किमका सौतेनी दाजु अमेरिकी गुप्तचर एजेन्सी सीआईएका एजेन्ट !

A+ A A-

उत्तर कोरियाली नेता किम जोङ–उनका सौतेनी दाजु किम जोङ–नाम अमेरिकी गुप्तचर एजेन्सी सीआईएका एजेन्ट भएको एक अमेरिकी अखबारले सार्वजनिक गरेको छ ।

सन् २०१७ मा मकाउ जान लागेका किमको मलेसियाको क्लालम्पुरस्थित विमानस्थलमा हत्या भएको थियो । सो हत्यालाई लिएर विश्वभर चर्चा र विवाद भयाे ।

दुई युवतीले उनको अनुहारमा विषालु भीएक्स नर्भ एजेन्ट दलेका थिए । त्यसलगत्तै उनलाई अस्पताल लगे पनि तत्काल चिकित्सकले मृत घोषणा गरेका थिए ।

सो आक्रमणमा संलग्न दुवै यसै वर्ष युवती रिहा भइसकेका छन् ।

किम जोङ–नामले केही पटक सीआईएका अधिकारीसँग छलफल गरेको बताइएको छ । दक्षिण कोरियाली अधिकारीहरुले उत्तर कोरियाली नेता किमले उनको हत्या गर्न आदेश दिएअनुसार नै किम जोङ नामको हत्या भएको दाबी गरेका छन् ।

यद्यपि, उत्तर कोरियाले यो आरोपको खण्डन गर्दै आएको छ । सीआईएसँग सम्बन्ध रहेको सञ्चारमाध्यममा रिपोर्ट आए पनि किम र सीआईएबीचको सम्बन्धबारे विस्तृत रुपमा स्पष्ट भइसकेको छैन ।

वाल स्ट्रिट जर्नलका अनुसार सीआईएका गुप्तचरसँग ४५ वर्षीय किमको केहीपटक कुराकानी भइसकेको थियो । यसबारे जानकारी राख्ने नाम उल्लेख नगरिएका व्यक्तिलाई उदृत गर्दै यो समाचार प्रकाशित भएको हो ।

कुनै समयमा उत्तर कोरियाली शासनका उत्तराधिकारी मानिने किम जोङ नामलाई छाडेर उनका बाबु किम जोङ–इलले कान्छा छोरा किम जोङ–उनलाई उत्तराधिकारी बनाएका थिए ।

सौतेनी भाइलाई उत्तराधिकारी बनाएपछि उनी चीन, मकाउ, सिंगापुरजस्ता देशमा व्यापारिक काममा संलग्न थिए । उनी उत्तर कोरियाली कट्टर शासनको विरोधी भएकोले नै उनको हत्या भएको बताइन्छ ।

प्रकाशित मिति: बुधबार, जेठ २९, २०७६ १८:३२