सुदूरपश्चिममा बाढी पहिरोको प्रकोप : सबै जिल्लालाई २५/२५ लाख दिने प्रदेश सरकारको निर्णय

सुदूरपश्चिममा बाढी पहिरोको प्रकोप : सबै जिल्लालाई २५/२५ लाख दिने प्रदेश सरकारको निर्णय

A+ A A-

सुदूरपश्चिम प्रदेश सरकारले बाढी प्रभावित जिल्लाहरूलाई तत्कालको लागि २५ लाख रुपैयाँ उपलब्ध गराउने भएको छ ।

मुख्यमन्त्री तथा मन्त्रिपरिषद्को कार्यालयमा मंगलबार बसेको आकस्मिक बैठकले विपद् व्यवस्थापन राहत र उद्धारको लागि जिल्ला विपद् व्यवस्थापन कोषमा २५ लाख रुपैयाँ उपलब्ध गराउने निर्णय गरेको हो ।

सरकारका प्रवक्ता एवं आन्तरिक मामिला तथा कानुनमन्त्री पूर्णा जोशीले सुदूरपश्चिम प्रदेशका बाढी प्रभावित सबै जिल्लाहरूमा २५ लाख रुपैयाँ उपलब्ध गराउने जानकारी दिइन् ।

प्रदेश सरकारले प्रदेश विपद् व्यवस्थापन कोषमा २५ करोड उपलब्ध गराउने निर्णय पनि गरेको छ । प्रदेशको सबै जनशक्ति विपद् व्यवस्थापन, उद्धार र राहतमा लाग्न सर्कुलर गरिने जोशीले बताइन् ।

आइतबारदेखिको अविरल वर्षाका कारण सुदूरपश्चिममा बाढी, पहिरो तथा डुबानले जनजिवन प्रभावित भएको छ भने ठूलो मात्रामा जनधनको क्षती भएको छ ।

अविरल वर्षपछि आएको बाढीका कारण सुदूरपश्चिममा मात्र १४ जनाको मृत्यु भइसकेको छ । त्यस्तै २६ जना बेपत्ता छन् ।

बाढी पहिरोकै कारण डोटीमा ९ जनाको मृत्यु भएको छ । मंगलबार दिउँसो घर भत्किँदा जोरायल गाउँपालिका- ४ सयगडामा एकैघरका चार जनाको मृत्यु भएको जिल्ला प्रहरी कार्यालय डोटीले जनाएको छ । ४२ वर्षीय शेरबहादुर बिकको घर भत्किँदा उनीसहित उनकै १८ वर्षका छोरा मोहन बिक, १२ वर्षीया छोरी पवित्रा बिकको मृत्यु भएको छ । सोही घरमा मामाघर आएका १६ वर्षीय रविन बिकको पनि मृत्यु भएको छ ।

घटनाबारे पूर्णविवरण अझै आइनसकेको जिल्ला प्रहरी कार्यालय डोटीका प्रहरी निरीक्षक रविन्द्र चन्दले जानकारी दिए । यस्तै जोरायल गाउँपालिका–४ मा पनि पहिरोले घर च्याप्दा ६२ वर्षका जोगी सार्कीको मृत्यु भएको छ । उनकी श्रीमती पनि घाइते रहेको बताइएको छ ।

यस्तै पहिरोसँगै आएको ढुंगा लागेर शिखर नगरपालिका ११ की ३६ वर्षीया मन्धरी बलायरको मृत्यु भएको छ । दिउँसो घाइते रहेकी उनको उपचारका क्रममा दिपायलस्थित सुजंग अस्पतालमा मृत्यु भएको हो ।

गएराति पहिरोले घर च्याप्दा जिल्लाको सायल गाउँपालिका- ६ का बिरबहादुर कुन्जेडाका १४ वर्षीय छोरा सागर र ११ वर्षीय आशिष कुन्जेडाको मृत्यु भएको थियो । सोही घटनामा तीन जना घाइते भएका छन् ।

उता बैतडीको शिवनाथ गाउँपालिकामा पहिराले घर बगाउँदा तीन जनाको मृत्यु भएको छ । वडा नम्बर ६ बसेडीका रामी पार्कीको घर पहिरोले बगाउँदा तीन जनाको मृत्यु भएको शिवनाथ गाउँपालिकाका अध्यक्ष कर्ण साउँदले बताए । मृत्यु हुनेमा १८ वर्षीया पवित्रा पार्की, २४ वर्षीया भानु पार्की र ३ वर्षीय सोम पार्की छन् ।

डडेल्धुरामा घरमाथिबाट आएको पहिरोमा पुरिएर एक जनाको मृत्यु भएको छ । जिल्लाको गन्यापधुरा गाउँपालिका–१ भात्काडाका ३२ वर्षीय विष्णु अवस्थीको ज्यान गएको प्रदेश प्रहरी कार्यालय धनगढीले जनाएको छ । प्रदेश प्रहरीका प्रहरी वरिष्ठ उपरीक्षक बिक्रम चन्दका अनुसार हालसम्म एक जनाको मृत्यु भएको जानकारी आएको बताए ।

यस्तै डडेल्धुरामा खोलाले बगाउँदा एक महिलाको मृत्यु भएको छ । गन्यापधुरा गाउँपालिका–३ बस्ने अन्दाजी ६५ वर्षीय नर्मदादेवी शाहीको खोलाले बगाएर मृत्यु भएको हो । खोलाले बगाएपछि करिब ५ सय मिटर तल उनको शव भेटिएको हो ।

प्रकाशित मिति: बुधबार, कात्तिक ३, २०७८ ०६:४९