झापामा बैमौसमी वर्षाको कहर: जिल्लाभर ७६ परिवार विस्थापित, ८० घर जोखिममा

A+ A A-

केही दिनदेखि भैरहेको अविरल वर्षाका कारण झापामा ठूलो क्षति भएको छ । वर्षासँगै आएको बाढी र पहिरोका घटनाले यहाँ ठूलो सङ्ख्यामा मानिसहरू विस्थापित भएका छन् ।

वर्षाका कारण नदी बढेर गाउँमा पस्दा विस्थापित हुनेको सङ्ख्या ठूलो छ ।

झापाको गौरीगंज गाउँपालिका वडा नम्बर २ भाकुरमारीमा माइखोलामा बढेको पानीको बहावले कटान गरी खोला गाउँमा पस्दा ४० घर डुबानमा परेका छन् । जिल्ला प्रहरी प्रवक्ता राकेश थापाका अनुसार उनीहरूलाई सुरक्षित स्थानमा राखिएको छ ।

यस्तै शरणामति क्षेत्रमा डुबान हुँदा १६ घर परिवार विस्थापित भएका छन् । वृद्धवृद्धा र बालबालिकाहरू आफन्तको घरमा शरण लिएर बसेका छन् । विस्थापित १६ घरमा ८३ जना परिवार सदस्य रहेको जिल्ला प्रहरी कार्यालय झापाले जनाएको छ ।

झापा शिवसताक्षी नगरपालिका ५ कोभेलामुनी बस्ने १२ घर डुबानमा परेका छन् । भएको हुँदा उक्त घरका मानिसहरू लाई सुरक्षित स्थानतर्फ सार्ने कार्य भइरहेको छ ।

भद्रपुर नपगरपालिका ५ को देवी बस्ती, मेची किनार र शान्ति टोलमा ६० घर जोखिममा परेका छन् । मेची नदीमा आएको बाढी बस्तीमा पसेपछि घरमा बस्न जोखिम भएको हो । उक्त घर परिवारका मानिस तथा पशु चौपायहरूलाई भद्रपुर बजारका सुरक्षित स्थान तर्फ सारिएको प्रहरीले जनाएको छ ।

मेचीनगर नगरपालिका ८ पुण्य चोकमा वर्षाको पानी पस्दा ३ घर विस्थापित भएका छन् । ओमप्रकाश तिम्सिना, पदमबहादुर लिम्बू र अरुण पौडेलको घरमा पानी पस्दा सो परिवार नै विस्थापित भएका हुन् ।

वर्षाका कारण मेचीनगर ६ मेची खोलाको बगरमा बगर सम्म्याई खेती गरेको धान बाली सखाप भएको छ । ७ कठ्ठाबारीमा लगाएको धानसहितको धान खेत मेची खोलाले कटान गरेको छ ।

अविरल वर्षाका कारण रतुवा खोलामा आएको बाढीले झापाको दमक नगरपालिका ७ पशुहाटडाँडा पूर्वपट्टिको रतुवा खोलाको किनारमा रहेको एउटा घर बगाएको छ । मानिसहरू भने सुरक्षित रहेको दमक प्रहरीले जनाएको छ । सोही क्षेत्रका अन्य २० घर भने जोखिममा छन् । उनीहरूलाई सुरक्षित स्थानमा सार्ने काम भइरहेको छ ।

झापाको झापा गाउँपालिका २ स्थित ठुलो माइखोलामा पानीको बहाव बढेपछि सो क्षेत्रका चार घर उच्च जोखिममा परेको छ । घरभित्र ३ फिट पानी पसेपछि घरमा बस्न नसकिने अवस्था आएको हो । उनीहरू नजिकैको सुरक्षित स्थानमा बसेका छन् ।

प्रकाशित मिति: बुधबार, कात्तिक ३, २०७८ १५:५६