बुलेटबाटै ग्यास चोर्ने धन्दा, भारतीय चालक र होटल सञ्चालक पक्राउ

A+ A A-

भारतीय ग्यास बुलेटबाट ग्यास चोरी हुने गरेको पाइएको छ । मकवानपुर प्रहरीले बुलेटबाट ग्यास चोरीरहेको अवस्थामा तीन जनालाई पक्राउ गरेसँगै यो कर्तुत बाहिरिएको हो ।

भारतबाट आएका ग्यास बुलेटले नेपालका ग्यास कम्पनीहरूलाई ग्यास ढुवानी गर्ने गरेका छन् । तर, ती बुलेटका चालकहरूकै संलग्नतामा ग्यास चोरी हुने गरेको पाइएको हो । २ कार्तिकमा मकवानपुरको मनहरी गाउँपालिका–६ नयाँबस्तीमा टंयाकीबाट चालकहरू र होटल सञ्चालकले मिलेर ग्यास चोरी गरेको प्रहरीले जनाएको छ ।

नयाँबस्तीमा होटल सञ्चालन गर्दै आएका ४३ वर्षीय भरत कार्कीले ग्यासका बुलेट चालकहरूसँगको मिलेमतोमा सिलिन्डरमा ग्यास भर्ने गरेका छन् । उनले भरिएको सिलिन्डर गाउँ लगेर बिक्री गर्ने गरेको मकवानपुरका निमित्त प्रहरी प्रवक्ता प्रहरी निरीक्षक देवेन्द्र दासले जानकारी दिए ।

प्रहरीलाई ग्यास चोरी भइरहेको सूचना आएपछि ईलाका प्रहरी कार्यालय मनहरीका प्रहरी निरीक्षक प्रकाश थापाको कमान्डमा खटिएको टोलीले कार्कीलाई होटलबाट ग्यास सिलिन्डरसहित पक्राउ गरेको हो ।

कार्कीको होटलबाट कम्पनीको खाली सिलिन्डर १८ थान र भरिएको १३ थान गरी ३१ थान सिलिन्डर बरामद गरिएको प्रहरी निरीक्षक दासले जानकारी दिएका छन् । एनएल०१एन०१३१ नम्बरको ग्यास बुलेटका चालक चुनु कुमार र यूपी–७०बीटी ९९९६ का चालक विपिन कुमारलाई पक्राउ गरिएको उनले बताए ।

नियन्त्रणमा रहेका ग्यास बुलेट उनीहरूले पोखराको शक्ति ग्यास उद्योग र धादिङको क्याप्सन ग्यास उद्योगका लागि भारतबाट ल्याएका थिए ।

भारतीय बुलेट चालकहरूले कार्कीको पसलमा यसअघि पनि अवैध रुपमा ग्यास बिक्री गर्दै आइरहेको प्रहरीको प्रारम्भिक अनुसन्धानबाट खुलेको छ । चालकहरूले एक हजार रुपैयाँमा होटल सञ्चालक कार्कीलाई बिक्री गर्ने र उनले गाउँमा १३ सय रुपैयाँमा ग्यास दिँदै आएको खुलेको हो ।

कार्कीले बुलेटबाट सिलिन्डर भर्न फलामको पातामा पाइप जोडिएको घरेलु उपकरण निर्माण गरेका थिए । ‘बुलेटको खतरा लेखिएको बक्स खोलेर घरेलु उपकरण टाँसेर ग्यास चोरी हुने गरेको रहेछ,’ मनहरीका प्रहरी निरीक्षक थापाले भने, ‘यसअघि पनि अन्य ग्यास बुलेटहरूबाट ग्यास चोरी गर्ने गिरोह नै संलग्न छ ।’

प्रकाशित मिति: बुधबार, कात्तिक ३, २०७८ १७:३९