरहेको छ ।

तर प्रमुख प्रतिपक्षी दलले भने सरकारको सय दिने कार्यकाललाई कसरी मूल्यांकन गरेको छ ? यही विषयलाई केन्द्रबिन्दुमा राखेर एमाले नेता प्रदीप ज्ञवालीसँग लिइएको भिडियो अन्तरवार्ताको सारसंक्षेप ः

सरकारको सय दिनको अवधि पूरा गरेको छ । यो अवधिमा सरकारले गरेका कामलाई कसरी हेर्नुभएको छ ?

यो सरकार आउनुअघि धेरै हल्लाखल्ला भए । यो सरकार गठन हुनु नै मुलुकमा गणतन्त्र आउनुभन्दा ठूलो उपलब्धी हुने जसरी सञ्चार माध्यम र विश्लेषकहरूले प्रचार गरे । तर यो अवधिमा सरकारले गरेका कामका कारण उनीहरूमा अहिले सरकारप्रति मोहभंग भएको अवस्था छ । यो सरकारको गठनको प्रक्रियालाई प्रतिगमन उल्टिएर अग्रगमन आयो भन्ने जुन अवस्था थियो, त्यसको अन्त्य भएको छ । यो नै हाम्रा लागि ठूलो उपलब्धी हो ।

अहिलेको सरकारका गतिविधि र यसप्रतिको मोहभंगको अवस्थाले तपाईंहरूलाई चुनावमा जान त सजिलो हुने भयो हैन ?

चुनाव त आवधिक कुरा हो । चुनावहरू आउँछन् जान्छन् । सरकारहरू पनि आउँछन् जान्छन् । यो सामान्य कुरा हो । तर देशले के पायो र देश कस्तो बाटोमा हिँड्दैछ भन्ने विषय प्रमुख हो । देशको तुलनामा सरकार र पार्टीको पफर्मेन्स तपसिलको कुरा हो । त्यसैले मैले सरकारको गतिविधिले एमालेलाई के फाइदा भयो ? के नोक्सान भयो ? भनेर हेरेको छैन ।

अहिलेको सरकार अवैधानिक तवरले आएको हो । जुन कुरा अहिले मन्त्रिमण्डलमा भएको भागभण्डाले पनि प्रमाणित गरेको छ । हामीले कार्यपालिका र न्यायापालिकाबीचको लक्ष्मणरेखा नाघ्नु हुँदैन । तर यो सरकारले त्यो लक्ष्मण रेखा नाघेको छ । त्यसैले कुनै पनि कोणबाट यो सरकारका कामकारबाहीलाई सकारात्मक मान्ने ठाउँ नै छैन ।

यो सरकार बन्नुमा कतै न कतै एमाले सरकारका गलत गतिविधि जिम्मेवार छन् भन्ने गरिन्छ । तपाईंले सरकारका कमिकमजोरी त औंल्याउनुभयो, तर यसमा तपाईंहरूको पनि हिस्सेदारी छ कि ?

२०१७ सालमा राजा महेन्द्रले 'कू' गर्नुमा बीपी कोइराला त पक्कै पनि दोषी थिएनन् होला । तर सूर्यबहादुर थापा, विश्वबन्धु थापा, तुलसी गिरीलगायत पार्टीभित्रकै मान्छेहरू प्रयोग भए । तर ०१७ साल आउनुमा बीपी दोषी थिए त ? थिएनन् नि ।

त्यसैले यसलाई फराकिलो ढंगले हेर्नु उपयुक्त हुन्छ । नेपालमा कुनै पनि शक्तिलाई राम्ररी काम गर्न नदिने, स्थायित्व नचाहने, लामो समय स्थीर सरकार भएको हेर्न नचाहने शक्तिहरू देशभित्र र देश बाहिर पनि छन् । बीपी कोइरालादेखि केपी ओलीसम्म राम्रो काम गर्न चाहने सबै प्रधानमन्त्रीहरू त्यस्तै शक्तिको शिकार भएका हुन् ।

यो सरकारले ठिकै गर्‍यो भन्ने केही त होला नि । केही छैन त्यस्तो ?

एउटा छ । ८८ दिनसम्म पाँचजना मन्त्रीले देश चल्दाखेरी देशको व्ययभार कम भयो । यो सरकारको राम्रो पक्ष भनेको त्यही हो ।

आम जनतामा आशावादिता बढ्यो कि निरासा बढ्यो ? देश बन्छ भन्ने कुरामा भरोसा बढ्यो कि कमजोर भयो ? लोकतन्त्रका आधारभूत स्तम्भहरू सुदृढ भए कि खल्बलिए ? कुनै पनि सरकारको मूल्यांकन यिनै कुराहरूबाट हुन्छ ।

आर्थिक उपलब्धीको विषयमा अहिले नै विश्लेषण गरिहाल्ने बेला भएको छैन । त्यसको लागि एक वर्षको समय दिनुपर्छ । तर यो अवधिमा सरकाले जे गर्नुपर्थ्यो त्यो गरेन, जे गर्न नपर्ने त्यो काम गर्‍यो । .

एमाले नेता ज्ञवालीसँग शिलापत्रका लागि केशवराज जोशीले गरेको भिडियो अन्तर्वार्ता :