कैलालीमा बाढीको कहर: गाउँ पस्न थाल्यो कर्णाली नदी, सतर्कता अपनाउन आग्रह

A+ A A-

अविरल वर्षाका कारण कर्णाली नदीमा आएको बाढी गाउँ पस्न थालेको छ । टीकापुर नगरपालिका–५, शाहीपुरमा मंगलबारको वर्षाले ड्याम भत्काएर नदीको बाढी गाउँ पस्न थालेको जिल्ला प्रशासन कार्यालय कैलालीले जनाएको छ ।

बाढी नियन्त्रणका लागि बनाइएको बाँध फुटेको जिल्ला प्रशासनका सूचना अधिकारी शिवराज जोशीले जानकारी दिए ।

उनले शाहीपुरबाट कर्णाली नदीको बाढी गाउँ पस्न थालेपछि टीकापुर नगरपालिकाको वडा नम्बर ५ देखि ९ सम्मका बस्तीहरू जोखिममा परेका बताए । अत्यधिक वर्षासँगै कर्णालीमा बाढीको सतहले खतराको संकेत नाघेको छ ।

चिसापानीमा रहेको जलमापन केन्द्रका अनुसार कर्णाली नदीमा पानीको सतह १२.०५ घनमिटर मापन भएको छ । नदीमा बाढीको सतह १०.८० घनमिटर पुगेमा खतराको तह मानिन्छ ।

प्रभावित क्षेत्रमा संभावित जोखिमलाई ध्यानमा राखेर नेपाल प्रहरी र नेपाली सेनाको टोली परिचालन गरिएको छ । जिल्ला प्रशासन कार्यालयले तटीय क्षेत्रका बासिन्दालाई सतर्क रहन सूचना जारी गरेको छ ।

एक दम्पती बगरमा थुनिए

कैलालीको मोहन्याल गाउँपालिका–४, खिमडीमा खोलाको दोभानमा एक दम्पती फसेका छन् । स्थानीय लोकबहादुर बुढामगर र उनकी श्रीमती बिर्मादेवी बुढामगर मंगलबार बिहानदेखि खिमडीस्थित ठूलीगाडको दोभानमा फसेका हुन् ।

फसेका दुई जनाको हेलिकप्टरबाट उद्दार गर्ने प्रयास भइरहेको छ । मौसमको खराबीले उद्दारमा समस्या भइरहेको जिल्ला प्रशासन कार्यालयले जनाएको छ । उनीहरूको उद्दारका लागि नेपाली सेनाको हेलिकप्टर धनगढी विमानस्थलमा छ । प्रशासन कार्यालयका सूचना अधिकारी शिवराज जोशीले उद्दारका लागि हेलिकप्टर धनगढी विमानस्थलमा रोकिएको बताए ।

भीमदत्त राजमार्ग अवरुद्ध

अविरल वर्षासँगै कैलालीको भाँसु भीरमा आएको पहिरोले भीमदत्त राजमार्ग अवरुद्ध भएको छ । सोमबार बेलुकीबाट राजमार्ग अवरुद्ध हुँदा दर्जनौँ यात्रुवाहक सवारी साधन र यात्रु बीचबाटोमै अलपत्र परेका छन् ।

दुई वटा डोजर लगाएर पहिरो पन्छाउने काम भइरहेको क्षेत्रीय ट्राफिक प्रहरी कार्यालय अत्तरियाले जनाएको छ ।

प्रकाशित मिति: मंगलबार, कात्तिक २, २०७८ १४:४३