‘हाम्रो यो ढलेको घर फेरि उठ्छ र ?’

सोमबार रातिदेखिको हावाहुरी र वर्षाका कारण धनुषाको जनकनन्दनी गाउँपालिका- १ को फूलबरिया टोलस्थित अवध यादवको घर भत्कियो । यादव किसान हुन् । घरमा यादवको परिवारका ९ जना बस्छन् ।

घर भत्किएपछि उनीहरूको विचल्ली भएको छ । ‘अचानक मौसम बिग्रँदा हावाहुरी र पानीले घर भत्कायो,' अवध भन्छन्, 'भगवानले हामीलाई त बचाउनुभयो । तर अब कहाँ बस्ने ? के खाने ? केही टुङ्गो छैन ।'

अचानक घर भत्किँदा मालसामान र अन्नपात नष्ट भएको उनी बताउँछन् ।

‘पहिले ठूलो हावाहुरी आयो । त्यसपछि वर्षा सुरु भयो,' अवध भक्कानिँदै घटना विवरण सुनाउँछन्, 'आठ बजे अचानक घरबाट माटो फुसफुस फुस्स झर्न थालेपछि हामी भाग्यौँ । अनि घर लड्यो ।'

भाग्ने क्रममा अवधका छोरा विनोदलाई सामान्य चोट पनि लाग्यो । 'बल्लबल्ल ज्यान बाच्यो,' विनोद भन्छन्, ‘नभागेको भए त्यही घरमै पुरिन्थ्यौँ ।’

घर भत्किएपछि यादव परिवार त्रिपालमुनि बस्दै आएको छ । आफूहरूले अहिलेसम्म सहयोग नपाएको उनीहरूको गुनासो छ ।

उनीहरूलाई गाउँपालिका अध्यक्षले केही गर्देलान् कि भन्ने अपेक्षा छ । अवध भन्छन्, ‘मेयर साब (गाउँपालिका अध्यक्ष) लाई भनेको छु । आज आउनु भन्नुभएको छ ।' तर, ढलेको घर कसरी उठाउने भन्ने चिन्तामा छन् उनी । भन्छन्- ‘के हाम्रो यो ढलेको घर फेरि उठ्छ र ?’

उनीहरूलाई घर ढलेसँगै ऋण र त्यसको ब्याज बढ्ने चिन्ताले पनि सताएको छ । ‘घर त गयो गयो । साहुलाई यसपाली धान दिएर बचेकोले ऋण तिर्छु भन्ने सोचेको थिएँ,' विनोद भन्छन्, 'ब्याज मात्र बढ्ने भयो ।’

विनोदलाई बालबच्चालाई के खुवाउने भन्ने चिन्ता पनि छ । उनी भन्छन्- ‘छोराछोरीलाई के खुवाउने ? कसरी पालनपोषण गर्ने ?’

गाउँपालिका अध्यक्ष अब्बदुल वारिक शेषले यो विषयमा केही सोच्ने बताए । ‘स्थानीयबाट जानकारी पाएको छु । आजै यो विषयमा केही सोच्छौँ,’ अध्यक्ष शेषले शिलापत्रसँग भने, ‘भारी वर्षाका कारण अन्य किसानको खेतिबाली नोक्सान भएको छ । त्यसको लागि पनि छलफलबाट निर्णय गर्छौं ।’

वर्षाका कारण यादव जस्तै मधेशका सयौँ किसानको अन्न बालीमा नोक्सान भएको छ । भित्र्याउने बेला भएको धान डुबेको छ ।

प्रकाशित मिति: बुधबार, कात्तिक ३, २०७८ ०८:४२